47
Iakobo i ve vesauluva 'atumaina Felo 'waineye
1 Iosefa i nago Felo i voneni i vo, Tamaku wata ekwavo i le'wai 'awalawa Kenani 'wainega. Matatabudi i maia ma yadi 'aisaya sifi, bulumakau wata nani 'ifwaidi taiadi i miedi Kenani 'wainega, 'asiau i miamiani 'awalawa Goseni.”
2 Iosefa enavo 'adi 5 i venua'ivinedi taiadi i nagoi Felo 'waineye. 3 Tutuyanina i le'wai, Felo i velutoliedi i vo, Ava'ai yami folova?”
I vo, 'Ima yamu tofolovavo, sifi 'adi to'isave'avina basenadi tubumavo bani'odi. 4 Wata i voneni i vo, 'Ima 'a mai Itifita tutuya 'ale'usana 'ana mia, fai Kenani 'waineye loka bwaikina yama 'aisayavo yadi 'eba 'ani kebu. Fai bola loka bwaikina i 'eno'eno, begaidi 'a vevelu'ui nuakalikali 'waimuye 'u da tauyema 'a da mia 'awalawa Goseni.”
5 Bega Felo Iosefa i voneni i vo, Tamamu wata emwavo i maia taiadi ta na mia, 6 Itifita fwayafwaya matatabuna a tauyeni 'waimuye, we'e taunimu 'u na venua'ivina bega tamamu wata emwavo 'u na ve mianidi 'awasasa 'atumaina 'waineye. 'U na tauyedi i na miamiani 'awalawa Goseni. We'e emwavo 'waidiega, kumanina yana 'aseta bwaikina 'u da venua'ivinedi i da ve to'isave'avina, yaku 'aisayavo 'waidie.”
7 Iosefa tamana Iakobo i mieni Felo 'waineye i sivemageseni. Mulieta Iakobo i vesauluva 'atumaina Felo 'waineye.
8 Mulieta Felo Iakobo i velutolieni i vo, 'Amu malamala 'aivia?”
9 Iakobo i voneni i vo, Yau a ve ve wakawaka fwayafwaya de'e 'waineye, malamala 130 nagedie vita fuedi nagediamo a luku susula. Siwe yaku mia fwayefwayeye tutuya 'ale'usana, kebu tubukwavo taiadi 'ada vesala.” 10 Nika Iakobo i vesauluva 'atumaina Felo 'waineye, mulieta i souyeni yana vanuga 'wainega.
11 Bega Iosefa tamana wata tatanavo 'awalawa Itifita yana fwayafwaya 'atumaina i veledi, bei i na miamia i na folofolova 'atamana Lamesisi yana 'eba veimea nageneye. 12 Bega Iosefa tamana, tatanavo wata tamana yana vanuga 'ana tomia natudiavo siasiaidi taiadi, 'adi'adi i veledi 'adi 'aila'a 'ana 'etoava 'wainega.
Iosefa Yana veto'edakumeta Loka yana Tutuya 'waineye
13 Tutuyanina 'waineye, Itifita wata Kenani 'awalawa matatabuna loka bwaikina i souyeni 'waidie, bega tomotoga 'aila'a 'adi'adi i ve'a'ava i laselase. 14 Iosefa kileu bwaikina i veveluagai me Itifita wata me Kenani 'waidiega, fekafeka 'ana vekimwane 'wainega. Iosefa kileu i nunawedi Felo yana vanuge i yatoyatodi. 15 Tutuyanina me Itifita wata me Kenani yadi mani i ve'a'ava, me Itifita matatabudi i maia Iosefa 'waineye ma yadi nuavita i tai vonavona i vo, Yama mani 'a ve'a'avedi, we'e 'a vevelu'ui-nuakalikali 'waimuye 'ani'ani 'u na velema, 'ai'edi kebu matamuye 'ana wafa.”
16 Iosefa i tutula i vo, Fai yami kileu 'wa ve'a'ava, begaidi yami 'aisayavo 'wa na miedi 'waikuye, ma'itufa 'ani'ani a na velemi.” 17 Yadi 'aisayavo bani'odi osi, sifi, goti, bulumakau wata 'aisaya doniki i nunawedi Iosefa 'waineye 'ani'ani faifaina taiadi i sivedamana, malamala 'aitamogana nageneye.
