Nyovara Wao Paulus Po Ratoe Pilemon Ai
PILEMON
Paulus po nyovara waowe so ratoe arono opamo tuna no tanoano makova rai. Po ratoe more irati apa arakove inta ai, apa tame mirati Pilemon. Wusyinoe Paulus poroto no Pilemon apa munije rai, po Ayao Kovo Yesus ravov no naije, umba Pilemon panave Yesus ai. Pilemon umaso apaveo arikainyo aro inta ai, apa tame mirati Onesimus, opamo panapatambe anakero yavaruga rai. Weramu Onesimus pamo pantatukambe Yesus ai muno ponae panapatambe no apa akari Pilemon apa yavaruga raiji. Weti puje ti nino Pilemon aora. Ananyao Roma ama ayao maje mare ranivara arikainyo aro puje ti nino apa akari aora, weamo akari umaso po mangke manakoe raugaje ai kai. Weti Onesimus jani dave, nin ti poroto gwaravaimbe, umba de nanto Paulus ai no tanoano makova rai. Naije Paulus po Ayao Kovo Yesus raura ai, umba Onesimus panave kobe. Weti anuga mbe wanyimbe akato, ti soamo beker pakare no Pilemon ai jakato, weramu janiva nene. Weti Paulus po nyovara waowe so ratoe indamu Onesimus po rauga no Pilemon ai wirati vemo parijo apa arikainyo aro Onesimus ai jakato nora, yara po augave siso indamu panapatambe apa yavaruga rai jakato.
1
Paulusa po kove ranutugore apa arakove mansai
1 Risyirati Paulus, syo nyovara waowe so ratoe more irati Pilemon winai. Winyamo sya arakovo inanuga no nai, winyirati nyo Amisye apa anakere raijar maisyare rinamaisy. Arakovo Timotius po kove ranutu nai tavon. Soamo risyamo rimakova no tanoano makova rai weye syo ayao Yesus Kristus ravov. 2 Syo kove ranutu tavon irati arakovo Apia rai muno arakovo Arkipus ai, opirati tavondi rinai rimo Amisye apa marova mansopi.✡Kolose 4:17 Muno syo kove ranutu irati arakovo wanave Yesus Kristus ai nanawirati wanugan usambayambe no Pilemon nya yavare raije mansai tenambe. 3 Syare kove muno saumane no no wama Injayo Amisy muno wama Amisy Yesus Kristus no wasautan tenambe.
Paulus be sambayambe Pilemon ai
4 Arakovo Pilemon, syo kove raura seo Amisye aijo nai arono rui vayave ribe sambayambe, 5 weye ridaniv winyamo nyanave Amisy Yesus ai muno wimuiny irati Amisye apa kawasae mansai tenambe. 6 Arakove, wambe arakobe weye wamanave Yesus Kristus ai. Wambe arakobe ti ribe sambayambe indamu wama ana wandaene miridi nseo indamu wamo Amisye apa kovo manakoe raen tenambe, wemirati wamaura rai weye wambe intabove no Kristusa nui. 7 Sya arakove, nya muinye mo inanuga so raveti ranayanambe muno mbambunin, weye syo raen wimbekobeo Yesus apa kawasae mansai ti onawamo manayanambe.
Paulus po Pilemon anyao indamu bekobe Onesimus ai
8 Sya arakove, syare syo nanajo indamu nyo anakotaro mamaisye inta rave. Ranivara anakotaro mamaisy namije syare syo nantitidi rai, weamo syo nantitidi kai weye Kristus apa vambunine no irati rinai. 9 Weramu syonae syo nantitidi raiji, yara syo nanajo bayave weye rimuinyo rinsai kava. Syare naemeno rinai weye risyirati Paulus ribe vatan anuive to, muno ituna no tanoano makova rai weye ritavondi Yesus Kristus ai. 10 Weti syo nanajo bayave, maisyare so: Syare naemeno sya arikainyo Onesimusa ai. Syo Onesimus anyao ti panave Kristus ai arono rimakova so, weti risyamo ribe ajaive ai no Kristusa nui. 11 Wusyinoe Onesimus panapatambe nai mamaisye ramu.*Tamo Onesimus ama ine mare “panapatambe ti mamaisy.” Weramu soamo anuga nggwanyin ti apa ana dave mamaisy, ti ngkovo winai muno ngkovo rinai tavon.
12 Soamo syo Onesimus atutir pakaore no winui jakato, weramu mangkeo rinai weye rimuinyo ai rave. 13 Syo raura kakavimbe: arikainye sopamo ibeke dave syo amavuga indamu panapatambe rinai. Syare po winanigwan po inaeranande risya makova so rai. Rinausiso makova weye syo Ayao Kovo Yesus Kristus ravov. 14 Weramu syonae syo Onesimus amavugi, ranivara nyo amayar ava. Weti ranivara nyare nyo Onesimus amayaro panapatambe rinai, weamo syare nyo rapatimu mamaisyo taune winya bekere bo rai. Syonae syo nantitidi.
15 Syo ratantona Onesimus puje naora vavai somamo mamaisyo Amisye apa bekere rai, indamu Onesimus pakanande nai to weamo no narijata nuge nuganui. 16 Wusyinoe nyo Onesimus atantona nyare opamo arikainyo aro pa. Weramu soamo be arove obo rai jewen, yara opamo wama arakovo panave Yesus ai inta pije tavon. Risyamo rimuinyo ai rave, weramu sya muinye mamaun, yara winya muinyo ai manakoe weye opamo nya arikainyo panapatambe naije pa muno opamo nya arakovo ripanave Amisy Yesus ai kava.
17 Nyo rinaen nyare risyamo ribe arakobe nai no Yesus Kristus ai, weti syare nyo Onesimus augave siso nya yavare rai, maisyare muno wusyinoe nyo rinauga to wemaisy. 18 Soamo inaneme raneka indamu Onesimusa po ana inta raveti kakai nai rako, po nya doije inta rauga dako, weamo syo ranawan. 19 Taune inaneme veano ayaowe so ratoe inda mbe urairive nai: Risyirati Paulus, indati syo ravae akato nai vintabo. Weramu syare vemo nanimari nora: syo Ayao Kove ravovo nai omi mbewar nyaura kovo nuge nuganui rai. 20 Weti, arakove, koveamo nyo kove inta raugakare rinai no taiso: nyo Onesimus augave siso akato. Syare wimbeto sya ana syo raura rai weye rimbe arakobe no Amisy Yesus Kristusa nui. Wea indati rinanayanambe rave. 21 Syo nyovara waowe so ratoe weye syanave nai nyare wimbeto sya ayaowe rai. Muno syo naen nya ana nyo rave ama kove indati mo sya ana syo ranajoe so rakivan.
Nyovara waowe ama maran
22 Umba sya ayao intabo mi som akato: syare nyo tanoane inta ratayao rinanyut. Weye arakove weabe sambayambe rinai ti, inanave Amisye amen Wepi indati po inapaya irati tanoano makova so rai indamu syore syo wasapan tenambe.
23 Arakovo Epaprasa po kove ranutugore nai.✡Kolose 1:7-8, 4:12-13 Wepirati pe ririmakova kava no tanoano makova so rai weye ririmanapatambe Yesus Kristus ai. 24 Muno Markusa pe Aristarkusa pe Demasa pe Lukasa pe wo kove raura nai tavon. Onawamo wo Amisye apa anakere raijaro rinatavon.
25 Amisy Yesus Kristus apa kove no wasautan tenambe.
Risy,
Paulus