46
Yaubada i souyeni Iakobo 'waineye
1 Iakobo yana kukua matatabuna i 'ewadi nika i tauya i nago. I le'wa Biasiba, i 'idewadewa 'aisaya i velomuyedi i kabunidi tamana Aisake yana Yaubada 'waineye. 2 Iakobo, tamu 'ana wagava Isileli, lovane i miamia nika Yaubada i souyeni 'waineye 'wa da vo i da 'enoneganega i goleni i vo, Iakobo, Iakobo.” Bega i tutula i vo, Yau side.” 3 Wata i vo, Yau Yaubada, tamamu yana Yaubada. Kebu 'u na kolologa 'u na nago Itifita fai bei 'amu wauma a na 'ivebwaiki. 4 Yau taiadi ta na nago Itifita wata 'awaie a na vevilami. We'e natumu Iosefa tutuya matatabuna taiadi 'wa na miamia, i na nagoga matamu i na yaibaia.”
5 Mulieta Iakobo Biasiba i 'iaweni natunavo i vemiabuia, natudiavo wata yadi vevinevo matatabudi i dodoga, waka-yo'eyo'enidi*Wegoni tamu fwayafwaya 'ana waka, 'aisaya bulumakau i luluyo'ei, kukua bwaikina 'adi 'eba vedodoga. Felo i vetunediga 'ana 'aidodoga faifaina 'waidiega. 6-7 Fol 7:15Yadi 'aisayavo wata yadi kukua matatabuna i 'ewadi Kenani 'waineye, i nawedi Itifita. Iakobo natunavo iavetadi wata tubunavo iavetadi, natunavo vevinedi wata tubunavo vevinedi, matatabudi yana 'aila'avo taiadi i nagoi.
8 Isileli tubunavo 'adi wagava side bani'odi, (Iakobo natunavo) kumanidi i nagoi Itifita.
Iakobo yana tubu'edakumeta 'ana wagava Lubeni. 9 Lubeni natunavo side 'adi wagava. Inoki, Falu, Esiloni, Kalimi.
10 Simioni natunavo side 'adi wagava. Iemuela, Iamina, Oadi, Iakini, Soala, Siaulo. Siaulo inana vavine Kenani.
11 Livai natunavo 'adi wagava side bani'odi. Gelisoni, Koati wata Melali.
12 Iuda natunavo side 'adi wagava. Eli, Onani, Sila, Felesi wata Dela. ( Ilai wata Onani yawaidi i 'a'ava 'awalawa Kenani 'waineye.) We'e Felesi natunavo Esiloni wata Amulu.
13 Isaka natunavo side 'adi wagava. Tola, Fua, Iasuba, Similani.
14 Sebuloni natunavo side 'adi wagava. Seledi, Eloni wata Ialeli.
15 De'e 'aila'anidi, Lea wata Iakobo natudiavo novudi Deina taiadi i tubuga 'atamana Fadani-Lami 'waineye. Iakobo tubunavo iavetadi wata vevinedi, Lea 'waidiega 'aila'a 33 i souyeni.
16 Gada natunavo side 'adi wagava. Sefoni, Agedi, Suni, Esiboni, Eli, Elodi, Aleli.
17 Asa natunavo iavetadi 'adi wagava. Imina, Isiva, Isivi, wata Belia, we'e novudi 'ana wagava Sela. Belia natunavo iavetadi 'adi wagava, Ebeli wata Malikieli.
18 Silifa natunavo iavetadi, fai basenadi tamana Lebani yana tofolova-maimaiga Lea i veleni. Iakobo tubunavo Silifa 'waidiega 'aila'a 16 i souyeni.
19 Iakobo yana vavine Litieli natudiavo 'adi wagava Iosefa wata Beniamina.
20 Iosefa natunavo i tubuga 'awalawa Itifita 'waineye 'adi wagava, Manasa wata Ifeleimi. Inadi 'adi wagava Aseneati, we'e tamadi 'ana wagava Fotifali tamu tovelomu 'awalawa Oni 'waineye.
21 Beniamina natunavo iavetadi side 'adi wagava. Beila, Beki, Asibeli, Gelai, Nemani, Egi, Losi, Mafimu, Afimu, Alidi.
22 De'e Litieli wata Iakobo natudiavo iavetadi. Iakobo tubunavo Litieli 'waidiega 'aila'a 14 i souyeni.
23 Dani natuna 'ana wagava Usimi.
24 Nafitalai natunavo side 'adi wagava. Iasieli, Guni, Iesa wata Silemi.
25 'Aila'anidi Iakobo natunavo iavetadi i tubuga yana vavine 'adi wagava Bilani 'waidiega, kumanidi Litieli tamadi Lebani yana tofolova-maimaiga i veleni. Basenadiotoga Iakobo tubunavo 'waidiega, Bilani natudiavo 'adi 'aila'a 7.
26 'Aila'anidi Iakobo taiadi i nagoi Itifita, 'adi 'aila'a matatabuna 66. We'e natunavo yadi vevinevo kebu taiadi i da lu'iawawadiga. 27 We'e Iosefa natunavo 'adi 'ailuga i tubuga nika 'adi 'aila'a i 'imoso'ieni Itifita nageneye, bega Iakobo yana 'aila'a matatabuna 70 i miamiani Itifita 'waineye.
Iakobo ma yana 'aila'avo i le'wa Itifita
28-29 Goseni lilivaneye i le'wai bega Iakobo Iuda i vetunei i na nago Iosefa taiadi i na veifufu wata i na awave'ede'edeni, Iuda ava'aiamo i na luku 'awalawa Goseni 'waineye. Tutuyanina i le'wai, Iosefa yana salioti†Salioti tamu fwayafwaya 'ana waka, 'aisaya osi i luluyo'ei. 'waineye i dodoga bega i nago Goseni tamana i yogo'ede'edeni. Tutuyanina taiadi i veluaga Iosefa tamana i 'avalamaigi i toke i tainu'wanu'wa. 30 Mulieta Iakobo natuna Iosefa 'waineye i vo, 'Asiau matakuyega a 'isemu ma yawaimu, bega yau ma yaku nuaniwalova wata ma yaku sosoana yawaiku i na 'a'ava.”
31 Iosefa enavo wata tamana yana 'aila'a taiadi i vonedi i vo, Yau a na nago Felo a na voneni a na vo, Ekwavo wata tamaku yana 'aila'a taiadi Kenani 'wainega, i maia 'waikuye. 32 Tomotoganidi sifi to'isave'avina tutuya matatabuna i veve'isabodebodedi. Yadi 'aisayavo taiadi i maia bani'odi sifi, bulumakau wata nani 'ifwaidi taiadi.’ ”
33 Bega Iosefa i vonedi i vo, Tutuyanina Felo yami folova faifaina i na velutoliemi, i na vo, Ava'ai yami folova?’ 34 Side bani'odi 'wa na voneni 'wa na vo, 'Ima yamu tofolovavo, yama mia matatabuna 'waineye, 'aisaya 'adi to'isave'avina tubumavo basenadi bani'odi.’'Ai'edi yami folova faifaina 'wa na veifufuyeni 'waineye, 'ana fata i na tauyemi Goseni yana 'eba veimea 'waineye, 'wa na mia, fai me Itifita sifi to'isave'avina i vematakilekiledi.”