2
Pabluha rabie Tito‑ni: “Latsiru ule'enlu ka benne”
1 Lu xa Tito, latsiru bele'eni ka benne, bele'e kanie atti ttega ra ka tisa tse rule'eri'i ge Cristuha. 2 Ka tatuxtoo to‑na usi ke
kweki itá leke, abittu bitti uinke,
lhe akake ka benne dika tsia leri'i ke,
lhe anágaba akake ka benne lade'axa ulaba leke tti uinke ttu bixa,
lhe tsia leke ge Cristuha attiba ankaba geni,
lhe anágaba akakanie ge ka benne,
lhe akake ka benne kweki besi leke lhe.
3 Ka nan to to‑na nna usi ke,
uinke attiba dika ruin ttu benne chi anke ge Tata Do Yebáha,
lhe abittu tsekike gwelhidha tisa a ixú,
lhe abittu akake ka nu dusi lhe.
Nu uinlake, ule'eke nu dika anka tse,
4 kini udhetikanie ka nuila kwiti‑na akakinna ge ka nubiyú gekani lhe akakinna ge ka xi'inkani lhe.
5 Anágaba akake ka benne lade'axa ulaba leke tti uinke ttu bixa,
lhe akagabake ka benne uin taga'a nu anka tse,
lhe anágaba akake ka benne udo leke lhe'e lisike,
lhe akake ka benne kwe tse leke lhe.
Anágaba akagabake ka benne udo nagake ge ka benne biyú geke‑na uinke nu inná ka benne‑na.
Aníha uinke kini abittu itua bala'ana ge ka tisa ge Tata Do Yebáha.
6 Anágaba ka nu kwiti‑na bele'e kinna akakana ka nu lade'axa ulaba lekani tti uinkana ttu bixa. 7 Lu nuná dhulu ugwelu xilattini, kini ilákin benne nu tse ruinlu. Tti ule'elu ka tisa ge Tata Do Yebáha bittu bixa udhea lelu lhe nu inneluha akana nu dika tsia le ka benne. 8 Tisa nu dika ixú unne, kini anáchu nna nu rigu'u ni'ani nu rule'eri'iha, ettuinna de abíru eselinna bixa innena geri'i.
9 Usi ka nu to'o lo sina ge ka xxanakinna, uinkana nu inná ka nuná, uinkana iyá nu dika tsu'u le ka xxanakinna lhe bittu elhapi ro'okani ka nuná lhe. 10 Abittu udaxxu sigákana nu tee ge ka nuná. Ule'e loola kana deki gwa ankakana benne nu dika uxxen leri'i gekani. Aníha kini len elha ruin gekaniha ule'e lookana nu tse ruin ka tisa rule'eri'i ge Tata Do Yebaa benne rodilábie ri'iha.
11 Kumu Tata Do Yebáha chi bele'ebie elha tse geeha lenri'i, delába chi benie kini iyába ka benne se'e yiesi lo yu‑ni gwalábake kini abittu tsia nnittike, 12 lhe anágaba rule'enie ri'i kini udhanri'i nu abittu ru'u le Tata Do Yebáha, lhe kini udhanri'i nu satsa reta leri'i ruinri'i yiesi lo yu‑ni lhe. Aníha kini tse'eri'i kweki itá leri'i nnanna lhe uinri'i attiba ankaba geni lhe, anágaba udo leri'i nu anka ge Tata Do Yebáha, 13 lhe len elha gwedeaka lasi tse'eri'i kwedari'i la sá tti esia Jesucristuha dedábie lhe'e xiani geeha. Labie anke Diosi geri'i ra xxeni lebie lhe anke benne rodilábie ri'i lhe. 14 Labie betebie elha nabani gebie ki uttie utixe geri'i, kini odilábie ri'i lo iyá nu satsa ruinri'i lhe kini ocharie ri'i ki akari'i gebie. Aníha kini udo leri'i uinri'i iyá nu anka tse.
15 Nuní bele'e kanie lhe usi ke uinke lhe. Tti bixa uinke nna utisa ke kumu lu gwa rapalu lo neda ki uinlu nuní, laxkala abittu dhielhalu nuxa ku'u ni'ani lu.