16
Jesús‑ni beyaka benbie lo elhuttiha
(Mt. 28:1-10; Lc. 24:1-12; Jn. 20:1-10)
Tti chi ute sá tti reyaka le ka benne Israel‑ni, María Magdalena‑ni lhe Salomé‑ni lhe María nan ge Jacobo‑ni lhe uyo'oke ixe loo ka nu rure ixixxi kini sattabike lati Jesús‑ni. La dila bedulo xumanuha nna dila tteba si dáruba riria tatubisa‑na, dia ka benne nuilaha ata bigatsi Jesús‑ni. Laka yu'uke nedaha nna ra luesike:
―¿Núru nuha kuana íyya yaya ro'o yieru baaha ganna?
Aníha ráke kumu yalhá xeni anka íyyaha. Ttaka atti belannike ro'o yieru baaha nna bilákanie chiba bisila íyyaha. Tti uta'ake lhe'e yieru baaha nna bilákanie do ttu nubiyú kwiti nukuna ttu xo ttuni. Sitsi túba anka xoniha nna dona daka ná bani ge yieru baaha. Ka benne nuilaha nna yalhá usikanie. Nubiyúha nna rana ke:
―¡Bittu gasinle! Lebi'i regilale Jesús ge Nazaret benne betákana lo ya kurusiha. Benneha chiba beyaka benbie. Lanúrue tee nii. Gwalulanniruga ata utixxakaneha. Gwaleyya nna gwaligasi ka benne rudhetinieha lhe gwaligasi Pedro‑ni lhe, daka Galilea‑nila chi deyye daneru gaabie nna niha‑liba ilenlee, attiba chi rabie le tti sa reki lenleha.
Ka benne nuilaha nna boxunni ttebake beriake ro'o yieru baaha kumu rasibakanie lhe rixidibake lhe. Lanú nu utixxi'akanie kumu de si rasilakanie.
Jesús‑ni bele'e loe len María Magdalena‑ni
(Jn. 20:11-18)
[La sá tti bedú ni'a xumanuha, beyaka ben Jesús‑ni. Tti chi daa tsaniha, lade'a tte bele'e loe len María Magdalena‑ni, benne bebeabie gasi ka espíritu xxegwiha latie. 10 Benne nuilaha nna ugíe gwattixxi'anie ka benne gwanalhake Jesús‑ni tti do benbieha. Ka benneha se'eke du si'i leke lhe ribesike lhe. 11 Tti biyienkanie deki anka benba Jesús‑ni lhe deki chi bilen María‑nie lhe, lake nna laa ugía leke ge benneha.
Jesús‑ni bodola'a loe len chupa ka benne bedhetinieha
(Lc. 24:13-35)
12 Delola nna attu ya lela bodola'a lo Jesús‑ni len a chupa ka benne gwanalhake bieha. Ka benneha yu'uke neda diake lhe'exxi. 13 Ka benneha nna beyekike gwattixxi'akanie adí ka benneha, ttaka nigaba ge ka benne chupaha a ugía leke.
Jesús‑ni ridhelhe ka benne rudhetinieha kini tsiake kixxi'ake ka tisa geeha
(Mt. 28:16-20; Lc. 24:36-49; Jn. 20:19-23)
14 Iki deliba nuha nna tti bele'e lo Jesús‑ni len ka benne sineaha tti yu'uke go yettaha. Utise ke kumu de ttu tsaba labí ridielhake tsia leke ge ka benne chi bilákanie bie deki beyaka banie. 15 Nianna tti ra Jesús‑ni ke:
―Gwaltsia itú tte yiesi lo yu‑ni nna gwalikixxi'ani iyá ka benne ka tisa ge Tata Do Yebáha. 16 Ka benne tsia leke neti nna gadike inda, ka benneha godilába Tata Do Yebáha ke. Ttaka ka nu abittu tsia lekani neti, urixxi ukinnibe kana. 17 Ka nuní ka milagru uni ka nu tsia lekani neti: neti udettikana tti ebeakana ka espíritu xxegwi yu'u lati ka benne, lhe anágaba innegabakana attu tisa subi, 18 lhe meskiba udaxxukana ttu belha nna labí kisi'a nuha kana, lhe anágaba ganna i'iyakana bixa ttu nu dia venenu ikini labí bi dhakakana lhe ttixka ixxua nákani iki ka benne rani nna gweyakaba ka benneha.
Jesús‑ni beyapie deyye yebáha
(Lc. 24:50-53)
19 Iki de unne Jesús benne anke Xxanari'iha len ka benne sinea bedhetinieha, nianna tti beyapie deyye yebáha nna besine udoe daka ná ben ge Tata Do Yebáha. 20 Ka benne bedhetinieha nna biriabake rigixxi'ake ge Jesús‑ni iyá laduba nna labe due rute nábie lenke, lhe anágaba len ka milagru ruinkeha rula'a deki nu rigixxi'akeha, nu gwalíba anka nuha. Amén]