1 Tutuyanina Iakobo Kenani i miamia vala i nogai Itifita 'waineye 'ani'ani i 'eno'eno. Natunavo i vonedi i vo, Kebu ma emiavo 'wa na vemata'isa'isaga. 2 Fol 7:12Vala a nogai 'ani'ani i 'eno'eno Itifita 'waineye, 'wa na nagoi 'ani'ani 'wa na kimwane faifaida, nika kebu ta na wafaga, ma yawaida ta na miamia.

3 Nika Iosefa tatanavo 'adi 10 i tauya i nago Itifita 'ani'ani kimwane faifaina. 4 We'e yadi tauyanina 'waineye Iakobo kebu nuanuana Iosefa taina Beniamina taiadi i na nagoga fai i kololo i na nunago wata i na ilagi. 5 Tutuyanina tokimwane 'ifwaidi i nunago 'ani'ani kimwane faifaina, Iakobo*Iakobo tamu 'ana wagava Isileli. natunavo taiadi i nago fai Kenani wata i loka.

6 Iosefa bola i veveto'isave'avina Itifita 'waineye wata kumanina 'ani'ani i vevekimwane yana tomotogavo 'waidie. Begaidi tutuyanina tatanavo i le'wai i 'odu 'waineye, wata i lumata'afufu fwayefwayeye. 7 We'e tutuyanina Iosefa tatanavo i 'isedi i 'isa'inanadi siwe yana vesauluva 'waidie 'wa da vo tamu tomogo tulina. Begaidi bonana aya'ainega i velutoli 'waidie i vo, 'Omi ava'aiega 'wa mai?” I tutula i vo, 'Ima Kenani 'wainega 'a mai, 'ani'ani 'a na kimwane.”

8 Avinodi Iosefa tatanavo i 'isa'inanadi siwe tatanavo kebu i da 'isa'inanaiga. 9 Nag 37:5-10Nika 'ana 'enoneganega i nuani basenadi i 'enoneganega tatanavo faifaidi, i vo, 'Omi tovetaui'wala 'wa maia 'wa 'isa'isa ava'aibe 'awalawanina kebu 'ana tolumadu'aiga beidimo 'wa na luku bega 'wa na tala'avuima.”

10 Begaidi i taidaida i vo, Kebu, 'ima 'a maiga yamu tofolova-maimaiga 'ani'ani 'a na kimwane.”

11 'Ima matatabuma tomogo 'aitamogana natunavo. Wata tomotoga 'atumaima, kebu 'a da mai 'ami vetaui'wala faifaina.”

12 Iosefa i vonedi i vo, Kebu, 'omi tovetaui'wala 'wa maia 'wa 'isa'isa ava'aibe bei kebu 'ana tolumadu'aiga, beidimo 'wa na lukuma 'wa na tala'avuima.

13 Tatanavo i voneni i vo, 'Ima 'ama 12, yamu tofolova-maimaiga. Matatabuma tamama 'aitamogana, kumanina i miamia 'awalawa Kenani. Taima 'ama 'walaboda tamama taiadi i miamia, we'e tamu iama kebu taiadi 'a da miamia.”

14 Nika Iosefa i vonedi i vo, 'Akonadi a vonemi a vo, 'Omi tovetaui'wala. 15 'Asiau taunimi faifaimi 'wa veifufu, we'e 'awasasa de'e yau ma'itufa yami veifufu faifaina a na sitonovimi. A vona'awaufaufa Felo 'ana didiga 'wainega, kebu 'ana fata Itifita 'wa na 'iaweni, nagami taimi 'ami 'walaboda i na mai. 16 Tamu 'waimiega i na nago taimi i na mieni 'waikuye, we'e 'ifwaimi vanuga yogona nageneye 'wa na miamia. Nagami yami veifufu a na sitonovi, 'wa vonaga mogitana 'alo 'wa vevekali. 'Ai'edi 'wa na vekaliga, A vona'awaufaufa Felo 'ana didiga 'wainega, 'omi tovetaui'wala.

17 Bega Iosefa matatabudi i yatodi vanuga yogona 'aiata 'aitonu i miamia. 18 'Aiata 'ana vetonu 'waineye, Iosefa i vonedi i vo, Ava'ai faifaina a vonemiga, nagami 'wa na 'idewai, nika taunimi 'wa na yavumi. Yau fai Yaubada 'ana to'odu wata 'ana tove'ililibu. 19 'Ai'edi 'omi ma 'ami vetumagana, tamu taimi 'wa na tauyeni vanuga yogona nageneye i na miamia, we'e 'ifwaimi fekafeka 'wa na nawedi yami 'aila'avo i lasega, 'wa na 'ivaisedi. 20 Siwe kebu nuami i na fani, 'wa na vilavilamiga taimi 'ami 'walaboda 'wa na mieni 'waikuye. 'Ai'edi taimi a na 'iseniga, yami veifufu a na awavemogitaneni, 'ai'edi kwamananina ' kebu taiadiga, 'wa na wafa.” Nika matatabudi i sosoana.

21 'Aise'a'avadi i veifufu i vo, Mogitanaotoga 'ida 'asa'aiana taida faifaina de'e vitanina ta veluagai. Ta 'iseni i toke i 'we'we'wela wata i taidaida yawaina faifaina siwe 'ida kebu bonana ta da nogaiga. Begaidi 'ida 'asiau vitanina 'waideye i souyeni.

