1 Pabluha nna belanni tsitsibana lo ka nu runi elhuxtisiha, nianna tti rana kana:

―Xa betsi to, neti yu xeabaa itúkiba doa yiesi lo yu‑ni latsiruba doa len Tata Do Yebáha.

2 Tti biyienin Ananías nu anka bixxudi xeniha, tti biyieninna nu ra Pabluha, nianna tti rana ka nu se'e gaxxaba ata du Pabluha kweakana gi ro'oni. 3 Ttaka Pabluha nna bekabina geni, rana na:

―¡Aaluxa nu regí xú loni! ¡Tata Do Yebáha kweabie gi ro'olu! Lu dolu kini uinlu elhuxtisi kia tti tte ra lo bia bennabi geri'i‑na, ttaka rutse'e loona lu rigu'ula ni'alu nu ra lo nuná tti ralu ka nuná: Gwalikwea gi ro'oni.

4 Ka nu se'e niha nna rákana Pabluha:

―¿Si aná dika ulisalu benne anke bixxudi xeni ge Tata Do Yebáha?

5 Ttaka Pabluha nna rana ka nuha:

―Xa betsi to, labí yua ganna benne‑na anke bixxudi xeni, de nuha gwalidhíchi elha xen lasi, labí dika innea aná, kumu lo ka yetsi ge Tata Do Yebáha ra: “Abittu inne satsalu ge benne rinnabie lhe'esi geluha.”

6 Kumu Pabluha yúbana deki salhe ka nu se'e niha ankakana saduceo nna a salhe ka nuha nna ankakana fariseo, nianna tti unnena idisa, rana kana:

―Betsi to, neti ankaa fariseo, xi'in ka fariseo. Ruinle elhuxtisi kia kumu de ruxxen lasia deki gwa reyaka benba ka benne chi uttiha.

7 Tti rana aníha nna ka fariseo‑ni lhe ka saduceo‑ni lhe udulo ttebakana rulisa luesikani. Nianna ulha'a tteba lhe'e luesikani, 8 kumu ka saduceo‑ni rákana labí reyaka ben ka benne chi uttiha lhe nigaba lanú ka anjeli se'e lhe nigaba lanú ka espíritu se'e lhe. Ka fariseo‑ni nna gwa redeyyaba lekani ge iyá nuní. 9 Nianna bigiyya tterubakana nna ttu chupa ka fariseo ka nu rule'ekinna ka benne nu ra lo bia bennabi bodha'an Moisés‑ni nna udú lii ttebakana unnekana, rákana:

―Nubiyú‑ni labí raxxakatu bixa nu satsa chi benna. Gaxa ttu espíritu o ttu anjeliba nuná chi unnebie lenna. Ganna aníha nna ri'i labí dikana edú disari'i arlo Tata Do Yebáha.

10 Ttaka nna adíla chi rigiyya xxattakana. Nianna chi usini nu loni ge ka soldaduha kini ka gayakana Pabluha nna uduyakana na. Aníha uka nna uxina ttu chupa ka soldaduha kini ebeakana Pabluha lagwi ge ka nu tupa niha nna eche adakabakana na lhe'e yo'o ata ru'ukanaha.

11 Beyeki ulhaha nna bodole'e lo Jesús benne anke Xxanari'iha len Pabluha, ree na:

―Tsitsi udú, Pablo, kumu ttiba chi benlu utixxi'alu kia lhe'esi Jerusalén‑ni, anágaba teeki kixxi'alu kia lhe'esi Romaha.

12 Tti ugwani dilaha nna bottupa tteba luesi ttu chupa ka nu Israel‑ni nna uyu'ukana unnekana kumu rulha lekani uttikana Pabluha. Nianna begwekana tisa deki labí gokana yetta, nigaba i'iyakana inda axtaliba ganna chi bettikana Pabluha.

13 Gwate chua (40) ka nubiyúha begwekana tisa deki uinkana aníha. 14 Nianna tti ugíakana arlo ka nu loni ge ka bixxudiha lhe arlo ka benneola ge ka nu Israel‑ni lhe, rákana ka nuha:

―Ri'itu chi begwetu tisa ratu labí gotu yetta axtaliba ganna chi bettitu Pabluha. 15 Nnanna nna kwinale xa tata lhe adíle ka benne runi elhuxtisi, gwaligasi nu loni ge ka soldadu‑na saleana Pabluha nna udúna na arlole. Uka diba uinle deki kwea lii tsele bixa benna. Ri'itu nna chi se'e tsetu ro'o nedaha, kini lanila isiana arlole nna chila uttitu na.

16 Ttaka xi'in biyú nuila dan Pabluha biyienbinna nu rulha le ka nuha uinkana, nianna tti ugía ttebana lhe'e ata yu'u ka soldaduha kini gwattixxi'enna Pabluha. 17 Pabluha nna uxi ttebana ttu ka nu banakinna ka soldaduha nna rana nuha:

―Uche nu kwiti du‑ni arlo benne anke nu loni geleha kumu lana raka leni kixxi'enne ttu tisa chi binana.

