Nyovara Wao Nanto
Vatano Ibrani Mansai
IBRANI
1
Yesus Kristus opamo Arikainyo Amisye pije
1 Arono wusyinoe Amisye po apa anawae matayao ti wo Apa ayao raura wama aneno Yahudi mansai to. Po apa ayao raura rijati tutiro anawae mai muno Po rarorono maije ama kotare manui. 2 Weramu arono munije ama akari mararaije so umba payao de wansai no Apa Kavo ai. Apa Kavo so pi Amisye po apatimu indamu Po naumo warae muno mine so ranari tenambe. Muno Opirati Amisye po apatimu indamu apaura anakotar tenambe rai. 3 Apa Arikainye so pirati Amisye apa varo kovo ntiti raen no Ai, muno Opamo po Amisye amaisy, weti Amisye apa ana no ai tenambe raen no Apa Kavo ai tavon. Soamo Apa Kavo so po anakotaro mine tename so muno naumo warae raijanande tenambe, muno Po raeranande irati Apa ayao ama vambunine rautan. Arono kakai to indamu Po vatane wama ayao kakai rapaya, naije pakaseo no munijo ntiti, tuna no Amisyo Titi anem ngkove rai indamu be akarive atavon.
Arikainyo Amisy titi jirati naito Amisye mansakivan
4 Maisyare wemaisy, Amisye po apa Kavo aijaseo titive naito Amisye mansakivan tenambe, mamaisyo Apa tamo Amisye po raugaje Ai rai. Apa tamo namije ntiti naito Amisy awa tame rakivan bintabo. 5 Weye Amisye po ayao namiso raura aje Apa naite inta ai jewen pare,
“Masyoto unumeso Syo raura Naijamo:
Winyirati Sya Arikainye pi Winy
muno Risyirati Nya Injaya pi Risy.”✡Mazmur 2:7; Ibrani 5:5; Arakov 13:33
Ayao umaso mamo Amisye po raura Apa Kavo Yesus obo ai. Muno Amisye apa ayao kaijinta maisyare somai tavon:
“Indati Risyamo Apa Aja pi Risy,
muno Syo awaino Sya Arikainy.”✡2 Samuel 7:14
Arono Amisye po rauranare wemaisy, Po apa naite inta aura jewen. 6 Muno arono Amisye po apa Arikainyo Anui atutir de no mine so, Po raura pare:
“Syare Sya naite ude tenambe
indamu ubeaje Sya Arikainye so ai.”
7 Naito Amisy wenawamo Amisye po mansaura taiso:
“Syo sya naite matutir wusya maisyare ovare amaisy,
muno maisyare tanamo mbadurure ramaisy.”✡Mazmur 104:4
8 Weramu Arikainyo Amisye pamo Amisye po raura nanto Ai no taiso:
“Winyamo Amisye pi Winy!
Winya mbe akarive rai ma indati ntoa nuge nuganui,
Winyamo Akarijo Titi nya ana ndave mamai bintabo.
9 Winy mbekero ana mamaisye rai,
yara nanuga mamuno anakotaro kakai rai tenambe.
Wemi mbewar ti Risyi Nya Amisy syo napatimu*Ayao Yunani naiso mare, “Risyi Nya Amisy syo manine rave nayajam.” Arono wusyinoe vatano Yahudi wo vatane inta atayao indamu be akarive, weamo wo manine rauvaro akari rai indamu aijaseo Akarijo Titi rai.
indamu Syo naijaseo titive Nya arakove makivan, weti nanuga ranayanambe.”✡Mazmur 45:6-7
10 Muno Amisye po raura nakato Apa Kavo ai pare:
“Winyi Amisy, arono manasyin dave Winyirati nyo mine so ranari muno Nyo naumo warae ranari tavon.
11 Anakotare umaso indati rakanive vintabo ti raen akatoe ramu.
Yara Winyamo no tawan tutir.
Mine so muno naumo warae noa mbe wusyimbe to,
maisyare ansuno noa mbe wusyimbe ramaisy.
12 Ansuno mbe wusyimbe vatane wo ranigwano ansuno nggwanyine rai.
Maisyare wemaisy, Amisye nyo mine so muno naumo warae ranigwano wanyine rai.
Weramu Winyamo mbe ninuwanive jewen.
Nya kove ama marane ntami intai jewen,
yara wino tawan tutira nuge nuganui.”✡Mazmur 102:25-27
Ayao umaso mamo Amisye po raura nanto Apa Kavo ai. 13 Muno Amisye po ayao namiso raura Apa Kavo ai tavon:
“Nyaje ntuna no inanem ngkove rai java
Syo Nya marova maveaje utantuna no najo ate rai
indamu wimbe akarive mai.”✡Mazmur 110:1; Lukas 20:42-43; Arakov 2:34-35
Ayao umaso mamo Amisye po raura aje Apa naite inta ai jewen, yara Po raura nanto Apa Arikainye obo ai. 14 Naito Amisy onawamo anawayo wanapatambe Amisye ai tenambe nawa. Amisye po matutir indamu wo Apa kawasae maeranande, vatano nanawirati Amisye po matayao indamu awaura kovo nuge nuganui rai.
✡1:5 Mazmur 2:7; Ibrani 5:5; Arakov 13:33
✡1:5 2 Samuel 7:14
✡1:7 Mazmur 104:4
*1:9 Ayao Yunani naiso mare, “Risyi Nya Amisy syo manine rave nayajam.” Arono wusyinoe vatano Yahudi wo vatane inta atayao indamu be akarive, weamo wo manine rauvaro akari rai indamu aijaseo Akarijo Titi rai.
✡1:9 Mazmur 45:6-7
✡1:12 Mazmur 102:25-27
✡1:13 Mazmur 110:1; Lukas 20:42-43; Arakov 2:34-35