22 Nag 37:21,22Nika Lubeni i tutula i vo, 'Wa da vo kebu a da vonemiga. A vo, Kebu taida 'wa na nikeiga i na nunago 'wa na sakona,’ siwe bonaku kebu 'wa da nogaiga. 'Asiau ma'itufa yana wafa 'ana vita 'ida ta na tovoieni.” 23 Iosefa yadi veifufu 'akonadi i 'asetai, we'e tatanavo i bavuyeni fai kumanina tamu tosaivila Iosefa faifaina i veveifufu.

24 Iosefa tatanavo taiadi i veveifufu nika nagena i lu'ili'ilia, begaidi i vilai i luku givagivaneye i 'we'wela, mulieta i souyeni i mai yadi veifufu i ve'a'avaivai. Matatabudi 'waidiega, Simioni i venua'ivineni matadie i yogoni.

25 Iosefa yana tofolovavo i vonedi 'aitamogana 'aitamogana fekafeka 'wa na tala'ewadi yadi venuane 'wa na vedodogidi. Wata yana tofolovavo i vonedi givagivayega tatanavo yadi kileu i na veviladi yadi venuane i na vedodogidi. Wata 'adi 'ibua i veledi 'eda faifaina.” 26 Bega tatanavo fekafeka ma venuanidi i dodogidi 'aisaya doniki 'waidie, nika i viladi yadi 'atamane.

27 Tutuyanina i nunagoi 'edeye i lovanedi, bega ma ediavo i le'wa 'eba veawai 'waineye bei i 'ailove i na veawai. Matatabudi yadi venuana i yavudi fekafeka i na 'ewadi yadi 'aisayavo i na ve'anidi, nika yadi kileu i 'isedi yadi venuana nagedie. 28 Ediavo i vonedi i vo, Ekwavo, yaku kileu i vevilai, kileunina side yaku venuana nageneye.” Matatabudi yawaidi i lovoga bega i vetunuvilavila ma yadi tatava, i vona i vo, Yaubada nani de'e i 'idewaiga, ava'ai 'ana 'aseta?”

29 Tutuyanina Iakobo natunavo i le'wai 'awalawa Kenani 'waineye, naninidi i souyediga 'waidie, matatabuna i veifufuyedi tamadi 'waineye. 30 I voneni i vo, Tomogonina 'awalawanina 'ana toveimea, bonana toketokena 'wainega i vonema, igodina 'ada nago yana 'awalawa 'ana vetaui'wala faifaina.’ 31 Siwe 'a voneni 'a vo, 'Ima tomotoga 'atumaima, kebu 'a da mai yamu 'awalawa 'ana vetaui'wala faifaina. 32 Tamama 'aitamogana, we'e natunavo 'ama 12 iaveta'ava 'atubuga. Tamu taima kebu taiadi 'ada miamia, we'e 'ama 'walaboda tamama taiadi i miamia 'awalawa Kenani.’

33 Tomogonina 'awalawanina 'ana toveimea i vonema i vo, 'Aku fata a na 'asetami, 'omi tomotoga ma 'ami vetumagana 'alo kebu. Mulieta i vonema i vo, tamu iami 'wa na baileni taiadi 'a na miamia, we'e 'omi matatabumi fekafeka 'wa na nawedi yami 'aila'avo i laselasega 'wa na 'ivaisedi. 34 We'e taimi 'ami 'walaboda 'wa na mieni 'waikuye, nika kwamananina 'wainega 'ana fata a na 'asetai 'omi tomotoga 'atumaimi, kebu 'wa da maia vetaui'wala faifaina. Nika 'ana fata taimi a na vevilai bega 'omi yavuyavumi 'wa na vevekimwane 'awalawa de'e nageneye.’ ”

35 Tutuyanina yadi venuana 'waidiega fekafeka i tatala'ewadi, 'aitamogana 'aitamogana yadi kileu ma baniumadi i veluagadi. Tatanavo tamadi taiadi maninidi i 'isedi ve'alakolokololo. 36 Iakobo natunavo i vonedi i vo, 'Omi igodi nuanuami natukwavo 'waikuyega 'wa na vinagodi. 'Wanogai, Iosefa wata Simioni 'asiau kebu taiadi ta da miamia, we'e tutuya de'e nuanuami Beniamina 'wa na naweni. Natukwavo, sauluvanina 'wa 'i'idewaiga 'waikuye, kebu sauluva 'atumaina.”

37 Mulieta Lubeni tamana i voneni i vo, 'Ai'edi Beniamina taiadi 'ana nunago 'edeye vita i na souyeni 'waineye, ma'itufa 'omu natukwavo 'adi 'ailuga 'u na luvewafadi. Wata Lubeni tamana i voneni i vo, Kwamananina yau 'ana to'isave'avina, we'e a vona'awaufaufa 'waimuye, natumu yau taiadi 'ana vilama 'ana mai.”

38 Siwe Iakobo i vo, Natuku kebu taiadi 'wa na nago. Tatana Iosefa 'akonadi i wafa, 'we'e taina kumanina nuaku 'ana tokiavesosoana. 'Ai'edi taiadi 'wa na nunago 'edeye tamu vita i na souyeni 'waineye, valana 'ana nogaiga, de'e 'aku taumata 'wa mimaieni nuavita 'wainega ma 'aku budula 'wa na ve'ufaku.”