1 Espíritu ge Tata Do Yebáha lhixxa rába rigixxi'e ree, atti chi dabiga isia ka sá daluxaha, la'ania ttu chupa ka nu chi ria lekani ge Cristuha, udhanlakana labíru tsia lekanie. Udola nagakani ge ka nu ruin lekani lhe udola nagakani ge ka nu rule'ekana nu ra ka espíritu xxegwiha. 2 Ka nuha labíru raka tékinna ge nu ruinkanaha. Delo tisaba ruinkana deki tseba rigixxi'akana, ttaka ruinba lekani. 3 Usunagabakana utsá ná ka benne lhe usunagabakana gori'i iyá nu chi ga'anani Tata Do Yebáha gori'i. Kumu labie chi benie nuha ki akana nu dika gori'i, kini anáchu nna ka benne ria leke Cristuha lhe ka benne chi yuke ka tisa ka nu anka gwalí, tti goke nu chi ga'ananie gori'iha nna ugweke bie ixkixaru. 4 Kumu tseba anka iyába nu ben Tata Do Yebáha. Laxkala labí dika udelha lattiri'i nu benieha, ladiba ganna ugweri'e ixkixaru tti gori'i benneha. 5 Kumu len ka tisa ge Tata Do Yebáha lhe len ka tisa rinneri'i tti rinnabari'i lenie, len ka benneha rocharie benne rori'i.

6 Ganna iyá nuní ule'enlu ka betsi to geri'i‑na, la'anialigaba nna gwankalu ttu benne ruin tselu sina ge Jesucristuha, kumu de deti tsitsilu ka tisa ria leri'i‑na, ka nu chi bela'akanie lu, delába ka tisa ka nu rudogabalu tisa gekani. 7 Abittu udo nagalu ge ka cuentu a ixú, ka nu bittu dika tsia leri'i gekani. Lu benla doelha bedo lelu nu anka ge Tata Do Yebáha. 8 Kumu ttu nu rudhetina ruxunnina kini aka tsitsi latini, ttu sattiruba ixú nu ruinnaha lenna, ttaka ri'i ka benne rudo leri'i nu anka ge Tata Do Yebáha, ge iyá tte ixú nu ruinri'iha: ixúna lenri'i nnanna se'eri'i anka benri'i yiesi lo yu‑ni lhe ixúgabana lenri'i ganna chi se'eri'i yebáha. 9 Tisa rinnea‑ni ankabana nu gwalí lhe nu dika tsia le iyá ka benne lhe. 10 De nuha nna rateri'i lhe ruinri'i doelha kumu ruxxen leri'i ge Tata Do Yebaa benne anka baniha. Benneha anke benne rodilábie iyá tte ka benne. Ka benne ria leke ge Cristuha, ka benneha nuha lade'a tte rodilábie ke.

11 Ge iyá nu rigixxi'aya‑ni, bele'ekin benne lhe usi ke udoke tisa geni lhe. 12 Ben kini abittu ku'u ni'ake lu de ankalu nu kwiti. Ben latsiru kini ka benne ria leke ge Cristuha, tti ilákanie elha ruin gelu‑na, la'ania nna aníha‑gaba uinke. Latsiru unne lhe latsiru beni. Anágaba nna akagabinlu ge ka benne lhe beni kini ule'e deki gwalínlu ria lelu Cristuha, lhe ben taga'a nu anka tse lhe. 13 Laka neti esiaya nna lu belaba ka tisa ge Tata Do Yebáha arlo ka benne lhe belisa ke lhe bele'e kanie gaxasina tse'eke. 14 Abittu uxxulha lelu a ixuinlu elha tse rapalu‑na. Nuná bete Tata Do Yebáha lenlu tti uxxua ná ka benneola geri'iha ikilu nna utixxi'akanie lu nu ra Tata Do Yebáha deki uinlu.

15 Nuní bedo lelu lhe nuní beni lhe, kini anáchu iláni iyá ka benne deki gwa diabalu rakaru gelu. 16 Biyú gelu, latsiru beni lhe latsiru bele'eni ka benne lhe. Nuná bedo lelu beni, kumu ganna aná uinlu, la'ania nna gwalábalu abittu tsia nnittilu lhe gwalágaba ka benne udo nagake gelu lhe.