1 Iakobo i miamia Kenani 'waineye, basenadi bei tama9na i vewakawaka. 2 Iakobo ma natunavo ifuifufudi side bani'odi.

Iosefa i vetubuau 'ana malamala 17, 'aisaya sifi wata goti i 'i'isave'avinidi gidegideye tatanavo taiadi, kumanidiavo tamana yana vevinevo Bilani wata Silifa natudiavo. Yadi sauluva sakoina valana Iosefa i lu'ivoneyeni tamadi 'waineye.

3 Iakobo natuna Iosefa i nuakalikalieni bwaikina we'e tatanavo 'ifwaidi sai'afo, fai yana ve'auvea 'waineye kwamananina i tubuga. Tamana talauma 'ana 'isa 'atumaiotogina i 'idewai Iosefa i veleni. 4 Tatanavo i 'iseni i 'asetai tamadi Iosefa i nuakalikalieni bwaikina we'e tatanavo 'ifwaidi sai'afo, begaidi tatanavo i vedumwe'ai'aieni i luluvuleweni, kebu nuanuadi taiadi i na veveifufuga.

5 Tamu lovana 'waineye Iosefa i 'enoneganega bega 'ana 'Enoneganeganina i veifufuyeni tatanavo 'waidie. Tutuyanina tatanavo i nogai, kamodi i ogala nika i toke i vedumwe'ai'aieni. 6 Iosefa i vonedi i vo, Nuanuaku 'aku 'enoneganega 'wa na vinenegeni. 7 I veku yada tanoga 'waineye witi ta 'i'ifafafa, nika a 'iseni yaku fafa ma 'itavina i luafwalagi i tovotovoi, we'e 'omi yami 'itava matatabuna yaku 'itava i miafifineni ma yadi ve'ililibu i 'odu'odu 'waineye.”

8 Tatanavo i voneni i vo, Igodi 'omu nuanuamu 'u na vetoveimea 'waimeye?” 'Ana 'enoneganega i noganogai wata ava'ai i voneyeniga, begaidi tatanavo i vematakilekileni.

9 Lovananina Iosefa wata i 'enoneganega-vaitugana i 'atai tatanavo 'waidie i veifufu i vo, 'Wa vainenega, tamu 'aku 'enoneganega 'ana veifufuyeni, tutuya de'e inala, weta'i wata 'ubwana 11 i na 'odu'odu 'waikuye.”

10 Mulieta Iosefa i veifufuyeni tamana wata tatanavo 'waidie, nika tamana i talabodeni i vo, 'Amu 'enoneganega 'ana 'aseta bani'odi? 'U da nuani inamu, yau wata tatamwavo a na 'odu 'waimuye?” 11 Tutuyanina tatanavo i nogai i ve'unumagigieni, we'e tamana nuana i 'ivi'ivina i vo, 'Enoneganeganina 'ana 'aseta ava'ai?”

12 Tamu 'aiata Iosefa tatanavo i nagoi Sekemu tamadi yana 'aisayavo i 'i'isave'avinidi. 13 Iakobo natuna Iosefa i voneni i vo, Nuanuaku 'u na nago Sekemu tatamwavo 'aisaya i 'i'isave'avinidi 'u na fogedi.”

Iosefa i vo, Tamaku 'atumaina, a na nago.”

14 Tamana i vo, 'U na nago tatamwavo 'u na fogedi bega 'u na 'asetai yada 'aisayavo taiadi 'atumaidi 'alo kebu? Valadi 'u na mieni 'u na voneku.” Nika Iosefa i tauya Ebiloni Laube'uneamo i nago i le'wa Sekemu.

15 Tamu tomogo Iosefa i veluagai i yabayaba 'awalawanina 'waineye i velutolieni i vo, Ava'ai 'u lulualeni?”

16 Iosefa i vo, Tatakwavo a lulualedi. 'U da 'asetai, ava'aibe tatakwavo 'aisayavo i 'i'isave'avinidi?”

17 Tomogonina i vo, 'Akonadi 'awalawa de'e i 'iaweni, fai a nogai i vo, Ta na tauya de'e bega ta na nagoi 'awalawa Dotani.” Iosefa i tauya tatanavo mulidie i nagoga nika i veluagadi Dotani.

