1 Tutuyanina me Isimeli Iosefa i vagavaia i naweni Itifita, i vekimwaneyeni tamu tomogo 'ana wagava Fotifali 'waineye. Tomogonina i vetomata'ai'ai Felo*Felo 'asa'aiana Itifita 'ana kini yana tolumadu'ai i 'e'edakumesedi Itifita nageneye. 2 Fol 7:9Iosefa i vetofolova-maimaiga Fotifali faifaina, we'e i miamia yana vanuge, 'Auvea Iosefa i 'i'isave'avini bega yana folova 'atumai'avadi nani matatabuna 'waidie. 3 Fotifali i 'iseni bega i 'asetai 'Auvea Iosefa taiadi i miamia wata yana 'aivaita 'wainega Iosefa i folova-'atumai nani matatabuna 'waidie. 4 Fotifali i sosoaneni wata ma 'ana vetumagana bega i silakai yana tofolova kumekumetana, i veto'isave'avina yana vanuga wata yana kukua matatabuna 'waidie.

5 Tutuyanina 'waineye Fotifali nani matatabuna i 'anivelenedi Iosefa 'waineye i na 'i'isave'avinidi, nika Iosefa faifaina 'Auvea i vevesauluva 'atumaina tomogonina yana 'aila'a wata yana kukua matatabuna 'waidie, yana vanuga nageneye wata yana bakule. 6 Fotifali nani matatabuna i Iosefa nimaneye i yatodi i na veveimeyedi, kebu tamu ava'ai faifaina i da nuanua, 'ani'ani 'aisena faifaina i vevenua'ivina.

Iosefa tomogo toketokena wata ma 'ana magisisi. 7 Mulieta Fotifali yana vavine i nuagiva bunu 'ana nuanua sakoina faifaina, i velu'uieni nuanuadi Iosefa taiadi i na 'eno.

8 Siwe i baila wata i vonedi i vo, 'Aku toveimea nani matatabuna faifaidi i vetumaganeku a 'i'isave'avinidi, kebu tamu ava'ai faifaina i da nuanua. 9 Kebu tamu aitoi vanuga de'e 'waineye i da mialaka 'waikuyega, 'aiseotogiku 'aku tauya fai kebu tamu ava'ai i da talabodeni 'waikuyega, we'e 'omi 'aisemi kebu 'aku tauyaga fai yana vavine. Kebu i da lubwaineku sauluva sakoina a na 'idewai bega a na sakona Yaubada mataneye.” 10 Tutuya fuedi Iosefa i lulukakadeni bunu 'ana nuanua sakoina faifaina siwe Iosefa i baila-'afo'afo.

11-12 Tamu 'aiata 'waineye kebu tamu aitoi i da miamia vanuge, Iosefa i luku i na folova faifaina, nika bei Fotifali yana vavine Iosefa 'ana talauma i 'ive'avini i vo, Taiadi ta na 'eno.” Iosefa i lufelefeledi i dega i obu 'atamane 'ana talauma'ava i sieloi.

13-14 Tutuyanina i 'asetai 'akonadi i dega i obu 'atamane, we'e talaumanina nimadie, i vevegolegole yadi tofolova-maimaiga 'ifwaidi i maia 'waidie i vo, 'Wa 'iseni, yama lamoga tomogo Ibeliu i vagavaia i mieni 'waideye siwe i 'ivebunumayagida. I mai yaku tutudaba 'waineye igodi i da 'ive'avinima bunu 'ana nuanua faifaina siwe 'a toke a vegolegole. 15 I nogai a vevegolegole 'aivaita faifaina, i dega 'ana talauma i 'iaweni.”

16 Talaumanina i 'ewaiga i kiave'avini 'ana tugusa Fotifali i vilai i mai vanuge. 17 Bega valanina i veifufuyeni 'waineye i vo, 'Omu tomogo Ibeliu 'u mieniga i luku 'waimeye nuanuana i da 'ivebunumayagima. 18 Igodi i da 'ive'avinima a toke a vevegolegole 'ana talauma i 'iaweni i dega i obu 'atamane.”

19 Tutuyanina yana vavine i lu'ivona ava'ai i souyeniga 'waidie, Fotifali i nuasako-'afo'afo. 20-21 Fol 7:9Bega Iosefa i 'ive'avini i naweni vanuga 'eba yogona 'waineye, bei Felo tosakona i yogoyogonidiga 'waineye.

Bei vanuga 'eba yogonanina nageneye Iosefa i miamia, 'Auvea i 'i'isave'avini wata ma yana nuakalikali i vevesauluva 'atumaina 'waineye, we'e vanuga 'eba yogona 'ana to'isave'avina i 'iseni i awave'atumaieni. 22 Bega Iosefa i silakai i vetoveimea enavo 'ifwaidi 'waidie wata i veto'isave'avina nani matatabuna 'waidie. 23 Vanuga 'eba yogona 'ana to'isave'avina kebu tamu nani faifaina i da nuanua Iosefa yana 'eba veimea 'waineye fai 'Auvea Iosefa taiadi i miamia wata yana 'aivaita 'wainega Iosefa i folova-'atumai nani matatabuna 'waidie.