45
Iosefa taunina i Sivemageseni
1 Iosefa kebu 'ana fata i na tokemaigeni fai 'aila'a i miamiani tutudaba nageneye, begaidi yana tofolovavo i vonedi i vo, matatabumi 'wa souyemi, bega 'aila'a i souyedi 'aise'avadi taunina i sivemageseni enavo 'waidie. 2 Bega Iosefa i 'odu i 'we'wela. I taibwaubwau 'ana fata me Itifita i na nogai. Tutuyanina 'we'wela i nagoi, yana vanuga 'ana tomia Felo 'ana vala i naweni yana vanuga 'waineye.
3 Enavo i vonedi i vo, Yau Iosefa, we'e nuanuaku a na 'asetai, tamaku 'atumaina i miamia?” Tatanavo i 'iseni i kololo siwe kebu 'adi fata i na veifufu fai Iosefa i 'iseni i tovotovoi manawadie.
Iosefa taunina i sivemageseni
4 Mulieta Iosefa tatanavo wata taina 'waidie i vo, 'Wa da vagamaia 'waikuye.” Tutuyanina i nagoi lilivaneye i vonedi i vo, Yau taimi, Iosefa, kumaniku 'wa vekimwaneyeku me Itifita 'waidie. 5 Begaidi 'asiau kebu 'wa na nuavitaga wata kebu taunimi 'wa na 'uvanimiga, 'wa vekimwaneyekuga faifaina. Yaubada i vetuneku a kumeta a mai bega tomotoga fuemi a na 'ita'ita'iemi. 6 'Awalawa de'e 'waineye loka 'ana malamala 'ailuga 'akonadi i 'a'ava, we'e malamala 5 wata i 'eno'eno kebu 'ana fata ta na bakulaga wata ta na 'aialaga. 7 Siwe 'waimiega Yaubada i vetuneku a kumeta a mai bega a na 'ita'ita'iemi wata tomia fwayafwaya matatabuna 'waidiega 'ifwaimi ma yawaimi 'wa na miamia. 'Ita'ita'inina 'ana 'eda Yaubada i 'idewaiga bwaikina wata 'eba nuavogana. 8 Bega 'omi kebu 'wa da vetuneku 'awalawa de'e 'waineye, we'e mogitana Yaubada. I silakaiku bega a vevetoawave'eda'eda Felo 'waineye, yana vanuga nagena 'ana to'isave'avina wata Itifita matatabuna 'waineye a vevetoveimea.
9 Fol 7:14'Asiau 'wa na vila-matayo'omi 'wa na nagoi tamada 'wa na voneni 'wa na vo, Natumu Iosefa side bani'odi i voneyedi i vo, Yaubada i vesauluva 'atumaina 'waikuye bega 'asiau Itifita matatabuna a veveimeyeni, begaidi 'u na 'abiwalowaloga 'u na obuma 'waikuye, kebu 'u na 'ivogavoganaga. 10 'Awalawa Goseni 'wa na vili, lilivakuye 'wa na mia. Natumiavo, tubumiavo, yami 'aisayavo bwaikidi, siasiaidi wata yami kukua matatabuna 'wa na miedi. 11 Lilivakuye 'wa na miamia 'aku fata a na 'i'isave'avinimi fai loka 'ana malamala 5 bola i 'eno'eno. Begaidi kebu nuanuaku 'omu taunimu, yamu 'aila'avo wata yamu 'aisayavo taiadi laseyega 'wa na vewekowekoma.”
12 Wata Iosefa i veifufu i vo, 'Wa 'iseni! 'Omi wata taimi Beniamina taunimi 'wa na mai 'wa na 'iseku, yau mogitana Iosefa, kumaniku a veveifufu 'waimie. 13 Enavo i vonedi i vo, 'Wa na nago tamaku 'wa na voneni yau tamu Itifita 'ana toveimea ma 'aku ve'ililibu, 'awalawa de'e 'waineye. Naninidi 'wa 'isedi 'waidie a folofolovaga wata yaku mia matatabuna 'wa na veifufuyeni 'waineye. Wata nuanuaku 'wa na 'abiwalowaloga tamaku 'wa na mieni 'waikuye.” 14 Mamatageuna sosoana taiadi taina i 'avalamaigi i 'we'wela wata Beniamina tatana i 'avalamaigi i taibwaubwau . 15 Mulieta Iosefa enavo 'aitamogana 'aitamogana i yaogidi wata i 'we'welidi i 'a'ava, enavo taiadi i veifufu.