18 Tutuyanina i 'isanaweni i mimai sai'afoga i na le'wa 'waidie, nika 'aise'avadi givagivayega i veifufu taidi 'ana 'ainike faifaina. 19 Ma ediavo i vo, 'Wa 'isanaweni, to'enoneganega i mimai 'waideye. 20 'Wa tovoi ta na nikei ta na taweni i na obu ovuye, i na 'a'avana ta na nago tamada 'waineye ta na veifufu ta na vo, 'Aisaya walawala'ai kasikasisina i ovai.’ 'Ai'edi i na wafaga kebu tamu sai'afo 'ana 'enoneganeganidi 'adi mogitana i na souyedi.”

21-22 We'e Lubeni enavo yadi veifufu i nogai nuanuana Iosefa i na 'ita'ita'ieni. Bega i vonedi i vo, Kebu ta na luvewafaiga wata nimadega kebu dayagina i na ilolo, we'e side bei sali'avu'avuye ta na taweni i na obu ovuye.” Lubeni bani'odi i voneyediga fai nuanuana Iosefa i na 'ita'ita'ieni tainavo 'waidiega bega i na vevilai tamana 'waineye.

23-24 Tutuyanina Iosefa i le'wa, tatanavo i 'ive'avini 'ana talauma 'ana 'isa 'atumaina i sita'ia, i taweni i obu ovuye, ovunina lalana wata nage'avana.

25 Nika i miabui i velamu i na ve'ala'ani, i 'isanago me Isimeli 'ifwaidi i 'isanawedi i mimai 'awalawa Giliadi 'wainega. Tomotoganidi tovekimwane ma yadi 'aisayavo kameli, kwavudie 'ani'ani 'ana 'eba 'ive'iwana wata vane magaidi 'atumaiotogidi i vedodoga, i obuobu Itifita vekimwane faifaina.

26 Nika luda i vona enavo 'waidie i vo, Ava'ai 'ana 'atumaina taida ta na luvewafai wata vovona ta na giveni? 27 Kebu ta na nikeiga fai taida, 'ida dayaga 'aitamogana, we'e ta na vekimwaneyeni me Isimeli 'waidie.” Nika Iuda yana nuanuananina enavo i awave'atumaieni. 28 Fol 7:9Tutuyanina tovekimwanenidi*'Ana mogitana vona Ibeliu 'waineye me Midiani, tamu me Isimeli 'adi wagava. i le'wai, tatanavo i nago Iosefa i silakai ovuyega i mieni i vekimwaneyeni 'waidie 'ana tutula siliba 20, nika me Isimeli i 'ewai i naweni Itifita.

29 Tutuyanina Lubeni yabayega i le'wa, i nago ovunina Iosefa bei i miamiaga i 'isa'avai. Lubeni nuana i vekalikalia nika taunina 'ana talauma i silabu'i. 30 I vilai i mai tainavo 'waidie i vo, Iosefa no'o kebu, ovu nage'avana, bani'odi a na veifufuyedi?”

31 Nika 'aisaya goti i nikei dayaginega Iosefa 'ana talauma i lusamasamali. 32 I 'a'avana talaumanina i 'ewai i naweni tamadi 'waineye i veni i vo, De'e talaumanina 'a veluagai, 'u da 'iseni, de'e natumu 'ana talauma 'alo aitoi?”

33 Tamadi i 'isa'inanai mogitana Iosefa 'ana talauma bega i vo, 'Asa'aiana kumanina. A 'asetai 'akonadi 'aisaya walawala'ai i sitototogi i 'ania.” 34 Ma yana nuavita bwaikina Iakobo 'ana talauma taunina i silabulabu'i, talauma sakoina i ve'weseneni bega tutuya manamanawena natuna faifaina i vevemogai.

35 Natunavo matatabudi iavetadi wata vevinedi i maia nuanuadi tamadi nuana i na 'iveololoi siwe i baila kebu nuanuana. Bega i vo, Natuku faifaina a na vevemogai i na nagoga 'ana tugusa yawaiku i na 'a'ava.” Yana nuavita natuna faifaina kebu tamu sai'afo i da 'a'ava.

36 Tutuyanina 'waineye me Midiani i le'wai Itifita, Iosefa i vekimwaneyeni Fotifali kini Felo yana vanuga 'ana tolumadu'ai 'adi to'edakumeta 'waineye.