1-2 Malamala 'ailuga i 'a'ava, mulieta Felo i 'enoneganega. 'Ana 'enoneganega 'waineye i veni taunina 'anununa i 'iseni i tovotovoi Ufa Naili lilivaneye, ufanina 'wainega 'aisaya bulumakau 'adi 7 tomogodi bikadi wata 'adi tubuga 'atumaidi ufayega i lakama, bega i velamu mosomoso i 'ani'ani. 3 Mulieta wata i 'isedi 'aisaya bulumakau 'adi 7 lumalumadi i lakama ufayega, ma fuedie i tovotovoi ufa lilivaneye. 4 Nika wata i 'isedi 'aisayanidi lumalumadi ediavo 'adi 7, kumanidiavo tomogodi bikadi wata 'adi tubuga 'atumaidi i 'anidi. I 'a'avana nika Felo i 'isa.

5 Yana 'eno 'ana veluga 'waineye, wata i 'enoneganega-vaitugana. I veni fekafeka 'adi 7 'adi 'isa 'atumaidi wata lukudi 'ala'alawidi we'e tolobwana 'aitamogana 'waineye, vuagidi tabodadi wata kumagidi. 6 Mulieta wata i 'iseni fekafeka 'adi 7 i 'etofiala fwayafwayayega, yegayegadi wata 'awagi'adi, tutuyanina kaukau yauyaugina bolimanayega i nunuga, i yagivebwavudi. 7 Fekafeka vuagidi yegayegadi wata luanalidi 'adi 7 fekafeka 'adi 'isa 'atumaidi tabodadi 'adi 7 i tononidi. 'Enoneganega matatabuna i 'a'ava, nika Felo i 'isa 'ana 'enoneganega i nuanidi, bega i vona i vo, De'e 'ana wagava 'enoneganega.

8 Dan 2:2Felo i 'enovilai bola 'awa'awaiogose, 'ana 'enoneganega i nuanidi i venua'ivinedi siwe kebu nuana i da magetai. Bega vala i vetunei me Itifita tove'wasa'wasala wata to'aseta bwaikidi matatabudi i mai 'waineye. Felo 'ana 'enoneganega i veifufuyedi tomotoganidi 'waidie siwe kebu tamu aitoi 'ana sala 'enoneganeganidi i na siviladi.

9 Mulieta ufa-oine 'ana to'anivelena i voneni i vo, 'Asiauotoga yaku yogosako a nuani bega a na veifufuyeni. 10 Tutuyanina 'waineye 'ani'ani 'ana to'anikabu wata yau 'u nuasakoyema, 'u yatoma tolumadu'ai yadi mata'ai'ai yana vanuga 'eba yogona 'waineye. 11 Tamu lovana 'waineye 'ama 'ailuga 'a 'enoneganega, we'e 'enoneganeganidi 'adi 'aseta tulina tulina. 12 Tutuyanina 'waineye tamu tomogo Ibeliu tubuauna taiadi 'a miamia, kumanina tolumadu'ai yadi mata'ai'ai yana tofolova. Bega 'ama 'enoneganeganidi, a veifufuyedi 'waineye nika 'adi 'aseta mogitana i kiavemagetadi 'waimeye. 13 Yana kiavemagetanidi 'adi mogitana i souyedi, yau 'u vevilaku yaku folova tuatuaina 'waineye, we'e tolugaviavo 'u veimeyedi 'ani'ani 'ana to'anikabu 'odona i boboi we'e tomogona i lutalauleni welavi 'waineye.”

14 I vona'a'avana Felo i veimea Iosefa i na mieni vanuga 'eba yogona 'wainega. Iosefa nagami fogena i taladabai wata 'ana talauma 'atumaidi i ve'wesenedi, i 'a'avana i vagavaia i naweni Felo 'waineye.

15 Felo Iosefa i voneni i vo, A 'enoneganega siwe kebu tamu aitoi 'ana fata 'enoneganeganina i da kiavemagetai 'waikuye, we'e 'ifwaidi tomotoga i voneku i vo, 'Omu 'amu fata 'enoneganega 'adi 'aseta mogitana 'u na kiavemagetadi.” 16 Iosefa ma yana ve'ililibu i tutula i vo, Yau kebu 'aku fataga, we'e Yaubada 'ana 'aseta mogitana i na sivemageseni 'waimuye bega nuafoumu i na vatu.”

