1 MNDEWA kawalongela Musa na Haloni muisi ya Misili, 2 “Mulenge uno wowa mulenge wa ichanduso wa mulao kumwenu. 3 Walongele wanhu wose wa Islaeli kamba mdizua da longo dimwe da mulenge uno, kila mbigalo yamsole mwanang'hondolo ama mwanamenhe sama ya wanhu wa ng'anda yake. 4 Kamba wanhu wa ng'anda yake wadodo mmheta na hawadaha kumja mwanang'hondolo mgima, basi na waiduganye na wanhu wa ng'anda ya behi yao wamje hamoja. Ija imwanang'hondolo kolondigwa yagoligwe vidanga viilingile na wanhu wondawamje. 5 Mng'onyo yondamumsagule kolondigwa yawe songolomi wa mulao umwe, sambiyawe na ulemale, umsole kulawa mkikwama cha ng'hondolo ama menhe. 6 Abaho mdizua da longo dimwe na nne da mulenge uno, wanhu wose wa Islaeli wolondigwa wawachinje iwang'onyo mkipigiti cha ichungulo. 7 Wasole mulopa kidogo wa iwang'onyo na kuubaka mmihimili mibili ya zinyivi zao na mkizingiti cha uchana cha izing'anda zondawadile iwang'onyo. 8 Wolondigwa wazije zinyama ikilo iija, wolondigwa wazije zikokigwe mmoto, hamoja na mikate ilibule mela hamoja na mboga zili usungu. 9 Sambizidigwe zili mbisi ama zitogoswe mmazi, ila mzikoke mmoto hamoja na ditwi jake, migulu yake, na vinhu vake va mgati. 10 Sambimsigaze kinhu chochose mbaka imitondo. Kamba kuna kinhu chochose kisigale mbaka imitondo, molondigwa mkisome. 11 Vino vivo vondamuije. Muje kuno kila munhu yafungile mkwiji mchuno chake, na kuvala ng'hwabasa zake mmagulu gake, na kuigoga fimbo yake mumkono wake, na molondigwa mumje himahima. Kwavija luno lulo Lusona lwa Pasaka lutendigwa sama ya kunihishimila nie, MNDEWA.

12 “Kwavija ikilo ija nobita muisi yose ya Misili na kumtoa kila mwana wa udele wa kimbigalo wa munhu na mng'onyo, na noigala nhaguso ha miungu yose ya Misili. Nie iyo MNDEWA. 13 Uja umulopa mmihimili wowa kilaguso kumwenu mzing'anda zondamkale, na nihawona umulopa, nobita uchana yenu, na haduhu utamu wihile ng'hani wondauwabanange mweye kipigiti vondaniitoe isi ya Misili. 14 Zua dino dowa zua da ng'humbukila ya gaja ganitendile kumwenu. Molondigwa mdideng'hele diwe lusona ha nie, MNDEWA, mzing'holo zenu zose, na iwe ndagizi ya milao yose ikwiza.”

15 MNDEWA kalonga, “Mmazua saba dieni mikate ilibule mela. Mdizua da ichanduso molondigwa msegeze mela jose mzing'anda zenu, kwavija munhu yoyose yoja mkate uli na mela songela zua da ichanduso mbaka zua da saba kolondigwa yasegezigwe kulawa mmwanza wa wanhu wa Islaeli. 16 Zua da ichanduso muwe na mting'hano ung'alile, vivija na zua da saba muwe na mting'hano ung'alile. Sambimsang'hanike sang'hano yoyose mmazua gano mabili, ila ino iyo sang'hano yondamuitende, telekeni mandia giladi kila munhu yaje. 17 Tendeni Lusona lwa Mikate Ilibule Mela, kwavija lowakumbusa kamba, dino dijo zua nie diniilavile mitala yenu kulawa muisi ya Misili. Mulutende lusona luno mmilelo yenu yose. 18 Dieni mikate ilibule mela, songela ichungulo ya zua da longo dimwe na nne, mbaka ichungulo ya zua da malongo mabili na imwe da mulenge wa ichanduso. 19 Mmazua saba sambikuwe na mela mzing'anda zenu, kwavija munhu yoyose yondayaje mandia gali na mela kolondigwa yasegezigwe kulawa mmwanza wa wanhu wa Islaeli, kamba yahawa muhenza ama mwenekae. 20 Sambimuje kinhu chochose kili na mela mgati yake. Kokose kondamuwe, dieni mikate ilibule mela.”

21 Musa kawakema wavyele wose wa Islaeli na kuwalongela, “Gendeni hima mkawasagule wanang'hondolo ama wanamenhe muwachinje, giladi milango yenu itende Lusona lwa Pasaka. 22 Ukingeni umulopa mumkungu, abaho soleni vitambi va m'biki ukemigwa hisopo, vizabikeni mmulopa, abaho bakeni m'vizingiti va uchana va izinyivi na mmihimili ya mumgwazo ya izinyivi za ng'anda zenu. Na munhu yoyose sambiyalawe hanze kubitila mulwivi mbaka imitondo. 23 Kwavija MNDEWA yahabita muisi kuwakoma Wamisili, kowona umulopa muna ivizingiti va uchana ya izinyivi na mmihimili mibili ya izinyivi, kobita uchana ya izing'anda zija na hamuleka im'bananzi yengile mzing'anda zenu na kuwakoma. 24 Molondigwa mzigoge ndagizi zino ziwe ndagizi za digunge, kumwenu mweye hamoja na wanenu. 25 Muhengila muna iisi ija MNDEWA iyekile kilagano na mweye kamba kowagwelela, mkalutende lusona luno. 26 Na wanenu wahawauza, ‘Lusona luno nhegulo yake choni?’ 27 walongeleni, ‘Ino iyo nhosa ya kuchinja wang'onyo ha MNDEWA ikemigwa Pasaka, MNDEWA ayo yabitile uchana ya izing'anda za Waislaeli muisi ya Misili na kuzileka ng'anda zetu kipigiti viyawakomile wana wa udele wa Wamisili.’ ”

