2 Tamu 'aiata, Ludi vavine Moabe Naomi i vonedi i vo, 'Wa da tauyema 'a da nago 'aile'wa 'ana bakula 'waidie, 'ai'edi tamu aitoi i da 'isanuakalikaliemaga, i da tauyema bali vuagidi ma toutoudi i bailediga, 'a da kwakwa.”

Naomi i vo, 'Atumaina natuku, 'wa na nago.” 3 Bega Ludi i souyedi i nago to'aile'wa mulidie bali vuagidi i na kwakwadi. Tutuyanina 'waineye be'ama i 'asetai bakulanina 'waineye i folofolovaga, Bwasa yana bakula, kumanina lawadi Elimeleki tamu yana 'aila'a.

4 I miamia nika Bwasa i le'wa Bedeliema 'wainega, yana bakula 'ana to'aile'wa 'waidie i vekaiwa i vo, 'Auvea i da vesauluva 'atumaina 'waimie.” Yana tofolovavo matatabudi i vo, 'Omu wata bani'odi 'Auvea i da vevesauluva 'atumaina 'waimuye.”

5 Nika Bwasa i velutoli yana tofolova 'adi to'edakumeta 'waineye i vo, No'o vavine tubuvauvauna aitoi? Wata aitoi 'ana to'isave'avina?”

6 Yana velutoli i tutuli i vo, Vavine Moabe, Naomi taiadi i viladi i mai 'a miamia. 7 Kumanidi 'asiau 'awa'awaiogose i mai i vonema i vo, Nuanuama 'wa da tauyema to'aile'wa mulidie bali vuagidi 'a da kwakwa.’ Tutuyanina 'waineye folova i velamu i maiga, ma yadi 'idumwebika i toke i folofolova we'e vadavada 'waineye i na veawaiga, tutuya 'ale'usana.”

8 Bega Bwasa i nago Ludi i vonedi i vo, Natuku, 'wa na vainenega a na vonemi. 'Omi taiadi ta na miamia side bei, bali vuagidi 'wa na kwakwakwa, we'e kebu 'wa na nago mali bakula 'waidie. Nuanuaku ne'e'ela taiadi 'wa na miamia, yaku bakule 'wa na folofolova. 9 Mulieta folova 'wa na velamu, nagami iaveta 'wa na 'isedi, ava'aibe bei i na 'a'aile'waga, 'wa na yogo'wailidi. We'e iaveta 'akonadi a vonedi kebu i na kia'wayo'wayogimi. Wata 'ai'edi 'wa na veufa'ani'anigokuga, ovu alaalana 'wainega ufa i koiaga 'wa na yemu.”

10 Ludi ma yadi ve'ililibu i lumata'afufu Bwasa 'ageneye ma yadi sosoana i vekaiwa 'waineye i vo, Kebu 'ama fata yamu nuakalikali 'a na tutuli, yau fai vavine wakawaka.”

11 Bwasa i vo, Valami a 'asetai tutuyanina yami lamoga i yawaina i 'a'ava, lawami 'wa nuakalikaliedi bwaikina nani matatabuna 'waidiega. Wata valami a nogai Tamami, inami wata yami 'atamana 'wa 'iawedi 'wa mai tomotoganidi kebu 'wa da 'asetadiga, taiadi 'wa miamia. 12 'Omi 'wa maiga, 'wa na ve vanuga 'Auvea me Isileli yadi Yaubada fafenega i veve'i'wa'uyemi, bega tutula 'eno'eno-vagaina 'wa na veluagai yami folova 'atumaina faifaina.”

13 Ludi i vo, Yama 'auvea 'omu 'ama to'aivaita mogitana. Avinodi yau kebu yamu tofolovaga, siwe yamu veifufu bikadiega nuama 'u 'iveolooloi.”

14 Mulieta 'ani i na velamu, Bwasa vavine i tayegidi i vo, 'Wa mai side bei, taunimi 'wa na 'ivaisemi 'ani'ani 'wainega. 'Ami beledi 'wa na lu'utuvi oine yuyuna 'waineye.” Bega Ludi i nago bakula 'ana to'aile'wa taiadi i miabui, Bwasa bali kabukabunidi i veledi i na 'ani. 'Ani'aninidi nuanuadi matatabuna i 'anidi, siwe wata i 'anivegalaladi.

15 Tutuyanina Ludi i viladi folova faifaina, Bwasa yana tofolovavo i vonedi i vo, 'Wa na tauyedi i na folofolova 'aila'a 'awasasadie, we'e kebu 'wa na talabodedi. 16 Wata 'wa na nagoi 'itava 'aitamogana 'aitamogana 'wainega bali ma touna 'wa na siyo'ei 'wa na ve'anita'idi vavine yadi 'eba folova, wata kebu 'wa na talabodedi.”

17 Bega Ludi 'aiata matatabuna i folova bali talagina 'waineye i nagoga i lovani. Lovananina 'waineye, bali biladi i tutudi bayawa 'aitamogana i veadagi. 18 Bayawa i gabai i viladi i nago 'atamana bwaikina 'waineye, tutuyanina i le'wa lawadi i vedi, wata bani'odi bali kabukabunidi i veledi.

19 Naomi i velutoli i vo, 'Asiau ava'ai bakulaga 'waineye 'wa kwakwa? Wata ava'aibe bei 'wa folova? Tomogonina i 'ivaisemiga, 'Auvea i da vevesauluva 'atumaina 'waineye.”

Bega Ludi i veifufu lawadi 'waidie tomogonina yana bakule 'asiau i folovaga faifaina, i vonedi i vo, Tomogonina 'asiau yana bakule taiadi 'a folovaga 'ana wagava Bwasa.”

20 Naomi lawadi Ludi i vonedi i vo, Nuanuama 'Auvea i da vesauluva 'atumaina 'waineye, fai ma yana 'isanuakalikali i veve 'waideye ma yana tokemaiga. Wata i vona i vo, Tomogonina tamu yada 'aila'a 'ada to'aivaita.”

21 Bega Ludi vavine Moabe i vona i vo, Yau wata bani'odi i vonema i vo, Yaku tofolovavo taiadi 'wa na miamia, 'ana tugusa witi 'ana 'aile'wa matatabuna i na 'a'ava.”

22 Naomi lawadi Ludi i vonedi i vo, 'Omi i lubwainemi vevine taiadi 'wa na nagoi Bwasa yana bakule 'wa na folova. We'e 'ai'edi tamu aitoi yana bakule 'wa na folovaga, voke 'ako vita 'wa na veluagai.”

23 Bwasa yana tofolovavo vevine Ludi taiadi i luvetubama i folofolova, 'ana tugusa bali wata witi 'adi 'aile'wa i ve 'a'ava.