1 ¿Gá riria ka elha utilha lhe ka elha gaa tee gele‑na ganna? ¿Laaba ganna lhe'e lastole‑naba riria ka nuná kumu ru'u lele ruinle nu satsa? 2 Kumu lebi'i ridá lele nu tee ge attu benne subi, ttaka abígaba riselinle. Nianna tti ridulole ruttile ka benne lhe rutía di lele ka benne lhe, ttaka nna abígaba riri'a lenle dhile nu raka leleha. Nianna tti redetilhale lhe rulisa luesile lhe, ttaka nna abittugaba ridíle nu raka leleha. Abittu galá ridíle nuha, kumu labí rinnabale len Tata Do Yebáha. 3 Tti rinnabale nna abí galá ridíle. Bittu galá ridíle, kumu de labí rinnaba tsele, kumu rinnababale nuha ki ixuinle na attiba rakaba lele. 4 Aalexa ka nu chi rudhá ikile Tata Do Yebáha. ¿Si lagwa gwa yule deki ganna ttixka ri'i ru'u leri'i nu satsa raka yiesi lo yu‑ni, len Tata Do Yebáha nuha abittu se'e tseri'i? Laxkala ganna ttixka ttu benne ru'u lebie runie nu satsa, len Tata Do Yebáha nuha abittu do tsebie. 5 Bittu akinle deki kwentaba ra lo ka yetsi ge Tata Do Yebáha ata dia ra: “Espíritu bete Tata Do Yebáha do lhe'e lastori'i, yalhá rakin benneha geri'i lhe rapa sune ri'i lhe.” 6 Ttaka Tata Do Yebáha redárula lebie rakanie geri'i. De nuha nna ra lo ka yetsi geeha: “Tata Do Yebáha redú dise lo ka nu ruinkana ttaba nna ka benne abittu ruinke ttaba nna gwa rakaba lanie ke.”

7 De nuha nna gwaludo tisa ge Tata Do Yebáha nna nu xxegwiha nna gwaledú disa loni. La'ania nna gudhanba nuha le. 8 Gwalebigala len Tata Do Yebáha, benneha nna gwebigagabe lenle nna lebi'i ka nu ruin tulha, gwaludhan nu satsa ruinle‑na, nna lebi'i ka nu rudú chupana lele nna gwalodola lele Tata Do Yebáha. 9 Gwalodúna le ge nu ruinle lhe gwalikwesila lhe, anágaba gwalelenilinle lhe. Nu uka gwitta gwexisi gele ttuha, labíru aka nuha aníha. Nnanna nna gwalikwesila lhe gwaludú si'ila lele lhe. 10 Arlo Tata Do Yebáha bittu uinle deki ra xxeni lele, benneha nna gugwebe lidhakale.

11 Betsi to, bittu inne ge luesile, kumu nu rinnena ge betsi to geri'iha, ge bia bennabi bodha'an Tata Do Yebáha nuha riguana bala'ana. Ganna lu rigualu bala'ana ge bia bennabiha, la'ania nna labíru ankalu nu rudo tisa ge nu reeha, sinuki ttiba ttu xueda runi elhuxtisi, aníha‑ba chi rakalu kumu de rapalu lo neda rinnelu. 12 Kumu sunruba ttu benne do anke xueda, delába Tata Do Yebaa benne bodha'ane nu dika uinri'i. Benneha nuha gwaka gebie odilábie ri'i o urixxi ukinnie ri'i. Lu nna, ¿núla ankalu nna rigualu bala'ana ge attu benne?

13 Nnanna nna gwaludo nagale, lebi'i ka nu rale: “Nasá o uxxeha tsiari'i lhe'e attu yiesi subi nna lhe'e yiesiha tse'eri'i delo ttu ida. Niha tsekiri'i gwerixxi nna tseba belhiu dhiri'i.” 14 Ttaka labí yule bí aka uxxeha kumu ri'i labí isá dari'i yiesi lo yu‑ni. Ankabari'i attiba bea tseni, ttu sattiruba ribena nna ttu nnelaba retuana. 15 Lebi'i nu innálale: “Ganna Tata Xisiha aka lebie aka benruri'i, la'ania nna gwakaba uinri'i nuní o lhe uinri'i nuná lhe.” 16 Ttaka lebi'i rise'elale elha ro'o lhe'e gele lhe ruinle ttaba lhe. Neti ria: “Iyába luesi elha ttaba ruinle‑na, labí anka tse nuná.” 17 Laxkala ttu benne ganna chi yue deki teeki unie nu anka tse, ttaka ganna benneha abíba ruin tsebie, la'ania nna tulhaba nuha chi daabie.