1 Abaho MNDEWA kamulongela Musa, “Nogala utamu umwe uyagwe wihile ng'hani ha Falao na isi yose ya Misili. Uhesha utamu uno, kowaleka mulawe kulawa muisi ino. Yahawaleka mchole, kowaleka dimwe kwa dimwe. 2 Walongele wanhu wa Islaeli watwanzi na wambigalo kamba, wapule vinhu va zahabu na madini ga feza kulawa ha Wamisili wokala behi nao.” 3 MNDEWA kawatenda Waislaeli watogoligwe na Wamisili. Na Musa kakala munhu yoneke kuwa munhu mkulu ng'hani muisi ya Misili, yahishimilwe na salange za Falao hamoja na wanhu wa Misili.

4 Abaho Musa kamulongela Falao, “MNDEWA kolonga vino, ‘Lelo kilo kikulu nobita muisi ya Misili, 5 na kila mwana mbigalo wa udele muisi ya Misili kodanganhika, songela mwana mbigalo wa udele wako gweye, ayo yokala mkigoda chako cha undewa, mbaka mwana mbigalo wa udele wa nyakadala wa kitwanzi yali ha dibwe jake da kusiginhila, na wana wa udele wa wang'onyo wose vivija wodanganhika. 6 Abaho kowa na kililo kikulu muisi yose ya Misili, kihile ng'hani acho hakinalawilila mazua ga kuchugu na hakiza kulawilila kabili. 7 Ila hanhu hondawakale Waislaeli hopozika, haduhu umbwa yondayawabwakile Waislaeli, haduhu umbwa yondayawabwakile wanhu ama wang'onyo zao, giladi mvitange kamba MNDEWA keka mbaka hagatigati ya Waislaeli na Wamisili. 8 Abaho salange zako wano wose wokwiza kumwangu nie na kufugama mavindi wokiinamila wolonga, “Gweye na wanhu wokukoleleza gweye segeleni.” Abaho nosegela.’ ” Abaho Musa kasegela na lusango kulawa ha Falao.

9 MNDEWA kamulongela Musa, “Falao hakutegeleza, giladi mizonza yangu yongezeke muisi ya Misili.” 10 Musa na Haloni waitenda mizonza ino yose haulongozi wa Falao. Ila MNDEWA kautenda moyo wa Falao kuwa mdala, na hawalekile wanhu wa Islaeli kulawa hanze ya isi yake.