18 Nuha nna che ttebana nu kwitiha nna gwaga'ana na arlo nu loni gekaniha nna rana nuha:

―Pablo nu yaya lisiyyaha uxina neti nna unnabana len neti kini etedha'anaa nu kwiti du‑ni arlo kwinalu kumu nuní raka leni kixxi'enna lu ge ttu bixa.

19 Nu loni ge ka soldaduha nna ulhi ttebana ná nu kwitiha nna chena na attu ata subi. Nianna tti unnaba tisana nu kwitiha, rana na:

―¿Bí raka lelu kixxi'enlu neti?

20 Nu kwitiha nna bekabina rana:

―Ka nu Israel‑ni chi unne len luesikani rákana deki innabakana len kwinalu kini ichelu Pabluha uxxeha nna utso dulu na arlo ka nu runi elhuxtisi gekaniha. Uka diba uinkana deki kwea lii tsekana bixa benna. 21 Kwinalu nna bittu tsia lelu gekani kumu ttiba gwate chua (40) ka nubiyú ukatsi lokani tse'ekana ro'o nedaha nna dhu nookana Pablu‑na, kumu chi begwekana tisa rákana labí gokana yetta, nigaba i'iyakana inda axtaliba ganna chi bettikana Pablu‑ni. Nnanna nna sun tteba se'ekana ubeda bixa inná kwinalu.

22 Nu loni ge ka soldaduha nna bedhelhana nu kwitiha nna rana nuha:

―Anuttu nu galu deki chi betettixxi'enlu neti ge nuní.

23 Nianna tti uxi nu loni ge ka soldaduha chupa ka nu se'e kwe'eni, ka nu banakinna adí ka soldaduha. Nianna tti rana ka nuha:

―Gwaluse'e tse chupa gayua (200) ka soldadu ka nu dha ni'akani nna a gayuna bixxi tsii (70) ka soldadu ka nu kwiakana kwe'e ka kwayu nna a chupa gayua ka nu ddenkana ka iyya lo tutsa, kini tsiakana retin jaa rela lhe'esi Cesarea‑ni 24 lhe gwaluse'e tsegaba ka kwayu kini dho Pablu‑ni kwe'e ttu ka nuná. Aníha uinle kini abittu bi satena chibuka isin lenle na lo Félix nu rinnabiaha.

25 Nianna tti ben nu loni ge ka soldaduha ttu yetsi. Lo yetsiha rana:

26 “Neti Claudio Lisias ridhelhaa ttu padiuxi ge kwinalu xa tata Félix benne ra xxeni lebie. 27 Nubiyú ridhelhaa naa, ka nu Israel‑ni bedaxxukana na, chiba se'ekana deki uttikana na, ttaka neti, tti binaa deki ankana benne romanu, nianna ugía ttebaa len ka soldadu kia‑ni kini gwadiláya na. 28 Nianna tti chea na nna bedúa na arlo ka nu runi elhuxtisi gekaniha kini aníha nna unaa bí ge bedaxxukana na 29 nna tti biyienti rusiakana ikini deki rigu'u ni'ani bia bennabi gekaniha, ttaka labí benna ttu bixa nu dika ralhana gattina o ralhana gattana lisiyya. 30 Ttaka tti chi binaa deki ka nu Israel‑ni rulhaba lekani uttikana na, de nuha nna labí uledaa nna udhelha ttebaa na len kwinalu. Anágaba nna chigaba xpeya ka nu rusiakana ikini deki bixa benna, xpeya kana etetso dúkana arlo kwinalu innákana bixa ge do lekani nuná. Gwedesábari'i attu sá.”

31 Ka soldaduha nna benbakana attiba chi ra nu loni gekaniha, uchebakana Pabluha lo relaha nna bisin lenkana na lhe'e ttu yiesi nu tee láni Antipatris. 32 Ugwani dilaha nna a suna ka nu sia kwe'e ka kwayuha‑ba bederia lenkana Pabluha dedheyyakana, adí ka nuha nna beyekibakana besinkana lhe'e yo'o ata ru'ukanaha. 33 Ka nu dia lenkana Pabluha, tti chi bisinkana lhe'esi Cesarea‑ni nna begwe ttebakana Félix nu rinnabiaha yetsi denkanaha lhe bedúgabakana Pabluha arloni lhe. 34 Atti chi belaba Félix‑ni yetsiha, nianna tti unnaba tisana Pabluha gaxa daka dana. Pabluha nna rana dana daka lo yu ge Cilicia. 35 Nianna tti ra Félix‑ni na:

―Gudoba nagaa gelu ganna chi bisia ka nu rusiakana ikilu bixa benlu.

Nianna tti benna mandadu kini bedheakana Pabluha lhe'e guskadu ata udo Herodes‑ni kini uyú tsitsikana na.