3
Gasina teeki aka elha ruin ge ttu benne dhue arlo ka benne chi ria leke ge Cristuha
Nu rinnea‑ni nu gwalíba anka nuní: ganna nuxa ttu benne raka lebie dhue arlo ka benne chi ria leke ge Cristuha ki ule'enie ke, tseba anka sina re le benneha unie. Ttaka tee ki
ake ttu benne abittu runie ttu nu dika itise geni,
lhe ake nu do leni ttúba nuila,
lhe anágaba ake nu du itá leni,
lhe ake ttu benne lade'axa ulaba lebie tti unie ttu bixa,
lhe anágaba nna ake ttu nu runi sipa,
lhe ake ttu benne jeru tte raxie ka benne lisie,
lhe ake benne gwaka gebie ule'enie adí ka benne,
lhe anágaba nna abittu ake ttu nu ri'a,
lhe bittu ake nu rigila elha utilha lhe.
Anágaba nna abittu ake nu ru'u xxatta leni belhiu.
Nu uinlee, akalee ttu benne si'i lasi,
lhe ttu benne re besi lebie.
Lhe akagabe ttu benne rinnabia lhe'e lisie latsiru, lhe anágaba ka xi'inieha akagabakana ka nu rudokana tisa gebie lhe tsia lekanie lhe. Kumu ttu benne ganna abíba raka gebie innabie lhe'e lisie, ¿gasina aka ge benneha ulhenie ka benne chi ria leke Tata Do Yebáha? Anágaba nna abittu ake ttu nu si bedaxxube neda ge Tata Do Yebáha, kini ka ake ttu nu uin ttaba nna ibixxi iginnie attiba ubixxi biginni nu xxegwiha. Anágaba nna teeki aka benneha ttu nu ruin latsiru, kini anáchu, tti iláni ka nu abí ria lekani Cristuha nna abittu tee ro'okani kuakana bala'ana gebie nna iginnie lo yalhi ge nu xxegwiha.
Gasina teeki aka elha ruin ge ka benne ute náke len ka benne chi ria leke ge Cristuha
Anágaba adí ka benne galha ladike ki ute náke len ka benne chi ria leke ge Cristuha, ka benneha tee ki
akake ka nu dika tsia le ka benne ke,
lhe akake ka nu abittu rigitta náke,
lhe anágaba teeki akake ka nu abittu ri'iya xxatta,
lhe abittugaba akake ka nu rotsi'inu leke gaxasina uinke ki galhike belhiu ge ka benne.
Anágaba nna teeki akake ka benne abittu udhanke a tsia leke nu chi bela'ani Tata Do Yebáha ke ge Cristuha, kumu lake yuke deki nu ruinkeha gwa ankabana tse, abittu rudheana loke.
10 Aná nna lade'axa tsu'uke prueba. Ganna si abittuba tee ttu bixa itisake geni, la'anialiba nna chi dhi ladike ki ute náke len ka benne chi ria leke Cristuha. 11 Anágaba ka benne nuila‑na tee ki
akake ka nu dika tsia le ka benne ke,
lhe akagabake ka nu abittu rilhidha tisa a ixú,
lhe akake ka nu du itá leke lhe.
Anágaba nna akake ka nu gwa ruinbake iyá nu rákeha.
12 Ka benne biyú galha ladikeha tee ki
akake benne do len ttúba nuila,
lhe innabia tseke ka xi'inke lhe adíru ka benne se'e lhe'e lisike lhe.
13 Kumu ka benne nalha ladike ki rute náke len ka benne chi ria leke Cristuha, ka benneha ganna ruin tseke nu daa loke uinke, la'ania nna gweyyaba le ka benne ke lhe anágaba nna isinke tsia tsitsiru leke ge Jesucristuha.
14 Lu nna Timoteo, ruxxen lasia deki chi tteba itaa etelannia lu, ttaka runia nuní lo yetsi‑ni nna ridhelhaa na lenlu, 15 kini ni kina isábaa abíba isia xxia, la'ania nna chi yulu gasina teeki uinlu len ka xi'in Tata Do Yebáha, delába ka benne chi ria leke bie. Ka benneha ankake attiba ttu betubi se'e tsitsike, denke ka tisa ka nu gwalíga ankake ge Tata Do Yebaa benne anka baniha. 16 Gwalí galá, itú ttuha xxeniba anka nu labí yu ka benne ge Cristuha, delába labí yuke deki benneha
bisiabie yiesi lo yu‑ni uke benne attiba ankari'i,
nna Espíritu ge Tata Do Yebáha bele'enie ri'i deki benneha uke benne tse.
Anágaba nna bilágabin ka anjeli ge Tata Do Yebáha bie,
lhe biyiengabani ka nu abittu ankakana ka nu Israel ka tisa geeha,
lhe anágaba nna ugíagaba le ka benne se'e yiesi lo yu‑nie.
Iki deliba nuha nna tti bedí Tata Do Yebáha bie kini besine yebáha.