1 Jesús benény laadeb tuby cuend, par bseedny laadeb dec nápac par inaabdeb lo Dios sin quɨt chaxaclaaztideb. 2 Ax raipny laadeb:

—Guu tuby guɨdx rut guu tuby juez. Quɨt bdxibtib Dios, ne quɨtza baantib cuend de bniety. 3 Ne lagacza láani guɨdxqui rbezza tuby gunaa viud, ax renaabbɨ lo juezqui par gúnbɨ castigu tuby ni rdxichné gunaaqui. 4 Per juezqui xchi quɨt baantib cuend gunaa viudqui, per chiyru ax baany juezqui xgab nab: “Masquɨ quɨt rdxibia Dios, ne quɨt runa cuend de bniety, 5 per gunaac zélaa cayunbɨ storbɨ nare. Güenru gacníab par quɨtru chalaa gueedbɨ anste chadxa paciency xtena.”

6 Chiyru raipy Jesús laadeb:

—Ziy xquel gunii juez malqui. 7 Pur ningui, latixcu Dios quɨt gacnény de bniety xtenny ni agulény chi rnaabdeb lony rdxi ne guxin. Ne, ¿tatix zacldaa gacnény laadeb? 8 Nare rniia laat dec zacnény laadeb sin quɨt gacldaatiny. Per chi guelda stuby nare Bniety ni bxiaald Dios, ¿tuguan la sdxialrua de bniety ni reldilaaz Dios lo guɨchliu?

9 Jesús benény laadeb stuby cuend, par de ni rlilo ná bɨnzaac, chiy rundeb despresy stuby de bniety, ax guniiny:

10 —Tiop bniety nguiu güedeb laniudoroo xte Jerusalén güenaabdeb lo Dios: tubybɨ ná fariseu, stubybɨ ax ná cobrador xte impuest. 11 Fariseuqui, guzuldíb gunaabbɨ lo Dios squé: “Xtiosten laabiu, Xtada Dios, te pur nare quɨt nátia zec stuby de bɨny, zec de ni ná gubaan, de ni ná mal, de ni nap stuby gunaa, per niclɨ zec ni ná cobradore quɨt nátia. 12 Nare rcuuana tiop güelt láani tuxman, ne rnɨɨdxzaca diezmɨ xte irate ni runa gan.” 13 Per bniety ni ná cobrador xte impuestqui, zit guzuguaab ne niclɨ quɨt baantib pur nildiaslob llayabaa, sino que rgapbɨ rulazdoob rniigab: “¡Xtada Dios, blaslaazbiu nare naa tuby bɨnduld!” 14 Nare rniia laat dec cobrador xte impuestqui abaany Dios perdón laab chi biecquibɨ lizbɨ, per fariseuqui quɨt baantiny perdón laab. Te pur elquɨ ni rzubyaa lagac laani quɨt xi sactib nez lo Dios. Per elquɨ ni runbichiin, laabɨy mazru sacbɨ nez lo Dios.

15 Ziyza güené de bniety de bniniin rut zuguaa Jesús par iguaaldny laadeby. Per chi guná de xpɨnny ziy, guzulo rdildnédeb de bniety ni güené laadeby. 16 Per Jesús gurɨdxny laadeb, raipny laadeb:

—Gulsaan guedná de bniniin nare, quɨtru rcuat. Te pur guelrnabee xte Dios ná par de bniety ni ná zec laadeby. 17 Te nare rniia laat dec elquɨ ni quɨt reldilaaz guelrnabee xte Dios zec tuby bniniinré, quɨt chaleeti yiiub lo guelrnabee xte Dios.

18 Tuby bɨny ni rnabee gunabdiidxbɨ Jesús:

—Güen Maistrɨ, ¿Xi riáld gúna par gapa guelnabány par chazy?

19 Jesús raipny laab:

—¿Xínii rniiu dec güen naa? Quɨtru tu náti güen, quesoltisy Dios ná güen. 20 Liú nánnu de mandamient: “Quɨt náti par gapu stuby gunaa. Quɨt quinxútiu bniety. Quɨt gactiu gubaan. Quɨt güeetiu dixú pur de bniety. Gúp didxdoo xtadu cun xnanu.”

