1 Mulungu kazipeta mbuli zino zose, kalonga, 2 “Nie iyo MNDEWA Mulungu wako, nikulavile muisi ya Misili, ako kuukalile nyakadala.

3 “Sambiuwe na miungu iyagwe ila nie.

4 “Sambiuitendele wegu dilingile na kinhu chochose cha uchana kuulanga ama kili hasi muisi, ama kili mmazi hasi ya isi. 5 Sambiuvifugamile mavindi ama kuvitambikila, kwavija nie, MNDEWA Mulungu wako, nna wivu, nowatagusa wana sama ya vilozo va watata zao mbaka mulelo wa ikadatu na mulelo wa ikane wa awo wanihile nie. 6 Ila nodilagusa noge jangu dilekile kuhuha ha maalufu ga milelo ya awo woninogela nie na kugagoga malagizo gangu.

7 “Sambiudikeme twaga da MNDEWA Mulungu wako mmbuli zihile, kwavija MNDEWA haleka kumtagusa munhu yoyose yodikema twaga jake mmbuli zihile.

8 “Dikumbukile Zua da Mhumulo na udibagule sama yangu nie. 9 Tenda sang'hano zako zose mmazua sita. 10 Ila mdizua da saba sambiutende sang'hano yoyose kwavija dino dijo Zua da Mhumulo da nie, MNDEWA Mulungu wako. Mdizua dino munhu yoyose sambiyasang'hanike, gweye mwenyego, mwanago wa kimbigalo ama wa kitwanzi, nyakadala wako wa kimbigalo ama wa kitwanzi, wang'onyo zako, ama wahenza wali muisi yako. 11 Kwavija mkipigiti cha mazua sita, nie nilumba isi, ulanga, bahali, na vinhu vose vikala himo, ila mdizua da saba nihumula. Avo nidimoteza Zua da Mhumulo na nidibagula sama yangu nie.

12 “Wahishimile tataako na mamaako, giladi ukale kipigiti kitali muisi inikugwelela nie, MNDEWA, Mulungu wako.

13 “Sambiukome.

14 “Sambiutende ugoni.

15 “Sambiwibe.

16 “Sambiumulavile usindila wa uvwizi munhu yali behi nagwe.

17 “Sambiusulukile ng'anda ya munhu yali behi nagwe, ama mtwanzi wake, ama nyakadala wake wa kitwanzi ama wa kimbigalo, ng'ombe wake ama mhunda wake, ama kinhu chochose kiyalinacho.”

18 Wanhu viwahulike mdumo na dizwi da imhalati na kuwona ulumwemwe na yosi dilawa mdigongo, wagudema na kona bwembwe, wema kutali. 19 Wamulongela Musa, “Longa na tweye gweye mwenyego, na tweye tokutegeleza. Ila Mulungu sambiyalonge na tweye, bule todanganhika.”

20 Musa kawalongela, “Sambimdumbe, kwavija Mulungu keza kuwageza mweye giladi mweye mumdumbe heyo na sambimtende vilozo.” 21 Ila wanhu wagendelela kukala kutali kipigiti Musa viyakalile yodikwenhukila idiziza, kuja kuyakalile Mulungu.

22 MNDEWA kamulongela Musa, “Walongele Waislaeli mbuli zino, ‘M'vona wenyego nie vinilongile na mweye kulawa kuulanga. 23 Sambimtende minyago ya madini ga feza ama zahabu na kuitambikila kamba vumunitambikila nie. 24 Munitendele kilingo cha kulavila nhosa, mkitende na ulongo. Munilavile ng'hondolo zenu na ng'ombe zenu na menhe zenu kamba nhosa za kulukuza na nhosa za tindiwalo. Zengeni kilingo changu cha kulavila nhosa hanhu hohose haniwasagulile mweye munitambikile nie, na nie nokwiza na kuwamoteza. 25 Kamba muhanizengela kilingo cha kulavila nhosa cha mabwe, sambimzenge na mabwe gasongoligwe, kwavija vija ivinhu va kusongolela vokinyolodosa ikilingo cha kulavila nhosa. 26 Sambiwike ngwandala kipigiti uhazenga kilingo cha kunilavila nhosa, giladi mwazi wako sambiwoneke kipigiti vondaukikwenhukile ikilingo.’ ”