Ludi
1
Elimeleki ma yana 'aila'avo i nagoi 'awalawa Moabe
1 Tutuyanina To'edakumetavo bwaikidi ma 'adi ve'ililibu 'awalawa Isileli i veveimeyeni, loka bwaikina i souyeni 'awalawanina matatabuna 'waineye. Begaidi tamu tomogo Bedeliema 'awalawa Iudia nageneye, yana vavine, natunavo iavetadi 'adi 'ailuga yadi 'atamana i 'iaweni i nagoi 'awalawa Moabe bei sai'afo i na yogo mia. 2 Tomogonina 'ana wagava Elimeleki, yana vavine Naomi wata natudiavo 'adi 'ailuga Maloni wata Kilioni. Taunidi me Efaleti 'atamana Bedeliema 'wainega, 'awalawa Iuda nageneye. Tutuyanina i le'wai 'awalawa Moabe bei i mia.
3 Bei i miamia nika Elimeleki yawaina i 'a'ava, bega Naomi natudiavo iavetadi 'aisedi taiadi i miamia. 4-5 Natudiavo 'adi 'ailuga me Moabe vevine taiadi i nagi, tamu vavine 'adi wagava Ofa, we'e tamu 'adi wagava Ludi. I miamia mulieta malamala 10 i 'a'ava Maloni wata Kilioni yawaidi i 'a'ava, bega Naomi 'aise'avadi i miamia.
Naomi wata Ludi i viladi i nagoi yadi 'atamane
6 Tutuyanina Naomi i miamia 'awalawa Moabe 'waineye, vala i nogai 'Auvea ma yana nuakalikali i vesauluva 'atumaina me Iuda 'waidie, bega 'ani'ani bwaikina i veledi. Begaidi Naomi ma lawadiavo i 'idewadewa Moabe i na 'iaweni i na viladi Iuda yadi 'atamane. 7 Lawadiavo 'adi 'ailuga taiadi 'atamananina i 'iaweni, Iuda 'ana 'eda 'waineamo i nagoi.
8 'Akonadi i yogokamwana, Naomi lawadiavo i vonedi i vo, 'Ami 'ailuga 'wa na vilami inamiavo yadi 'atamane. Fai nuanuama 'Auvea i da tutulimi yami lalamogavo wata yau 'wa 'isave'avinimaga faifaina. 9 Wata'Auvea i da vesauluva 'atumaina 'waimie, bega 'wa da nagi-vaitugana yami lalamogavo 'atumaidi i da 'isave'avinimi.” Nika 'adi 'ailuga i yaogidi i 'alanuaidi wata matatabudi i 'odu taibwaubwau. 10 Wata lawadiavo i vo, Kebu, nuanuama taiadi ta na nago yami 'aila'avo 'waidie.”
11 Siwe Naomi i vo, Ava'ai faifaina nuanuami taiadi ta na nagoi? 'Wa da nuani, i lubwainema wata iaveta 'ana venatunedi bega i na taulai taiadi 'wa na nagi? 12 Kebu natukwavo, nuanuama 'wa na vilami tamamiavo wata inamiavo yadi 'atamane. Fai yau 'akonadi 'a vemo'ai bega kebu 'ama fata 'a na nagi-vaitugana. 'Ai'edi yama lamoga taiadiga, lovane 'ada veluaga bega 'a da mianaga, kwakwama iavetadi i da tubuga, 13 we'e 'wa da nuani, 'ami fata faifaidi 'wa na lulukamata, 'alo 'wa na nagi? A nuani kebu. 'Omi mogitana yami lalamogavo yawaidi i 'a'ava, siwe yami nuavita sai'afo.” Yau vita bwaikaotogina 'a veveluagai fai 'Auvealuluma i tubaibaia.
14 I veifufu 'a'ava, nika matatabudi i taibwaubwau, mulieta Ofa yadi bwa i 'avalamaigidi i yaogidi wata i 'alanuaidi. We'e Ludi yadi bwa i lumata'wanedi. 15 Naomi i vo, 'Wa 'iseni, maluemi 'akonadi i viladi i nago yadi 'aila'avo wata yadi yaubadavo 'waidie. 'Omi wata bani'odi 'wa da vilami.”
16 Siwe Ludi i vo, Kebu 'wa na lukakadema bega 'a na vilama. Ava'aibe bei 'wa na nagoga, yau wata taiadi. Ava'aibe bei 'wa na miaga, yau wata bei. 'Omi yami 'aila'avo, wata kumanidiavo yau yama 'aila'a, wata yami Yaubada, ma fueda yada Yaubada. 17 'Ai'edi ava'aibe bei yawaimi i na 'a'avaga, yau wata bani'odi, bei i na ve'ufama. 'Ai'edi yama vona'awaufaufanina a na geuya 'Auvea i da vematavulogima. We'e wafa 'wainega i na vemia'idieda.” 18 Tutuyanina Naomi i 'asetai Ludi yadi nuanua mogitana i tauyeni taiadi i na nago, begaidi lukakada i 'ailove.
19 Bega vevinenidi 'adi 'ailuga i tauya i nagoi i le'wa Bedeliema. Tomotoga fuedi i sosoana yadi le'wa faifaina wata 'ifwaidi vevine i velutoli i vo, 'Wa da 'isedi, mogitana Naomi 'alo aitoi?”
20 Yadi vona i tutuli i vo, Kebu 'ama wagava 'wa na 'inanai 'wa na vo, Naomi,’ fai Yaubada Toketokeotogina yama mia i 'ivegolai, begaidi 'wa na golema 'wa na vo, Mala*Mala 'ana 'aseta Golana.’ 21 Tutuyanina 'a tauya 'a nunagoga nani matatabuna 'ama fata, we'e 'Auvea i vagavaima 'a mai yama 'atamane nima'ava'avama. Kebu i da lubwaineni 'wa na golema Naomi, fai 'AuveaKumanina toketokeotogina 'ama vita i 'imoso'ieni.”
22 Begaidi Moabe 'wainega Naomi i viladi yadi 'atamane, we'e Ludi vavine Moabe yadi bwa i 'weabudi i nagoi Bedeliema. Tutuyanina 'waineye, bali 'ana 'aile'wa i velamu kumanidiavo i le'wai.