Abaho Waislaeli wose wafugama mavindi wainamila mbaka hasi na kutambika. 28 Waislaeli wachola na kutenda kamba MNDEWA viyawalagize Musa na Haloni.

29 Kilo kikulu MNDEWA kawakoma wana wa udele wose wali muisi ya Misili, songela mwana mbigalo wa udele wa Falao, ayo yakalile mkigoda chake cha undewa, mbaka mwana mbigalo wa udele wa mfungigwa yakalile mdigati da hasi diliziza, na wana wa udele wa wang'onyo. 30 Falao na salange zake na wanhu wose wa Misili wenuka ikilo ija, na kukala na kililo kikulu ng'hani muisi yose ya Misili, kwavija hakukalile na ng'anda ikalile bule munhu yadanganhike. 31 Abaho ikilo iija Falao kawakema Musa na Haloni na kuwalongela, “Halaweni! Segeleni kulawa mwa wanhu zangu, mweye hamoja na Waislaeli wose! Gobokeni, gendeni mkamtambikile MNDEWA kamba vumpulile. 32 Soleni vikwama venu va ng'hondolo na ng'ombe kamba vumulongile na muhalawe. Vivija munimoteze na nie.”

33 Wamisili wose wawayalalila Waislaeli walopole kulawa muisi yao, kwavija walonga, “Kamba muhasigala hano, tweye tose todanganhika.” 34 Avo wanhu wasola mitonge ya ngano ikandigwe bila mela, waimemeza m'vikalango vao va kukandila, waizingiliza m'vivalo vao, na kuipapa mmaega gao. 35 Waislaeli wakala weshile kutenda kamba Musa viyawalongele. Wakala wawapulile Wamisili vinhu va zahabu na madini ga feza, hamoja na vivalo. 36 MNDEWA kawatenda Waislaeli watogoligwe na Wamisili, avo wawagwelela chochose chawalondile. Avo wawabokonya Wamisili vinhu vao.

37 Waislaeli wasonga mwanza kulawa wambo da Lamesesi mbaka kiwambo cha Sukuti, wotembela na magulu. Wakala wambigalo laki sita, uhaleka watwanzi na wana wadodo. 38 Na wanhu wayagwe bwando wakalile si Waislaeli wachola hamoja na hewo hamoja na madale makulu ga ng'hondolo, menhe, na ng'ombe. 39 Woka mikate ilibule mela kulawa mmitonge ya ngano iwalawile nayo kulawa Misili, ija imitonge ya ngano ikala bule mela kwavija wawingigwa kulawa muisi ya Misili avo hawapatile kipigiti cha kusasala mandia gao.

40 Waislaeli wakala muisi ya Misili mkipigiti cha milao mia nne na malongo madatu (430). 41 Vuimalile milao mia nne na malongo madatu, zua didija mitala yose ya MNDEWA isegela kulawa muisi ya Misili. 42 Ikilo ija MNDEWA kagonelela mkuwemiliza kipigiti viyakalile yowalava Waislaeli kulawa muisi ya Misili. Na ikilo ya zua kamba didija Waislaeli wose hamoja na milelo yao ikwiza wolondigwa wagonelele mkumuhishimila MNDEWA.

43 MNDEWA kawalongela Musa na Haloni, yolonga, “Zino zizo ndagizi za Pasaka. Muhenza sambiyaje mandia ga Pasaka, 44 ila nyakadala uyumgulile na wishile kumwingiza kumbi kodaha kuja mandia ga Pasaka. 45 Ila haduhu muhenza ama kibalua yalekile kuwa Muislaeli yondayaje mandia ga Pasaka. 46 Yolondigwa idigwe muna ing'anda imwe, na kinhu chochose kulawa muna imng'onyo hiyo sambikilavigwe hanze ya ng'anda ija, na luzege lwa ija ing'hondolo wa Pasaka sambiulubene. 47 Wanhu wose wa Islaeli wolondigwa walutende lusona luno. 48 Muhenza yokala hamoja na mweye yahalonda kulutenda Lusona lwa Pasaka ya MNDEWA, kolondigwa yawengize kumbi wambigalo wose wali mng'anda yake, abaho kolinga kamba Muislaeli wa kuvumbuka. Ila munhu hanakwingila kumbi sambiyaje mandia gano. 49 Ndagizi zino zima sama ya Waislaeli wa kuvumbuka hamoja na wahenza wokala mmwanza wenu.” 50 Waislaeli wose watogola na kugatenda gaja MNDEWA gayawalagize Musa na Haloni. 51 Mdizua didija MNDEWA kailava mitala ya Waislaeli hanze ya isi ya Misili.