1 ―Xa betsi to lhe xa tata benneola lhe, gwaludoruga nagale nu ekabia gele ge nu rusiale ikia‑ni.

2 Tti chi biyienkinna rinne Pabluha tisa hebreo, la'aniala nna beyaka siirukana, nianna tti rana kana:

3 ―Neti ankaa benne Israel nna ulia lhe'esi Tarso. Yiesiha rena lo yu ge Cilicia. Ttaka lhe'esi Jerusalén‑niba bixenia nna Gamaliel‑ni bedhetinna neti tti tteba ra lo bia bennabi ge ka benne uka xuttori'iha. Neti bedo xxattana lasia bedoa tisa ge Tata Do Yebaa geri'iha ttiba ruin iyábale nnanna. 4 Itú ttuha udú nooa ka benne chi bedaxxuke neda ge Jesús‑ni, benia uttia ke. Nuila lhe nubiyú ka benneha rudaxxua ruxxigaa ke nna raga'aya ke lhe'e lisiyya. 5 Bixxudi xeniha lhe iyába ka benneola geri'iha gwa biyúbake nu benia. Lagabake beteke yetsi denia diaya kini ule'enia ka benne geri'i se'e lhe'esi Damasco‑ni, kini sadaxxua ka nu chi bedaxxukana neda ge Jesús‑ni nna esia lania kana Jerusalén‑ni kini iyayakana.

6 ’Ttaka laka yu'a neda diaya, tti chi isinaa lhe'esi Damasco‑ni, gaxa ttiba tu retin tsi'inu (12) resá nuha chi anka, ttiruba ttu nnelaba chi uyu'u ttu xiani xeni dana yebáha uyu'una abi'iba kwe'a. 7 Nianna tti ubixxi lo ttebaa lo yu nna tti biyienti tsi'i ttu benne unnebie, ree neti: “¡Saulo! ¡Saulo! ¿Beaka neti danalhalu rudhaka disalu?” 8 Neti nna bekabia, ria: “¿Núle nuná xa tata?” Benneha nna bekabie ree: “Netiba nuní Jesús ge Nazaret benne danalhalu rudhaka disalu.” 9 Ka nu dia lania nna bilábakinna xianiha, ttaka labí biyienkinna tsi'i benne rulise netiha. 10 Neti nna xpeya benneha: “¿Bí raka lelu unia xa tata?” Labie nna bekabie, ree neti: “Beyadha nna uta'a lhe'esi Damasco‑na. Naa kixxi'akana iyá nu chi ga'anati uinlu.” 11 Ttaka kumu de uyu'u xianiha loa, de nuha nna lo xuaba beya'anaa. Laxkala ka nu dia laniaha itú nalhibakana náya chibuka bisinaa lhe'esi Damasco‑ni.

12 ’Niha do ttu benne biyú tee lábie Ananías. Benneha anke ttu benne rudo tsitsie tisa ge nu ra lo bia bennabi bodha'an Tata Do Yebáha len Moisés‑ni nna iyába ka benne Israel se'e niha ráke tseba runie. 13 Benneha bitee ata doaha. Tti bisie niha nna rabie neti: “¡Saulo, betsi to, chinka bedhali ka iyya lolu‑na, chiba aka elenlu!” Neti nna la'ania tteba beyali ka iyya loa‑ni nna bilá ttebati benneha. 14 Nianna unnebie, ree: “Tata Do Yebaa benne anke Diosi ge ka benne ukake xuttori'iha, benneha chi bekwebie lu kini unalu bí raka lebie uinlu lhe anágaba kini ilenlu Jesús benne runie attiba ankaba geniha lhe kini iyieninlu ka tisa ka nu inne kwinaga benneha. 15 Kumu lu akalu nu kixxi'alu gebie arlo iyába ka benne, kixxi'alu ge nu chi bilenlu lhe ge nu chi biyieninlu rabie lhe. 16 De nuha nna, ¿bíla ribedalu? Kanna udú lii nna udi inda nna unnaba len Tata Do Yebáha kini ocharie yua ge ka tulha gelu‑na.”

