3
Ludi wata Bwasa taiadi i veifufu
1 Tamu 'aiata Naomi lawadi i vonedi i vo, Natuku, i lubwainema yami 'eba mia 'atumaina 'ana lauala 'ana veluagai nika tamu aitoi i na 'i'isave'avinimi. 2 Bwasa tamu yama 'aila'a taiadi 'a miamia, wata kumanina tomogo 'atumaina, fai i tauyemi bali vuagidi yana tofolovavo vevine tubuvauvaudi taiadi 'wa na kwakwa. Lovane i na nago 'eba 'aitutu 'waineye bali vuagidi i na tutudi. 3 'Asiau ava'ai 'ana vonemiga, 'wa na vematayakeyakeni. Nagami 'wa na toa, bunama magaina 'atumaina 'wainega tomogomi 'wa na kiavesilisililia, wata 'ami talauma 'atumaina 'wa na ve'weseneni, mulieta 'wa na obu 'eba 'aitutu 'waineye. Siwe 'wa na giva-dewa, nika Bwasa kebu i na 'isemiga, nagami i na 'ani wata i na yemu. 4 Mulieta 'wa na nago, siwe nagami yana 'eba 'eno 'wa na 'asetai, nika 'ami fata 'wa na nago yana velu'uva 'agenega 'wa na sidadei, lilivaneye 'wa na 'ufobala. 'Ai'edi ava'ai yana nuanuana faifaina i na vonemiga, yana vona 'wa na vematayakeyakeni.”
5 Ludi yadi veifufu i tutuli i vo, 'Atumaina 'ako yami awave'eda'eda 'ana vetutuyameni.” 6 Bega lovane i obu 'eba 'aitutu 'waineye, lawadi yadi veifufu matatabuna i vematayakeyakeni.
7 Bwasa i 'ani wata i yemu, 'ana vebae i ve'atumai, mulieta i nago 'waududuye bali kwauna lilivaneye i 'ufobala. I 'eno'eno, Ludi i vaimwaimwa i le'wa velu'uva 'agenega i sidadei lilivaneye i 'ufobala. 8 Lovana 'ana utukamwana 'waineye, Bwasa i 'isa i sivilai tamu vavine i 'iseni 'ageneye i 'eno'eno, nuana i vogani. 9 Bega Bwasa i velutoli i vo, 'Omu aitoi?” I nogayeni i vo, Yau Ludi yamu tofolova. Yamu velu'uva mataifwanega 'u da velu'uvama fai 'omu 'ama to'aivaita.”
10 Bwasa i vo, Natuku, nuanuaku 'Auvea i da vevesauluva 'atumaina 'waimie. Fai basenadi yami ve sauluva lawami 'waidie sai'afo, we'e tutuya de'e yami sauluva 'atumaiotogina 'waikuye, fai tubuvauvau 'ai'aiwabudi 'alo wekowekomadi kebu 'wa da yogo'wailidi. 11 Natuku, 'asiau kebu tamu ava'ai faifaina 'wa na venuafouviga. 'Ai'edi ava'ai nuanuami 'wa na velu'ui a na 'ivaisemi, fai 'atamana de'e 'ana tomotoga, matatabudi i 'asetami yami sauluva tonovina. 12 Mogitana yau tamu 'ami to'aivaita, siwe tamu tomogo taiadi ta miamiaga taunina yami 'aila'a mogitana i na ve'isabodebodemi, yau sai'afo no'ogai. 13 'Ako lovane side bei 'wa na 'eno, 'awa'awai tomogonina a na voneni, 'ai'edi nuanuana 'omi i na tuveobumiga 'atumaina 'wa na nagia, we'e 'ai'edi kebu nuanuana, a vona mogitana'Auvea mataneye, yau a na tutuveobumi. 'Asa'aiana, side bei 'wa na 'eno i na 'atai.”
14 Bega Ludi i 'ufobala Bwasa 'ageneye i 'eno i 'atai, mulieta i 'enoviladi bola a 'awa'awaiogose kebu i da mageta'a'avaiga, i tovoi i nago bega tomotoga kebu i na 'isa'inanadi. Fai Bwasa kebu nuanuana tamu aitoi i na 'asetai, tamu vavine i nago 'eba 'aitutu 'waineye taiadi i 'eno.” 15 Mulieta Bwasa i vonedi i vo, 'Ami talauma 'wa mieni 'wa ta'uli, i ta'uli i 'a'ava nika bali bayawa 6 'ana 'etoava bani'odi i 'etoiwagidi talauma 'waineye, mulieta i ve olidi, nika i viladi i nago 'atamana bwaikina 'waineye.
16 Tutuyanina Ludi i le'wa lawadi 'waidie, Naomi i velutoliedi i vo, Natuku, tutuyanina 'wa nago 'waineye, ava'ai naniga 'ifwaidi 'ivaudi 'wa veluagadi?”
Bega Bwasa yana ve sauluva 'atumaina faifaina matatabuna i lu'ivoneyeni Naomi 'waidie. 17 Wata i vonedi i vo, Side 'wa 'iseni, 'eba tala'ewa 'wainega tala'ewa 'adi 6 i 'etoiwagidi talauma 'waineye, mulieta i vonema i vo, Kebu nima'ava'avami 'wa na vilami lawami 'waidie.’ ”
18 Naomi i vonedi i vo, Natuku 'wa na tokemaigemi, nagami ava'ai i da veifufuyeni ta da nogai. Tomogonina kebu i na veawaiga, nagami nani matatabuna i na tonova.”