1 Betsi to kia, bittu iyále uinle ge maestru, kumu gwa yúbari'i deki ri'i ka nu rule'eri'i ka tisa ge Tata Do Yebáha, tsitsiru udhake ri'i ganna ttixka abíba ule'enri'i ka benne nu dika ixú. 2 Kumu iyábari'i satti balhaba rinittiri'i. Ganna ttixka ttu benne abittuba rinittie bitti innábie, benneha‑ligaba nna gwanke ttu benne runi itá su lhe gwakagaba gebie innabie itú latie lhe.

3 Ttiba ttu kwayu, tti rigu'uri'i frenu ro'oni ki udona tisa geri'i, la'ania nna len frenuha gwa ridábari'i rodekiri'i kwayuha. 4 Gwalulanniruga ka barcu‑na. Ka nuná meskiba ankakana elha lhe meskiba bikaxa tipa anka be ru'una kwe'ekani, ttaka nu rudhána barcuha, suna len ttu yaga chika'a to nu tee láni timón, suna len nuha‑ba nna gwa ridábana rodekina lo barcuha. 5 Anágaba lhusari'i‑ni, ttu nuxka'a toru anka nuní rapari'i, ttaka tti rinnena nna xxeniba anka elha gaa rigilana. Gwaluyúruga attiba ttu gi chika'a to, gwa ridaana ruttena ttu i'iyatoo xeni, aníha‑gaba anka lhusari'i‑ni. 6 Lhusari'i‑ni ankabana ttiba ttu gi. Ankabana ttu nu rapari'i nna ruinna nu satsa; tti rinnena nna rutsigabana ri'i arlo Tata Do Yebáha. Itúba se'eri'i anka benri'i yiesi lo yu‑ni runnittibana ri'i. Ttiba gi ge nu xxegwiha ankana.

7 Kumu iyába ka nimala ka nu sia ttapa ni'akinna lhe ka nu sia xxilakinna lhe ka nu ra'aya lhe'ekani lo yu lhe anágaba ka nu reki lhe'e indatooha lhe, iyába ka nuná gwa ruttanaba ka benne se'e yiesi lo yu‑ni kana. 8 Ttaka lhusari'i‑ni, ni ttúri'i labí dhaari'i uttánari'i na. Ankabana ttu nu satsa labí dhaari'i ukwedari'i na. Ttiba ttu belha ta'a inda dhua‑ni, aníha‑ba anka lhusari'i‑ni rutse'e loobana tti rinnena, 9 kumu len lhusari'i‑ni rulhari'i ge Tata Do Yebáha benne anke Xxudiri'iha lhe len lhusari'i‑nigaba rigeri'i iki ka benne se'e yiesi lo yu‑ni lhe, delába ri'i ka benne ben Tata Do Yebáha attiba anke. 10 Betsi to kia, labí dika uinri'i aná kumu, ¿gasina nuha nna la len ro'obari'i rulhari'i ge Tata Do Yebáha nna la len ro'ogabari'i rigeri'i iki ka benne? 11 ¿Laaba ganna labí dikana ttúba ro'o dinaha iria inda tseha lhe iriagaba inda ilháha lhe? 12 Xa betsi to kia, ¿laaba ganna labí aka kwia olivu lo ttu ya higu, nigaba labí aka kwia higu lo ttu ya uva? Anágaba ro'o ttu dina labí aka unna nuha inda tse, nianna edeonnagabana inda ixe.

13 Ganna nuxa ttúle ankale nu yuu lhe ankale nu rapa elha rieni lhe, teeki uinle latsiru, bittu uinle ttaba. Aníha kini ule'e deki gwankale nu gwa rapa elha rieni. 14 Ttaka ganna risi xxattinle ttu benne o ritilha len luesile lhe, la'ania nna labí teeki tse'ele innále deki ankale nu yuu, kumu ganna ritisibinle ka benne o ritilha len luesile, la'ania nna ruinba lele. 15 Kumu luesi elha rieni rapale‑na, labí anka nuná nu rute Tata Do Yebáha, ankaba nuná ge yiesi lo yu‑ni. Ankaba nuná nu riria iki ka benne lhe anágaba ankagaba nuná ge nu xxegwiha. 16 Kumu ata ritisin luesi ka benne lhe ata ritilhake lhe, niha nuha tee elha gaa lhe niha nuha raka iyá looba nu satsa lhe. 17 Ttaka benne rape elha rieni rute Tata Do Yebáha, benneha labí anke nu ruin satsa.