Felo Iakobo i tayegi i mai Itifita
16 Tutuyanina Iosefa enavo i le'waiga valadi i nogai, Felo yana toveimeavo matatabudi i sosoana.
17 Bega Felo Iosefa i voneni i vo, Emwavo 'u na vonedi 'u na vo, Yami folova side bani'odi. Yami kukua 'wa na vedodogidi, 'aisaya 'waidie. 'Wa na 'abiwalowaloga 'wa na vilami Kenani. 18 'Wa na nagoi tamami wata yami 'aila'avo 'wa na vagavaidi 'wa na vilami 'waikuye. Fwayafwaya 'atumaina Itifita nageneye a na velemi, bega fwayafwayanina vuagina 'wainega 'wa na 'ani.’ ”
19 Bega Felo Iosefa i voneni i vo, Emwavo 'u na vonedi Fwayafwaya 'ana waka yo'eyo'e Itifita 'wainega, 'wa na 'ewadi natumiavo, yami vevinevo wata tamami 'wa na dodogidi 'wa na mai Itifita.
20 Kebu 'wa na venuafouviga yami kukua faifaidi, fai 'awalawa Itifita fwayafwayanina 'atumaina matatabuna 'omi faifaimi.’ ” 21 Mulieta Iakobo natunavo veifufunina i nogai i vematayakeyakeni. Felo veimea Iosefa i veleni bega fwayafwaya 'ana waka-yo'eyo'e wata 'adi 'ibua taiadi i veledi 'eda faifaina. 22 Enavo matatabudi talauma 'ivaudi i veledi, we'e Beniamina 'ana talauma 'ivaudi 5 wata kileu siliba 300 i veleni. 23 Mulieta tamana yana doniki iavetadi 'adi 10 i vetunedi, wata Itifita fwayafwaya vuagina 'atumaidi, doniki 'adi 10 vevinedi, witi vuagidi, beledi wata 'ifwaidi nani 'atumaidi 'adi 'eda faifaina i veledi.
24 Bega Iosefa enavo i vetunedi i nagoi, tutuyanina i tauya, i vonedi i vo, naninidi 'wa 'ewadiga , kebu faifaidi ma emiavo 'edeye 'wa na ve'ikwayekwayega.”
25 Iosefa yana veifufu i 'a'ava, tatanavo Itifitayega i tauya i laka Kenani, tamadi Iakobo 'waineye i le'wa. 26 Tamadi i voneni i vo, Iosefa ma yawaina i miamia, mogitana taunina 'asa'aiana Itifita matatabuna 'ana to'isave'avina.” Iakobo yawaina i lovoga yadi veifufu kebu i da awave-mogitaneniga.
27 Siwe tutuyanina Iosefa yana nuanua matatabuna i lu'ivoneyedi Iakobo 'waineye, wata waka-yo'eyo'e*Wegoni tamu fwayafwaya 'ana waka, 'aisaya bulumakau i luluyo'ei, kukua bwaikina 'adi 'eba vedodoga. natuna i vetunediga 'ana 'aidodoga faifaina, i 'isedi i ve'awamogitaneni nuana i veagiagi. 28 Iakobo i vo, E'a, be'ama a 'asetai, 'alo natuku Iosefa bola ma yawaina i miamia. I lubwaineku a na nago a na 'iseni mulieta yawaiku i na 'a'ava.”
*45:27: Wegoni tamu fwayafwaya 'ana waka, 'aisaya bulumakau i luluyo'ei, kukua bwaikina 'adi 'eba vedodoga.