1 Waislaeli wose wahalawa Muluwala lwa Sini wotembela kulawa hanhu hamwe mbaka hayagwe kamba MNDEWA viyawalagize, wachola kwika ng'hambi Lefidimu, ila hanhu haja hakalabule mazi ga kung'wa. 2 Avo Waislaeli waibamilila na Musa, wolonga, “Tugwelele mazi tung'we.”

Musa kawalongela, “Habali muibamilila na nie? Habali mumgeza MNDEWA?”

3 Ila wanhu wakala na ng'hilu ng'hani na wagendelela kuibamilila na Musa. Walonga, “Habali utulavile muisi ya Misili, giladi utukome na ng'hilu, tweye na wanetu na wang'onyo zetu?”

4 Avo Musa kamulilila MNDEWA, yolonga, “Niwatendeze wanhu wano? Wa mmabehi kunitoa na mibwe giladi wang'home.”

5 MNDEWA kamulongela Musa, “Genda haulongozi wa wanhu. Wasole wavyele kidogo wa Islaeli wachole hamoja na gweye, na uisole ija ifimbo yuutoele mazi ga Lwanda lwa Naili. 6 Nie nokwima haulongozi wako behi na idibwe haja Holebu.*Holebu dijo twaga diyagwe da Gongo da Sinai. Ditoe idibwe, na mazi golawa mdibwe hijo, na wanhu wong'wa.” Musa katenda avo haulongozi wa wavyele wa Waislaeli.

7 Musa kahakema hanhu haja Masa kwavija Waislaeli waibamilila na MNDEWA, na kahakema hanhu haja Meliba kwavija wamgeza MNDEWA. Walonga, “MNDEWA ka hamoja na tweye ama vilihi?”

8 Waamaleki wachola kuwavamhila Waislaeli ako Lefidimu. 9 Musa kamulongela Yoshua, “Sagula wambigalo mchole mkagombe na Waamaleki, na mayo nokwima uchana hainhembeti ya ikigongo na fimbo ya Mulungu mumkono wangu.” 10 Avo Yoshua katenda kamba Musa viyamulongele, kachola kugomba na Waamaleki, kuno Musa, Haloni, na Huli wachola uchana hainhembeti ya ikigongo. 11 Kipigiti Musa viyagenule uchana makono gake, Waislaeli wahuma, ila viyagabwezile hasi makono gake, Waamaleki wahuma. 12 Makono ga Musa vugadonhile, Haloni na Huli wasola dibwe na kudika hasi yake yadikalile. Wagenuliza makono ga Musa, imwe ng'ambu ino na iyagwe ng'ambu iyagwe. Avo makono gake gagangamala mbaka ichungulo. 13 Avo Yoshua kawahuma Waamaleki.

14 Abaho MNDEWA kamulongela Musa, “Zandike mbuli zino mkitabu ziwe ng'humbukila. Mulongele Yoshua kamba nowabananga Waamaleki muisi.”

15 Avo Musa kazenga kilingo cha kulavila nhosa na kukikema, “MNDEWA iyo Bendela Yangu.” 16 Musa kalonga, “Mkono winula bendela ya Mulungu, MNDEWA kotenda ng'hondo na Amaleki kulawa mulelo umwe mbaka uyagwe.”