17 Bega Felo Iosefa i voneni i vo, 'Aku 'enoneganega 'waineye, tauniku a 'iseku a tovotovoi ufa Naili lilivaneye. 18 Nika a 'isanago bulumakau 'adi 7 a 'isedi ufayega i lakama, 'adi 'isa 'atumaidi ma 'adi tubuga, i velamu mosomoso 'ala'alawidi i 'ani'ani. 19 Mulieta wata a 'isedi bulumakau 'adi 7 lumalumadi wata vivigidi ufayega i lakama ediavo mulidie. Yaku mia Itifita nageneye, kebu tamu tutuya bulumakau 'adi 'isa sakoidi bani'odi a da 'ise'isedi. 20 Bulumakaunidi 'adi sakoidi wata lumalumadi, bulumakau ma 'adi tubuga 7 i 'anidi. 21 Avinodi bulumakau 'adi 'isa sakoidi wata lumalumadi, we'e bulumakau ma 'adi tubuga i 'anidi, siwe kebu tamu 'adi 'isa i da sivedamana, 'asa'aiana 'adi 'isa'isanina bani'odi. 'Aku 'enoneganega i 'a'ava, nika a 'isa.

22 'Enoneganeganina 'waineye a 'iseniga, fekafeka vuagidi 7 'adi 'isa 'atumaidi wata tabodadi tolobwana 'aitamogana 'waineye i 'eno'enovi. 23 Mulieta wata 'adi 7 i ve'alatabotabo siwe 'awagi'adi wata yegayegadi, kaukau inala yana 'eba lakayega i nunuga i yayagidi nika i 'awagi'adi. 24 Fekafeka vuagidi luanalidi wata yegayegadi 'adi 7 i tovoi fekafeka vuagidi tabodadi wata 'atumaidi 'adi 7 i tononidi. 'Enoneganeganidi matatabuna a veifufuyedi tove'wasa'wasala wata to'aseta bwaikidi 'waidie, siwe kebu tamu aitoi 'ana fata i na kiavemagetadi 'waikuye.”

25 Iosefa Felo i voneni i vo, 'Enoneganeganidi 'adi 'ailuga we'e 'adi 'aseta i vesala. 'Akonadi Yaubada i sivemagesedi 'waimuye naninidi sai'afoga i na 'idewadi. 26 'Aisaya bulumakau 'adi 7 'atumaidi 'asa'aiana malamala 7 wata fekafeka 'adi 7 'atumaidi 'asa'aiana malamala 7, begaidi 'enoneganega 'adi 'ailuga siwe 'adi 'aseta i vesala. 27 We'e bulumakau lumalumadi 'adi 7 i souyediga 'ana 'aseta malamala 7. Wata bani'odi fekafeka 'adi 7 kaukau bolimanayega i yagivebwavudi, 'ana 'aseta malamala 7, malamalanidi nagedie loka bwaikina i na sousouyeni.

28 Naninidi a lu'ivoneyedi fai Yaubada taunina 'akonadi i sivemagesedi 'waimuye bega sai'afoga i na 'idewadi. 29 Malamala 7 nagedie malia bwaikina i na souyeni 'awalawa Itifita yana 'eba veimea matatabuna 'waineye. 30 We'e malia mulineye malamala 7 nagedie loka bwaikina i na souyeni bega Itifita yana fwayafwaya matatabuna i na lala, nika malia 'ana 'atumaina matatabuna ta na venuafania. 31 Fai loka bwaikaotogina i mimai bega yada fwayafwaya vuagina bwaikina kebu 'ada fata ta na nuanuani. 32 'Enoneganega 'ailuga i luvaituganidi 'waimuye fai Yaubada yana nuanua toketokena i yato-vagaseni bega sai'afotoga i na 'idewai.

33 Begaidi 'omu Felo i lubwainemu, tamu tomogo 'u da venua'ivineni yana 'aseta bwaikina wata yana nuanua magemagetana bega kumanina i da veto'isave'avina Itifita nageneye. 34 Wata 'ifwaidi to'edakumetavo 'u da yatodi bega malia 'ana malamala 7 'waidie to'aile'wa 'ani'ani kwau 5 i da 'etokwaudi, we'e kwau 'aitamogana i da 'ewai faifaimu. 35 Malia 'ana malamala 'waidie 'ani'aninidi i da talavetuadi bega i da vedodogidi yamu bubuwakeye 'atamana bwaikidi 'aitamogana 'aitamogana 'waidie wata i da veve'isabodeni. 36 Tutuyanina loka 'waineye malamala 7 nagedie i na maiga, 'ibuanina 'wainega me Itifita i na 'i'ivaiseda ta na miamia nika laseyega kebu ta na wafaga.”

37 Nuanuananidi Felo wata yana to'edakumetavo matatabudi 'waidie, 'adi nogaya 'atumai'avadi. 38 Bega Felo yana to'edakumetavo i vonedi i vo, A nuani kebu 'ada fata tamu tomogo Iosefa bani'odi ta na veluagai, tomogonina Yaubada 'anu'anununa 'waineye i miamia.”

