48
Iakobo Manasa wata Ifeleimi i vona-nuakalikaliedi
1 Tamu tutuya 'waineye, Iosefa vala i nogai tamana i viga. Begaidi Iosefa i 'idewadewa bega natunavo 'adi 'ailuga Manasa wata Ifeleimi taiadi i nago Iakobo i na fogei.
2 Tutuyanina Iakobo i voneni i vo, Natumu Iosefa 'akonadi i le'wa,” nika Iakobo i siyoyoni yana toketokena i 'ewai mulieta i tovoi i miabui 'ana 'ivie.
3-4 Nag 28:13,14Iakobo Iosefa i voneni i vo, Yaubada Toketokeotogina 'waikuye i souyeni 'atamana Losi 'awalawa Kenani 'waineye bega i vona-nuakalikalieku. I vo, Yau natumwavo fuedi a na velemu nika tubumwavo 'adi 'aila'a i na vefue. Kenani 'awalawanina tubumwavo a na veledi yadi 'eba veimea i na 'eno-vagata.’
5 Wata Iakobo Iosefa i voneni i vo, Natumwavo 'adi 'ailuga Ifeleimi wata Manasa Itifita 'waineye i tubuga mulieta a mai, 'asa'aiana natukwavo, kwakwamanidi bani'odi yaku tubu'edakumetavo Lubeni wata Simioni. 6 Mulieta 'ai'edi 'ifwaidi kwakwama 'u na venatunediga, kwakwamanidi 'omu natumwavo we'e yadi fwayafwaya 'adi veuveuta 'ana 'ewa faifaina Ifeleimi wata Manasa 'waidiega.”
7 Tutuya Basenadiotoga, 'atamana Fadani-Lami 'wainega a vilaku a mimai, nika Litieli yawaidi i 'a'ava 'awalawa Kenani 'waineye. Bola 'a mimaia 'edeye, kebu Efaleti 'atamananina Bedeliema 'ada veluagai. Ma yama nuavita 'a ve'ufadi Efaleti 'ana 'eda i nunago lilivaneye.”
8 Mulieta Iakobo kwakwama 'adi 'ailuga i 'isedi i velutoli i vo, De'e 'omu natumwavo?”
9 Iosefa tamana yana velutoli i nogayeni i vo, E'e De'e natukwavo, Itifita bei 'a miamia Yaubada i veleku.”
Bega Iakobo i vo, Nuanuaku 'u na miedi lilivakuye, bega a na vesauluva 'atumaina 'waidie.”
10 Iakobo matana i sako-'afo'afo kebu 'ana fata i na 'isa-'atumai, fai i ve'auvea. Bega Iosefa natunavo i nawedi lilivaneye, tamana i 'avalamaigidi i yaogidi. 11 Mulieta Iakobo Iosefa i voneni i vo, A vo 'ako maigimu kebu a na 'iseni siwe Yaubada i 'ivaiseku ma yawaiku a miamia 'ana tugusa natumwavo taiadi a 'isemi.”
12 Mulieta Iosefa natunavo tubudi 'agenega i vaganawedi, nika ma yana ve'ililibu i 'odu fwayefwayeye.
13 Iosefa natunavo 'adi 'ailuga i nawedi tamana lilivaneye, i vetovoidi Ifeleimi Iakobo 'ana wamayega we'e Manasa 'ana 'atagiega. 14 Siwe Iakobo nimana i yatowaledi 'ana 'atagiega Ifeleimi 'unu'ununeye i yatoi avinodi bwasiona. We'e Manasa, avinodi tubu'edakumeta, siwe Iakobo 'ana wamayega*Tomotoganidi yadi 'aseta nima 'atagi tamu tugusa bwaikina nani 'atumaidi 'adi veluaga faifaina. 'unu'ununeye i yatoi. 15 Mulieta wata Iakobo Iosefa i vona-nuakalikalieni i vo,
Nuanuaku tubuku Ebelamo wata tamaku Aisake yadi Yaubada,
kumanina i 'i'isave'aviniku yaku mia matatabuna 'waineye i maiga 'asiau,
i da vevesauluva 'atumaina kwakwama de'e 'waidie.
16 Nuanuaku Yaubada yana anelose, kumanina vita fuedi 'waidiega i 'ita'ita'iekuga, i da vevesauluva 'atumaina 'waidie.
Wata nuanuaku 'awaie tomotoga fuedi yau, Ebelamo wata Aisake 'ama wagava i da nunuave'avinidi kwakwamanidi 'waidiega,
we'e 'adi 'aila'a i da vebwaika-'afo'afo fwayafwaya matatabuna 'waineye.”
17 Tutuyanina Iosefa tamana i 'iseni nimana 'ana 'atagi i yatoi Ifeleimi 'unu'ununeye, kebu i da sosoana. Begaidi tamana nimaneye i 'abi, nuanuana Ifeleimi 'unu'ununega i na 'ewai Manasa 'unu'ununeye i na yatoi. †Tomotoganidi yadi 'aseta nima 'atagi tamu tugusa bwaikina nani 'atumaidi 'adi veluaga faifaina. 18 Iosefa tamana i voneni i vo, Kebu, tamaku. Side kumanina yaku tubu'edakumeta, bega i lubwaineni 'amu 'atagi 'unu'ununeye 'u na yatoi.”
19 Siwe tamana kebu nuanuana, begaidi i voneni i vo, A 'asetai natuku, a 'asetai. Manasa kumanina 'awaie 'ana 'aila'a bwaikina 'wainega i na souyeni, we'e taina Ifeleimi 'ana 'aila'a bwaikaotogina mulieta tatana. Wata tubunavo 'adi 'aila'a i na vebwaika-'afo'afo 'awalawa tulina tulina 'waidie.” 20 Ibu 11:21'Aiatanina 'waineye side bani'odi Iakobo kwakwamanidi i vona-nuakalikaliedi i vo,
'Awaie me Isileli nuanuadi i na vona-nuakalikaliga, 'ami wagava i na 'ina'inanadi.
I na vo, Yaubada i da vesauluva 'atumaina 'waimuye bani'odi Ifeleimi wata Manasa 'waidie.”
Yana vona-nuakalikalinina 'wainega Iakobo Ifeleimi i silakai i ve'edakumetai mulieta Manasa.
21 Mulieta Iakobo natuna Iosefa i voneni i vo, 'U 'iseku, 'akonadi yaku toketokena i vilai, sai'afotoga a na 'iawemi. We'e Yaubada taiadi 'wa na miamia i na nagoga wata i na vagavaimi i na vevilami 'wa na wai 'ami tuvadeye.”
22 Tatamwavo 'akonadi yadi fwayafwaya a veledi, we'e 'omu yamu fwayafwaya basenadi yaku kefata wata yaku 'ibadi 'wainega me Emoli a vetoketoke'iawedi fwayafwayanina ma 'ana 'imoso'i a velevelemu.”