18 Malamala 'aitamogana i 'a'ava, tamu malamala 'ana veluga 'waineye, wata i maia i voneni i vo, 'Ama toveimea kebu 'ama fata 'ama vita faifaina 'a ve'ewa matamuye. 'A vona mogitana 'waimuye, yama kileu matatabuna i 'a'ava, wata yama 'aisayavo wata bulumakau 'omu faifaimu. Kebu tamu ava'ai 'a da luvegalaleni bega 'ana velemu, nani 'ailuga 'a taunima wata yama fwayafwaya. 19 Ava'ai faifaina matamuye 'ana wafa? Tomotoga wata yama fwayafwaya taiadi 'u da kimwanema bega 'ani'aniega ta da sivedamana, we'e yama fwayafwaya wata taunima 'atauyema 'ana vetofolova-maimaiga Felo faifaina. Nuanuama witi 'u na velema 'wainega i na 'i'ivaisema nika kebu 'ana wafaga. Fai kebu nuanuama fwayafwayanina i na velovi wata i na venage'ava.
20 Bega Iosefa Itifita fwayafwaya matatabuna i kimwanedi Felo faifaina. Fai loka bwaikina begaidi me Itifita yadi fwayafwaya i vevekimwaneyedi Iosefa 'waineye. Wata fwayafwayanina matatabuna Felo yana 'eba veimea. 21 We'e tomotoga matatabuna, Itifita yana 'eba veimea 'eba velamu i nago yana 'eba ve'a'ava i 'ewadi i vetofolova-maimaiga Felo faifaina. 22 Tomotoga matatabuna yadi fwayafwaya Iosefa i kimwanedi, we'e tovelomu yadi fwayafwaya kebu i da kimwaneiga. Fai tovelomu 'adi 'adi i veveluagai Felo 'wainega. Begaidi kebu yadi fwayafwaya i da vevekimwaneyeni.
'Adi tutula 'wainega i veveluagai
23 Mulieta Iosefa tomotoga i vonedi i vo, A na vonemi, 'asiau 'omi wata yami fwayafwaya a kimwanedi Felo faifaina. Begaidi waifei a na velemi 'wa na bakula. 24 Tutuyanina 'wa na 'a'aile'waga, yami 'ayavau 'wa na 'anivelenedi Felo faifaina. We'e luvegalalana, yami waifei bakula faifaina, 'ami'ami, yami vanuga 'ana tomia wata natumiavo faifaidi.
25 Wata i voneni i vo, 'Omu yama mia vitana 'wainega 'u 'ivaisema, begaidi nuanuama 'u da tauyema 'a da vetofolova-maimaiga Felo 'waineye.” 26 Tutuyanina Iosefa veimea i 'idewai me Itifita faifaidi, yana veimea i yatoi bega 'ani'ani matatabuna i na mimaiedi Felo 'waineye. We'e fwayafwayanina tovelomu faifaidi kebu i da 'aniveleni Felo 'waineye.
27 Tutuyanina me Isileli i miabui 'awalawa Itifita, Goseni yana 'eba veimea nageneye. Yadi mianina 'waineye, nani matatabuna 'wainega i ve'ai'aiwabu, 'ani'ani bwaikina i veluagai wata 'adi 'aila'a fueotogidi.
28 Iakobo i miamiana Itifita malamala 17 nagedie, nika bei 'ana malamala 147 i veluagai.
29 Iakobo sai'afoga yawaina i na 'a'ava, natuna Iosefa i goleni i mai i voneni i vo, Nuanuaku tamu nani faifaiku 'u da 'idewai. Nimamu 'u na yatodi 'ageku dibuneye bega matakuye 'u na vona'awaufaufa. Nika a na nogai bega a na 'asetai, ma yamu nuakalikali yaku velu'ui 'u da awave'atumaieni. Kebu nuanuaku vovoku 'u na ve'ufai Itifita 'waineye. 30 Tutuyanina yawaiku i na 'a'avaga, a vevelu'ui-nuakalikali, nuanuaku vovoku Itifita 'wainega 'wa na naweku 'aku tuvada Kenani 'waineye, tubukwavo lilivadie 'wa na ve'ufaku.”
Nika Iosefa i vo, A vona'awaufaufa matamuye, yamu nuanua matatabuna a na 'idewai.”
31 Iakobo natuna Iosefa i voneni i vo, 'U na vona'awaufaufa matakuye, Bega Iosefa ma yana ve'ililibu tamana yana vona'awaufaufa i kiavetoketokei mulieta Iakobo i 'odu 'ana 'unugalo 'waineye.