39 Felo Iosefa 'waineye i vo, Fai Yaubada naninidi matatabuna 'akonadi i sivemagesedi 'waimuye, kebu tamu aitoi yana 'aseta wata yana nuamageta 'omu bani'odiga. 40 Fol 7:10Begaidi 'omu 'asa'aiana a venua'ivinemu 'u na veto'isave'avina yaku 'eba veimea 'waineye wata yaku tomotoga matatabudi yamu veimea i na vematayakeyakedi, we'e didiga 'ana ve'ililibu 'awalawa de'e 'waineye yau a mialaka mulieta 'omu.”

41 Wata i vo, Tutuya de'e 'wainega bega i na nagoga a venua'ivinemu bega 'u na veto'isave'avina 'awalawa Itifita matatabuna nageneye.” 42 Dan 5:29Felo 'ana didikumakuma nimanega i ta'ia bega Iosefa nimaneye i veagei, didikumakumanina Felo yana tugusa*Tugusanina 'eba 'isa Iosefa Felo 'ana wagavayega i veveimea. 'waineye i 'eno'eno. Tamu talauma 'ana 'isa 'atumaina wata 'ana tutula bwaikina 'ana wagava lineni i 'ewai bega 'wainega i ve'weseni. I 'a'avana, fwasalu golida 'wainega i 'idewaiga, i 'ewai 'odoneye i veagei.

43 Bega Iosefa i dodoga, 'eba vetalaga 'ana waka-yo'eyo'e 'waineye, i lililide we'e mulineye tomotoga 'aila'a i vevegolegole i vo, 'Wa na 'odu 'waineye!” Fai Felo veimea i veleni Itifita 'awalawa matatabuna i na veimeyeni. 44 Bega Felo Iosefa i voneni i vo, Yau Felo, veimea a velevelemu Itifita 'awalawa matatabuna 'u na veveimeyeni, siwe kebu tamu aitoi a da tauyeni taunina yana nuanuayega i na lakatagonimu, fai veimea 'ana didiga 'aiseotogimu 'ana toveimea.”

45-46 Felo Iosefa 'ana wagava 'ivauna i goleni me Itifita 'adi wagava 'wainega Safaneati-Fainea,†Safaneati-Fainea me Itifita bonadi 'ana saivila, Yaubada i miamia wata i vonavona. mulieta Fotifela natuna Aseneati i venagia, 'awalawa Itifita matatabuna kumanina 'atamana Oni 'ana tovelomu. Iosefa 'ana malamala 30 i veluagai mulieta folova i velamu Felo 'waineye, 'awalawa Itifita matatabuna i veveimeyeni.

47 Malamala 7 nagedie Itifita i malia 'ani'ani 'wainega. 48 Bakula 'aitamogana 'aitamogana 'waidiega 'ani'aninidi i talavetuadi i nawedi bega 'atamana 'aitamogana 'aitamogana yana bubuwakeye i vedodogidi. 49 Iosefa lu'iawawa i 'ailove fai 'ani'ani bwaikaotogina, lu'iawawa-wayoga bani'odi wala'ai 'ana 'ilukulukuta.

50 Tutuyanina 'waineye, bola loka kebu i da velamu, Iosefa natunavo 'adi 'ailuga i tubuga. Yana vavine 'adi wagava Aseneati, tamadi tovelomu 'ana wagava Fotifela, 'atamana Oni 'wainega. 51 Iosefa natuna 'ana wagava i goleni Manasa, wata i vo, Fai tamaku yana vanuga 'ana tomia wata yau 'ama vita matatabuna Yaubada i 'ewa-yavuledi wata 'a nuatavunidi.” 52 Iosefa natuna bwasiona 'ana wagava i goleni Ifeleimi, wata i vo, Fai 'awalawanina 'waineye a miamiaga yaku mia vitana i 'ewayavuleni, we'e Yaubada yaku mia i luve'ivauya.

53-54 Fol 7:11Itifita yana malia malamala 7 i nago 'ana 'eba ve'a'ava 'waineye nika loka bwaikina i velamu, 'asa'aiana Iosefa yana lu'ivona bani'odi. Loka bwaikina i souyeni fwayafwaya matatabuna 'waidie, we'e 'awalawa Itifita 'waineye 'ani'ani i 'eno'eno. 55 Ion 2:5Tutuyanina loka Itifita i susuli, tomotoga i velamu Felo 'waineye i vevelu'ui-nuakalikali 'ani'ani faifaina. Siwe Felo me Itifita matatabudi i vonedi i vo, 'Wa na nago Iosefa 'waineye wata ava'ai i na voneyeniga 'wa na 'idewadi.”

56 Iosefa bubuaka i yavudi bega 'ani'ani i velamu i vevekimwane me Itifita 'waidie fai 'ani'ani i 'a'avaotoga. 57 Fwayafwaya matatabuna 'waidiega tomotoga i mai Itifita, 'ani'ani i na kimwane Iosefa 'wainega fai yadi 'awalaweye loka bwaikina i souyeni.