21 Bnietqui raipbɨ Jesús:

—Irate de cosquɨ cayuna desdɨ chi naa bichiin.

22 Chi bindiag Jesús ziy ax raipny laab:

—Per rieedx gúnu stuby cos: güetóo irate de ni rápu ax bdeed mɨlyqui de prob, te ziy xquel gapu guelnazaac llayabaa. Chi abtóo de xixtenu, ax quedanald nare.

23 Per chi bindiag bnietqui ziy, quesentiand nalas biianbɨ, te pur la ricu náb. 24 Chi guná Jesús dec laab nalas nuub, ax guniiny:

—¡Quesentiandquɨza nagán par yiiu de ricu lo guelrnabee xte Dios! 25 Mazru senciy teed tuby camey guɨɨdy xte tuby guɨchgull, que par yiiu tuby ricu lo guelrnabee xte Dios.

26 Per de ni bindiag ni gunii Jesús ax guniideb:

—¿Túlesa chalee gac perdón lo Dios pur de xtuldni?

27 Chiyru cuaby Jesús lodeb:

—Nuu ni nagán par bniety guɨchliu, per par Dios xíteete nagánti.

28 Chiy raipy Bed laany:

—Dad, dunnɨ absáannɨ irate ni rdxapnɨ par izanaldnɨ laabiu.

29 Jesús ax cuaibny:

—Nare rguixtiia lot, dec tutix bniety ni rsáan lizni, chialni, de betsni, o xtadni, o xnanni, o de lliinni, pur guelrnabee xte Dios, 30 laab mazru zieny ni icáab lo guɨchliuré. Ne zapbɨ guelnabány par chazy llayabaa.

31 Jesús gurɨdxny tsɨbtiop xpɨnny tuby lad, ax raipny laadeb:

—Anre choon Jerusalén rut gac zec ni bcuaa de profet lo guiits pur nare Bniety ni bxiaald Dios. 32 Zundeb entriagu nare lo de bɨnzít, ax zundeb burlɨ nare, iralozy ni iniideb naa ne stiuxɨ́ndeb luaa. 33 Staazdeb nare, chiyru quinxúdeb naa. Per ni rion dxi ni agutia, sbíi ibánia stuby.

34 Laadeb xíteete gucbeetideb ni guniiny, niclɨ quɨt gándeb tú pur rniiny, te pur zec ni guniiny quɨt releeti gacbeedeb xi zelo ni guniiny.

35 Chi zedzɨngax Jesús guɨdx Jericó, tuby bniety nguiu ni ná ciagu zubbɨ cuee nez rguiinbɨ gun. 36 Chi gucbeeb cadeed zieny bniety, ax gunabdiidxbɨ xi cosqui cayac. 37 Ax raipdeb laab dec Jesús de Nazaret cadeed nezqui. 38 Chiy desde rut zubbɨ gurɨxtiab:

—¡Jesús, llingaan David, blaslaazbiu nare!

39 De bniety ni zanɨɨdy rdildnédeb laab par quɨtru cuxtiab, per laab mazru gurɨxtiab:

—¡Llingaan David, blaslaazbiu nare!

40 Chiyru guzudxí Jesús ax gunabeeny laadeb chacáadeb bnietqui. Chi bdzɨnbɨ gax ax gunabdiidxny laab:

41 —¿Xi rcaazu gúna pur liú?

Bniety ciaguqui cuaibbɨ:

—Dad, nare rcaaza ibíi yianluaa stuby.

42 Jesús raipny laab:

—¡Azelee yianloo! Abiacu te güeldilaazu nare.

43 Hóracqui agüelee gubíi bianlo bnietqui, ax güenaldbɨ Jesús rniib de diidx zaac par Dios. Ne irate de ni guná xa guc, guniizadeb de diidx zaac par Dios.