1 Abaho MNDEWA kamulongela Musa, 2 “Walongele Waislaeli wabwele kuchugu na kwika ng'hambi haulongozi wa kiwambo cha Pi-Hahiloti, hagatigati ya kiwambo cha Migidoli na Bahali Ndung'hu, behi na kiwambo cha Baali-Zefoni. 3 Falao kokwagiza, ‘Waislaeli wozunguluka muisi mkwazanywa, kuno wazungulukwe na luwala.’ 4 Na nie nougela udala moyo wa Falao, na heyo kowakweleleza. Ila nie noigwelela mwenyego yenzi kubitila Falao na asikali zake wose. Na Wamisili wovitanga kamba nie iyo MNDEWA.” Avo Waislaeli watenda kamba viwalongeligwe. 5 Falao viyalongeligwe kamba Waislaeli wachola, ngelegeza zake na za salange zake zigaluka, avo kalonga, “Tutenda choni? Tuwaleka Waislaeli wachola na kuwatenda sambiwawe nyakadala zetu!” 6 Avo kawalagiza salange zake wadisasale kwama jake abaho kawasola asikali zake. 7 Kaisola mikwama mia sita inogile hamoja na mikwama yose iyagwe ya isi ya Misili, na kila kwama dikala na maaskali mgati yake. 8 MNDEWA kautenda moyo wa Falao kuwa mdala, avo kawakoleleza Waislaeli wakalile wasegele kuno wokiidandaya. 9 Wamisili wawakoleleza. Falasi wose wa Falao, mikwama yake, wagala mikwama zake, na asikali zake wawakoleleza na kuwavika hamgwazo wa Bahali Ndung'hu, haulongozi wa kiwambo cha Pi-Hahiloti behi na kiwambo cha Baali-Zefoni hawekile ng'hambi yao.

10 Falao viyawakwenhukile Waislaeli, Waislaeli walola kukisogo, na kuwona Wamisili wowakweleleza. Waislaeli wadumba ng'hani na kumulilila MNDEWA. 11 Wamulongela Musa, “Kwavija kuduhu mapanga kuisi ya Misili, kileka mana utulavile na kutugala kutali giladi tudanganhikile muluwala? Habali ututendele gano, kutulava muisi ya Misili? 12 Kipigiti vitukalile Misili hatukulongele kamba, ‘Tuleke tuwasang'hanikile Wamisili’? Vihanogile tuwasang'hanikile Wamisili kubanza kudanganhikila muluwala.”

13 Ila Musa kawalongela wanhu, “Sambimdumbe. Mweye mtamanileni Mulungu, mwone ukombola MNDEWA wondayawalagusile mweye lelo. Wamisili muwona lelo, hamwiza kuwona kabili. 14 MNDEWA kowagombela mweye, na mweye monyamala tulu.”

15 Abaho MNDEWA kamulongela Musa, “Habali ugendelela kunililila nie? Walongele Waislaeli wagendelele na mwanza. 16 Inula fimbo yako na uugolose mkono wako kuna ibahali, na mazi goigola na Waislaeli woikanhiza ibahali mkubita muisi inyalile. 17 Abaho noitenda mioyo ya Wamisili kuwa midala avo na hewo wowasondolela hachugu chenu, avo nopata yenzi mkum'bananga Falao na asikali zake wose, mikwama yake, na wagala mikwama zake. 18 Na Wamisili wovitanga kamba nie iyo MNDEWA ahaja vondanipate yenzi kubitila Falao na mikwama yake na wagala mikwama zake.”

19 Msenga wa Mulungu wa kuulanga yakalile haulongozi wa Waislaeli kasegela na kubwela kuchugu cha Waislaeli, na dija idiwingu dilingile na inguzo vivija disegela haulongozi na kubwela kuchugu chao, 20 dija idiwingu dilingile na inguzo dikala hagatigati ya ididale da asikali wa Misili na Waislaeli. Dija idiwingu dilingile na nguzo digela ziza kudidale da asikali wa Misili, na kugala mulangaza mwa wanhu wa Islaeli. Avo dale da asikali wa Misili hadidahile kuwakwenhukila Waislaeli ikilo ngima. 21 Abaho Musa kaugolosela mkono wake kuna ibahali, na MNDEWA katenda nzila mmazi na ubeho wene mhiko kulawa ulawilo wa zua, ubeho ukalile ubuma kilo yose, na kugatenda mazi ga ibahali gakiigole na kuwa isi inyalile. 22 Waislaeli wabita m'bahali kuno wobojaga isi inyalile, mazi gatenda viwambaza ng'ambu yao ya ukumoso na ukulume. 23 Wamisili wawakoleleza, na falasi wose wa Falao na mikwama yake yose na wagala mikwama zake wose. 24 Behi na usiku kucha, kulawa mmoto ulingile na nguzo na idiwingu dilingile na inguzo, MNDEWA kalola hasi na kuwatenda asikali wa Wamisili wazanywe. 25 Kagatenda maguludumu ga mikwama yao ganamate, avo zizunguluka na mkwekwe. Waja Iwamisili wailongela, “Natukimbile kulawa hano kwavija MNDEWA kowagombela Waislaeli na kututoa tweye.”

26 Abaho MNDEWA kamulongela Musa, “Golosela mkono wako kuibahali giladi mazi gawabwelele na kuwagubika Wamisili, mikwama yao, na wagala mikwama zao.” 27 Avo Musa kaugolosela mkono wake kuibahali, na viivikile imitondo, bahali isonga kubweleganya kamba vija viikalile. Wamisili viwakalile wogakimbila igamazi, MNDEWA kawakung'hunila m'bahali. 28 Mazi gabwela na kuigubikiza imikwama, wagala mikwama, na asikali wose wa Falao wakalile wowakweleleza Waislaeli m'bahali, hasigale hata munhu imwe. 29 Ila Waislaeli wakala wobita muisi inyalile hagatigati ya ibahali kuno viwambaza va mazi vimile kumoso na ukulume.

30 Zua dija MNDEWA kawakombola Waislaeli kulawa mmakono ga Wamisili, na Waislaeli wawona Wamisili wadanganhike mumgwazo wa ibahali. 31 Na Waislaeli viwawene mhiko ng'hulu iyalaguse MNDEWA ha Wamisili, wanhu wamdumba MNDEWA na kwika nhamanila yao kumwake na ha Musa mtumigwa wake.