1-2 Tamu tutuya Felo 'ana ufa-oine 'ana to'anivelena wata 'ani'ani 'ana to'anikabu i vesauluva-sako Felo 'waineye bega i nuasako yana tofolovavonidi 'waidie. 3 I yatodi vanuga yogona nageneye bei Iosefa i miamia 'waineye, 'eba yogonanina tovemata'ai'ai yana vanuga bwaikina nageneye. 4 Tovemata'ai'ainina Iosefa i voneni tofolovanidi 'adi 'ailuga i na 'i'isave'avinidi, tutuya manamanawena bei i miamia.

5 Bola i miamia vanuga 'eba yogona 'waineye, tamu lovana 'waineye ufa-oine 'ana to'anivelena wata 'ani'ani 'ana to'anikabu Felo faifaina i 'enoneganega, 'adi 'enoneganeganidi 'adi 'aseta tulina tulina. 6 I 'atai, Iosefa i mai 'waidie, i 'isedi nuafoudi i veviga. 7 Iosefa i velutoliedi i vo, Awale 'wa nunuavita?”

8 Iosefa yana vona i tutuli i vo, 'Ama 'ailuga 'a 'enoneganega siwe kebu tamu aitoi 'ana fata 'adi 'aseta mogitana i na vonema.”

Iosefa i vo, Yaubada 'aisena 'enoneganega 'adi 'aseta i na voneda. 'Ami 'enoneganeganidi 'wa na lu'ivoneyedi 'waikuye.”

9 Bega ufa-oine 'ana to'anivelena 'ana 'enoneganega Iosefa 'waineye i veifufuyeni i vo, A 'enoneganega i veku, welavi kalefa manawakuye i tovotovoi. 10 Welavinina didina 'aitonu, i lukulukuta nika idina i fua i nagoga vuagidi walo bwaikidi. 11 Wata i veku Felo 'ana vedi nimakuye, bega welavinina vuagina a kadidi a tanidi i obu 'ana vedie mulieta oine ma vedina a veleni.”

12 I vona'a'ava Iosefa i vo, 'Amu 'enoneganega 'ana 'aseta side bani'odi, welavi didina 'aitonu 'ana 'aseta 'aiata 'aitonu. 13 'Aiatanidi 'aitonu i na 'a'ava i na yavumu vanuga 'eba yogona 'wainega i na silakaimu i na vevilamu yamu folova tuatuaina 'waineye. Bega ufa-oine ma vedina 'u na 'i'idewadewai Felo faifaina 'u na veleveleni basenadi bani'odi. 14 'Awaie yamu 'atumaina 'u na veluagaiga nuanuaku 'u da nuanuaniku, ava'ai a 'idewai faifaimu 'u na lu'ivoneyeni Felo 'waineye bega i na yavuku a na souyeku vanuga 'eba yogona 'wainega. 15 Yau tomogo Ibeliu yaku 'awalaweye a miamia nika 'ifwaidi tomotoga i vinagoku i mieku Itifita i vekimwaneyeku. Tutuya de'e a miamia vanuga yogona nageneye, siwe kebu tamu yaku sakonaga bega vita de'e a veluagai.”

16 Tutuyanina 'ani'ani 'ana to'anikabu i nogai iana 'ana 'enoneganega 'ana 'aseta 'atumaina, Iosefa 'waineye i vo, Yau wata a 'enoneganega side bani'odi i veku. Bayawa 'aitonu ma 'ani'aninidi a gabagabadi. 17 Tamu bayawa tabwaneye 'ani'ani kabukabunidi tulina tulina nagedie Felo faifaina siwe manuga i maia i 'ani'anidi.”

18 Iosefa i voneni i vo, 'Amu 'enoneganega 'ana 'aseta side bani'odi i vemu, bayawa 'adi 'aitonu 'ana 'aseta 'aiata 'aitonu. 19 'Aiatanidi 'aitonu i na 'a'ava Felo i na veimea 'unu'unumu i na silakai 'odomu i na boboi we'e tomogomu i na lutalauleni welavi 'waineye, manuga fuedi i na maia vovomu i na 'ani'ania.”

20 Iosefa i vona'a'ava, mulieta 'aiata 'aitonu i 'a'ava, Felo yana 'aiata tubuga 'ana 'eba nuave'avina 'waineye sakali bwaikina i 'idewai yana tofolovavo faifaidi. Felo i veimea, ufa-oine 'ana to'anivelena wata 'ani'ani 'ana to'anikabu i miedi 'waineye. 21 Felo ufa-oine 'ana to'anivelena i silakai i vevilai yana folova tuatuaina 'waineye bega ufa-oine ma vedina i na mimaieni i na veleveleni. 22 We'e Felo i veimea 'ani'ani 'ana to'anikabu i luvewafai i lutalauleni welavi tabwaneye nika ava'ai Iosefa i voneyeniga 'ana mogitana i souyeni 'waineye.

23 Ufa-oine 'ana to'anivelena nuana i fani kebu tamu sai'afo Iosefa yana nuanua i da 'idewaiga.