1 Lade'a tte rinnabaa lenlu, galu ka benne ria leke Jesucristuha ilhapike tisa len Tata Do Yebáha, innabake lenie ge iyá tte ka benne lhe ugweke bie ixkixaru lhe. 2 Innabake ge ka nu rinnabia‑na lhe ge adíru ka nu nalha ladikinna lhe, kini anáchu tse'eri'i latsiru abittu tse'e tilhari'i, udola leri'i nu anka ge Tata Do Yebáha lhe tsia le luesiri'i lhe, 3 kumu nuní ankana ttu nu tse lhe ankana ttu nu ru'u le Tata Do Yebaa benne rodilábie ri'iha, kini abittu tsia nnittiri'i. 4 Benneha raka lebie lhaa iyá ka benne se'e yiesi lo yu‑ni lhe isinke uinbiake nu anka gwalí lhe. 5 Kumu ttúruba Tata Do Yebáha do lhe ttúrugaba benne do ki rose'e tsebie ri'i len Tata Do Yebáha, delába Jesucristuha. Lee nuha uke benne attiba ankari'i. 6 Benneha betebie elha nabani gebie, uttie ki utixe ge ka tulha ge iyábari'i. Labie bisie la sá atti chi ga'anani Tata Do Yebáha, kini len nu gwateeha bele'e Tata Do Yebáha nu raka lebie unie lenri'i. 7 De lo ni'a ge nuní nna biyaxia ki akaa apóstol, kini kixxi'aya ge Jesucristuha, lhe anágaba akagabaa benne ule'enia ka nu abittu ankakana nu Israel, kini tsia lekani ge Tata Do Yebáha lhe tsia lekani ge nu anka gwalí lhe. Gwalígati xa, labí ruin lasia.

8 Laxkala nu raka lasia uin ka benne biyú‑na, gaxaba se'eke inneke ulisake Tata Do Yebáha. Aná nna akake benne ruin latsiru lhe abittu elha rise'iki geke gatta, nigaba elha utilha lhe. 9 Anágaba ka benne nuila‑na, latsiru tse'e xoke, ukuba xoke attiba ankaba geni; bittu uinke ttaba, nigaba ttebiake olhí ikike lhe abittugaba ixúkanie oru lhe perla lhe, nigaba ukuke ka xoke ka nu daka xxatta. 10 Sinuki uinlake nu anka tse nu raxxína len nu ruin ka benne nuila rudo leke nu anka ge Tata Do Yebáha. 11 Ka benne nuila‑na siiba akake, udoba nagake tti lo rigixxi'a ka benne ka tisa ge Tata Do Yebáha lhe bittugaba ekabike ge ka benneha lhe. 12 Labí raka lasia ka benne nuila‑nala tse'eke ule'eke, nigaba innabiake ka benne biyú‑na, sinuki siiba akake, 13 kumu Tata Do Yebáha benie Adán‑ni lade'a tte, delola nna benie Eva‑ni. 14 Nigaba laa Adán‑niga nuha uxí yie nu xxegwiha, sinuki nuilaha‑la nuha uxí yiena kini benna tulha. 15 Ttaka nuilaha gwalábana de tse'e xi'inni, aná nna dhona tsia leni ge Jesús‑ni lhe akana ttu benne si'i lasi lhe. Anágaba nna dhona akana ttu benne nari xú arlo Tata Do Yebáha lhe uinna attiba ankaba geni lhe.