1 Waislaeli wose wasegela Elimu, wavika Muluwala lwa Sini, uli hagatigati ya Elimu na Gongo da Sinai. Dino dikala zua da longo dimwe na tano da mulenge wa ikabili, mulenge umwe songela viwasegele muisi ya Misili. 2 Haja muluwala Waislaeli wose wawatwanganikila Musa na Haloni. 3 Waislaeli wawalongela, “Vihanogile MNDEWA yahatukomile muisi ya Misili. Ako kutukalile tuzizunguluka nongo za nyama na kuja vakuja vose vitulondile. Ila mweye mtugala hano muluwala giladi kudikoma dale dino jose na nzala.”

4 MNDEWA kamulongela Musa, “Sambi nowatoela mvula ya vikate kulawa kuulanga sama yenu mweye mose. Kila zua wanhu wolawa hanze na kudondola vikate va zua dimwe. Mnzila ino nowageza mweye giladi nyone kamba moziwinza ndagizi zangu. 5 Zua da sita wabanzilize kudondola, wadondole mianza mibili ya ivikate vija viwakalile wodondola mazua gabitile. Abaho wavisasale.”

6 Avo Musa na Haloni wawalongela Waislaeli wose, “Ichungulo movitanga kamba MNDEWA iyo yawalavile mweye muisi ya Misili. 7 Imitondo moyona yenzi ya MNDEWA, kwavija kahulika vumumtwanganikile. Tweye iwo walihi hata mtutwanganikile?” 8 Musa kagendelela kulonga, “Movitanga kamba MNDEWA iyo yawagwelele nyama muje kipigiti cha ichungulo na vikate mwigute kipigiti cha imitondo kwavija kahulika vija vumkalile mumtwanganikila. Tweye iwo walihi hata mtutwanganikile? Hamtutwanganikile tweye ila mumtwanganikila MNDEWA.”

9 Musa kamulongela Haloni, “Walongele Waislaeli wose, ‘Izoni haulongozi wa MNDEWA, kwavija kahulika kutwanganika kumwenu.’ ” 10 Kipigiti Haloni viyakalile yolonga na Waislaeli wose, walola kuluwala, na bahaja yenzi ya MNDEWA ilawilila mdiwingu.

11 Abaho MNDEWA kamulongela Musa, 12 “Nihulika kutwanganika kwa Waislaeli. Walongele, ‘Ichungulo moja nyama, na imitondo mokwigutizwa na mikate. Abaho movitanga kamba nie iyo MNDEWA Mulungu wenu.’ ”

13 Ichungulo ija weza ng'hwale na kuigubika ing'hambi, na imitondo dilawilila tungwe kuzunguluka ing'hambi. 14 Dija iditungwe vidisegele muluwala, voneka vidanga vibanhibanhi vizelu vili kamba balafu visigale muisi. 15 Waislaeli viwonile gano, wakiuza, “Kinhu chaki kino?” Kwavija hawavitangile kikala kinhu chaki.

Musa kawalongela, “Uno uwo mkate MNDEWA uyawagwelele muje. 16 Vino vivo MNDEWA viyalagize, ‘Kila munhu yadondole kiasi choyolonda kuja. Kila munhu imwe mdihema jako kolondigwa yapate pishi mbili.’ ”

17 Waislaeli watenda kamba viwalagizigwe, wayagwe wadondola bwando, na wayagwe wadondola kidogo. 18 Ila viwapimile, ija yadondole bwando hawile na bwando, na ija yadondole kidogo hawile na kidogo. Kila munhu kadondola kiasi chayalondile kuja. 19 Abaho Musa kawalongela, “Munhu yoyose sambiyasigaze vikate hivo mbaka imitondo.” 20 Ila wanhu wayagwe hawamtegeleze Musa. Wasigaza mbaka imitondo, ila bundo na mhembele walawa mvikate vija. Avo Musa kawonela lusango. 21 Kila imitondo kila munhu kadondola kiasi chayalondile kuja, na zua vidikalike dikwaka, vija ivikate visigale hasi viyangayuka.

22 Zua da sita Waislaeli wadondola ivikate mianza mibili, kila munhu pishi nne. Wakulu wose wa Waislaeli wamcholela Musa na wamulongela mbuli zija, 23 Musa kawalongela, “Vino vivo MNDEWA viyalagize, ‘Mayo yowa Zua da Mhumulo ding'alile, Sabato ing'alile ha MNDEWA.’ Avo lelo moke kija kimulonda kukoka na mtogose kija kimulonda kutogosa, na kija kisigale mkike mbaka imitondo.” 24 Avo wageka mbaka imitondo kamba Musa viyalagize, na imitondo iyagwe mandia gaja gasigale hagalavile bundo ama kulava mhembele. 25 Musa kawalongela, “Lelo dieni ivikate hivo, kwavija lelo dijo Zua da Mhumulo dikigwe sama ya MNDEWA. Lelo hakuwa na mana muisi. 26 Dondoleni ivikate mmazua sita, ila zua da saba dowa Zua da Mhumulo, mdizua hijo hakuwa na vikate muisi.”

27 Mdizua da saba wanhu wayagwe walawa hanze kudondola ivikate, ila hawapatile kinhu chochose. 28 MNDEWA kamulongela Musa, “Mbaka kipigiti chaki mweye wanhu molema kugagoga malagizo gangu na ndagizi zangu? 29 Kumbukileni kamba nie, MNDEWA, niwagwelela mweye Zua da Mhumulo, kileka mana mdizua da sita niwagwelela mandia ga kuwegutiza mmazua mabili, mdizua da saba kila munhu kolondigwa yakale hanhu hayali sambiyalawe kunze.” 30 Avo wanhu wahumula zua da saba.

31 Waislaeli wagakema mandia gaja mana. Gakala galingile kamba mbeyu ndodo nzelu, na uhagalanza, galinga kamba vikate vibanhibanhi vitendigwe na uki. 32 Musa kawalongela, “Vino vivo MNDEWA viyalagize, kalonga, ‘Soleni pishi mbili za mana mzike sama ya milelo yondaize, giladi wawone mkate uniwagwelele mweye muje kipigiti vumkalile muluwala, kipigiti vuniwalavile mweye kulawa muisi ya Misili.’ ” 33 Musa kamulongela Haloni, “Sola kombe, ika pishi mbili za mana mgati yake, na udike haulongozi wa MNDEWA, ikigwe sama ya milelo yenu yondaize.” 34 Milenge bwando hamwande, Haloni kaika ija imana mgati ya Idisanduku da Lagano, kamba MNDEWA viyamulagize Musa, giladi sambiibanangike. 35 Waislaeli waja mana mkipigiti cha milao malongo mane, mbaka viwavikile muisi ya Kanaani, ako kuwalondigwe kukala. 36 Pishi malongo mabili galinga na efa imwe.