1 MNDEWA kamulongela Musa, 2 “Wana wose wa udele wa kimbigalo muwabagule sama yangu nie, kwavija kila mwana mbigalo wa udele wa Muislaeli wangu nie, mwana mbigalo wa munhu ama mng'onyo.”

3 Musa kawalongela wanhu, “Kumbukileni zua dino dimulawile muisi ya Misili, ako kumkalile nyakadala, kwavija MNDEWA kawalava mweye kulawa haja na mkono wene mhiko, avo sambimje mikate ili na mela. 4 Lelo muna umulenge uno wa Habibu, mosegela. 5 MNDEWA kawagala muisi ya Wakanaani, Wahiti, Waamoli, Wahivi, na Wayebusi, isi iyawaduilile wahenga zenu kamba kowagwelela mweye, isi ili na lutuba na ugoli, avo molondigwa mtende lusona mmulenge uno mmilao yose ikwiza. 6 Mazua saba molondigwa kuja mikate ilibule mela, na mdizua da saba kowa na lusona sama ya MNDEWA. 7 Mikate ilibule mela yolondigwa idigwe mmazua saba, sambiwoneke mkate uli na mela mmwenu na sambijoneke mela mmwanza wenu na muisi yenu yose. 8 Mdizua dija vondamsonge ulusona, wasimulile wanago kamba, ‘Notenda mbuli zino zose sama ya gaja gayatendile MNDEWA kipigiti vunilawile muisi ya Misili.’ 9 Lusona luno londalutendeke kila mulao lowa kamba kilaguso mumkono wenu na lukumbuso m'vihanga venu kamba Malagizo ga MNDEWA golondigwa mgalonge na kuifunza, kwavija MNDEWA kawalava muisi ya Misili na mkono wake wene mhiko. 10 Mdigoge lagano dino mkipigiti kikigwe kulawa mulao umwe mbaka mulao uyagwe.

11 “MNDEWA yahawengiza muisi ya Wakanaani na kuwagwelela mweye isi ija kamba viyawaduilile mweye na wahenga zenu, 12 molondigwa mmulavile MNDEWA wana wenu wose wa udele wa kimbigalo na wana wa udele wose wa kimbigalo wa wang'onyo zenu kwavija wano wose wake heyo. 13 Ila kila chaudele wa mhunda kolondigwa umkombole na mwanang'hondolo, na kamba humkombole, kolondigwa um'bene singo yake. Kila mwana mbigalo wa udele mmwanza wa wanago kolondigwa umkombole. 14 Mazua ga hamwande mwanago yahakuuza, ‘Mbuli ino nhegulo yake choni?’ gweye umulongele, ‘MNDEWA katulava kulawa muisi ya Misili na mkono wene mhiko, ako kutukalile nyakadala. 15 Ahaja Falao viyakalile na moyo mdala na kulema kutuleka tusegele, MNDEWA kawakoma wana wose wa udele wa kimbigalo muisi yose ya Misili, wana mbigalo wa udele wa wanhu na wa wang'onyo. Avo, kino kicho kilamso cha nie kumulava nhosa ha MNDEWA kila mwana mbigalo wa udele wa mng'onyo wangu na kumkombola na hela kila mwanangu wa udele wa kimbigalo.’ 16 Lusona luno lowa kamba kilaguso mmakono genu na lowa kamba utango m'vihanga venu kamba MNDEWA katulava muisi ya Misili na mkono wake wene mhiko.”

17 Falao viyawalekile Waislaeli wachole, Mulungu hawalongozele kunzila ilongoze kuna iisi ya Wafilisti hata kamba nzila ija ikala nguhi, kwavija Mulungu kalonga, “Kamba wanhu wano wahaiting'hana na ng'hondo, wogalula ngelegeza zao na kubweleganya muisi ya Misili.” 18 Avo Mulungu kawalongoza kubitila nzila ya mzunguluko ya muluwala ng'ambu ya Bahali Ndung'hu. Waislaeli wakwela na kulawa hanze ya isi ya Misili kuno waisasale na ng'hondo.

19 Musa kaisola mizege ya Usufu, kwavija Usufu kawalonda Waislaeli waiduile avija viyalongile, “Mulungu kokwiza kuwakombola, yeheza kuwakombola, muisole na mizege yangu kulawa hano mchole hamoja nayo.”*Ija imizege ya Usufu wachola nayo na kuizika muisi ya Kanaani. 20 Viwasegele mkiwambo cha Sukuti, wachola kwika ng'hambi hanhu hokemigwa Esamu, halumambukizile uluwala. 21 Kipigiti cha imisi MNDEWA kawalongola haulongozi wao mdiwingu dilingile na nguzo giladi yawalagusile nzila, na kipigiti cha ikilo kawalongola haulongozi wao mmoto ulingile na nguzo giladi yawagwelele mulangaza giladi watembele misi na kilo. 22 Dija diwingu dilingile na nguzo mazua gose diwalongola kipigiti cha imisi, na uja umoto ulingile na nguzo uwalongola kipigiti cha ikilo.