17
Ra biiya cabe bidxaa Jesús
(Mr. 9.2-13; Lc. 9.28-36)
Gudi'di xhoopa gubidxa de ngue, yené Jesús Pedru ne Jacobo ne Juan bi'chi Jacobo, ne idapa si cabe uyé cabe lu ti dani soo. Ne raqué mala biiya cabe ma adxé modo bihuinni Jesús purti bizaani lú casi ruzaani gubidxa, ne bihuinni xhaba be casi biaani'. Ne mala bihuinni caní' né Moisés ne Elías laabe. Oraque na Pedru rabi laabe:
Aque galán nuu nu rarí nja'. Pa racala'dxu la? zucui du chonna ranchu huiini', tobi para lii, ne stobi para Moisés ne stobi para Elías.
Caní' ru Pedru, mala biseegu ti za laacabe. Nabé ruzaani za que, ne ucuá ti ridxi lade ni:
―Ndi nga Xiiñe ni nadxiee ne ni rusieche naa. Laucaa diaga laabe.
Casi bina diaga ca discípulu ridxi que, biaba rilú ca layú ne nabé bidxibi ca'. Oraque bidxiña Jesús ne uda'na laacabe, na:
―Laguiasa, cadi idxibi tu.
Para gundisa lú cabe ne ma qué ñuuya ru cabe iruti sínuque Jesús si.
Ne ora ziyete cabe de lu dani que, gudxi Jesús laacabe cueza cabe guiasa si Hombre Biseenda Dios de lade gue'tu ti iní' cabe ni biiya cabe que. 10 Oraque unaba diidxa ca discípulu stibe laabe, na ca':
―Xiñee na ca maistru de ley zeeda Elías ante gueeda ni nexhe guseenda Dios que ya'.
11 Para rabi be laaca':
―Dxandí nexhe gueeda Elías primeru para quixhe chaahui irá cosa. 12 Peru cayabe laatu, ma beeda Elías ne qué ñacabiá' cabe laa sínuque bi'ni cabe laa ni ucala'dxi cabe. Ne zacaca zuni cabe Hombre Biseenda Dios.
13 Oraque ru biene ca discípulu cuzeete be Juan Bautista nga Elías.
Ra bisianda Jesús ti hombre buiini napa ataque
(Mr. 9.14-29; Lc. 9.37-43)
14 Ora yendá cabe ra nuu binni la? bidxiña ti hombre ra nuu be, bizuxibi xañee be, na rabi laabe:
15 ―Señor, rinaba lii guiá lu xiiñe ri', purti rudii ataque laabe ne nabé racaná be. Stale tiru riaba be lu gui, o pacaa ndaani nisa. 16 Ma bedaniá laabe ra nuu ca discípulu stiu' peru qué ñanda nusianda ca laabe.
17 Oraque na Jesús:
―Aque qué runi cre tu xa, binni ca', ne naguidxi ladxidó' to. Dede padxí naquiiñe guiaana nia laatu ne gune huantar laatu ya'. Latané laabe rarí yanna.
18 Casi bidxiña hombre huiini que, udinde né Jesús binidxaba ni napa be que, para biree de laabe, ne oraqueca bianda be.
19 Birá si binni que bireeche, beeda ca discípulu sti Jesús ra nuu, ne na ca rabi ca laa:
―Xiñee laadu qué ñanda nibee du binidxaba que pue.
20 Para rabi be laaca':
―Ti huaxié' napa tu fe xa. Laucaa diaga chaahui ni chi tidxe laatu ri': Pa ñapa tu fe, neca bia' ti biidxi mostaza la? ñanda ñabi tu dani ri iree de ra nuu, che sti ladu, ne ñe ni, ne gasti qué ñaca nagana para laatu. 21 Peru binidxaba zacá la? qué riree ca pa qué iní' né binni Dios ne guiaana sin go.
Bigueta bizeete Jesús zati
(Mr. 9.30-32; Lc. 9.43-45)
22 Dxi canazá cabe neza Galilea, na Jesús rabi laacabe:
―Naa nga Hombre Biseenda Dios. Zutoo cabe naa lu binni guidxilayú, 23 ne zuuti ca naa, peru zabane raguionna gubidxa.
Ne ora bina diaga ca discípulu ni uní' be que la? nabé ucaná ladxidó' ca'.
Ra udixe Jesús impuestu sti yu'du'
24 Ora yendá cabe ndaani guidxi Capernaum, beeda caadxi hombre ni ruquixe impuestu sti yu'du ro' ra nuu Pedru, ne unaba diidxa ca laabe pa riguixe xpixuaana cabe impuestu. 25 Para na be:
―Riguixe pue.
Ne ora biuu be ndaani yoo ra ñabi be ni Jesús la? laga Jesús gudxi ni laabe. Na Jesús rabi laabe:
―Xi na lu ya', Simón. Tu ruquixe ti rey impuestu, ca xpinni la? o cani zeeda de sti guidxi.
26 Para na be:
―Binni si ni zeeda de sti ladu.
Para na Jesús rabi laabe:
Entonce qué riguixe ca xpinni be pue. 27 Peru neca cadi naquiiñe quixe xpinni rey la? zaguixe nu ni ti qué gapa cabe xi pur iní' cabe laanu. Yanna uyé uriá nisa ne bisaba anzuelu stiu'. Primé ca benda inaaze lu ulee, ne bixhele ruaa me. Zadxela lu ti moneda. Ucuaa ni, ne uyé ra nuu cabe, gudixe stiu' ne stinne'.