17 ’Atti chi beyekia besiaya Jerusalén‑ni nna bita ttebaa lhe'e yotu‑ni. Dubaa gwelhapi tisa len Tata Do Yebáha nna ttiruba ttu nnelaba chi bela'ati 18 Jesús benne anke Xxanari'iha, rabie neti: “Jeru tte begwe lelu beria lhe'esi Jerusalén‑ni kumu ka nu se'e nii labí ulabikana nu kixxi'alu kia.” 19 Neti nna xpeye: “Tata xisi to, ka nuní yúbakana deki neti lhe'e iyába ka yo'o ata rudhetiri'i ka tisa ge Tata Do Yebáha rata'aya nna raayaa ka benne chi ria leke gelu lhe rudheaya ke lisiyya lhe. 20 Anágaba lhe tti bettikana Esteban benne utixxi'e ka tisa gelu‑na, neti la'ania niha‑gaba dua nna gwa uyu'ugaba lasia nu bedhakana benneha. Axtala udúa biyúa ka xo ka nu bettikana benneha.” 21 Ttaka benne bela'atiha nna rabie neti: “Ugía, kumu neti idhelhaa lu lhe'e ka yiesi dittu‑na ata se'e ka nu abittu ankakana nu Israel.”

22 Debá ttaníaruba gwa bedo nagakani ge Pabluha. Nianna tti chi unnekana idisa, rákana:

―¡Gwalutti nuná! ¡Labí ralha nuná aka benna!

23 Ttaka kumu de ribesi'a xxattakana lhe de ribeaniba xokani rigu'una kana lhe de rudaxxukana yu rudelhakana lo be lhe, 24 de nuha nna ben nu loni ge ka soldaduha mandadu kini uga'akana Pabluha lhi'u ata ru'ukanaha nna gayakana na, kini ixxe'e ro'oni beaka ribesi'a ka nuha rebi'i nookana na. 25 Ttaka tti chi xigakinna Pabluha kini gayakana na, nianna unnaba tisana nu du niha, delába soldadu nu baninna ttu gayua (100) ka soldaduha, rana nuha:

―¿Si gwa ga'anaba deki gayale ttu benne romanu ganna abíba chi ulea liile deki gwalíga tee tulha gebie?

26 Tti biyienin soldaduha nu ra Pabluha, nianna tti ugíana gwattixxi'enna nu loni ge ka soldaduha, rana nuha:

―¿Bíla anka nu uin kwinalu ganna? Nubiyú bedaxxuri'i‑ni rana ankana benne romanu.

27 Nianna tti dia nu loni ge ka soldaduha ata du Pabluha nna unnaba tisana na, rana na:

―Utixxi'a, ¿si gwalí ankalu benne romanu?

Pabluha nna bekabina geni, rana na:

―Gwalí galá.

28 Nu loni ge ka soldaduha nna rana na:

―Neti yalhá ixeni belhiu gwaduloti kini ukaa benne romanu.

Pabluha nna bekabina ge nuha rana na:

―Neti attili uliaha chi ankaa benne romanu.

29 Nuha‑ba biyienin ka nu chi se'ekana kini gayakana Pabluha, nianna bebi'etta ttebakana kwe'eni. Anágaba nna nu loni ge ka soldaduha, tti chi binana deki Pabluha ankana benne romanu, usigabinna kumu de chi xikakinna Pabluha cadena.

30 Beyeki sáha nna nu loni ge ka soldaduha, de raka leni una tsena bí lo ni'a ge nna rebi'i noo ka nu Israel‑ni Pabluha, de nuha nna bedhasina Pabluha nna benna mandadu kini bottupakana ka nu loni ge ka bixxudiha lhe adíru ka nu ruin elhuxtisi ge ka nu Israel‑ni lhe, nianna tti betso duna Pabluha arlo ka nuha.