1 MNDEWA kamulongela Musa, “Gano gago malagizo gondauwagwelele wanhu zangu. 2 Kamba uhamgula nyakadala mbigalo wa Kieblania, yakusang'hanikile mkipigiti cha milao sita. Ila mmulao wa saba yalekesigwe yachole, bila kuliha kinhu chochose. 3 Kamba kakala yezile yeiyeka, kolondigwa yachole yeiyeka. Ila kamba kipigiti viyezile kakala na mtwanzi, kolondigwa yachole na mtwanzi wake. 4 Na kamba mndewa wake yahamsolela mtwanzi, na ija imtwanzi yahamulelela wana wa kitwanzi na wa kimbigalo, avo ija imtwanzi na waja iwana wowa wa ija imndewa, na ija inyakadala yachole yeiyeka. 5 Ila kamba ija inyakadala yahalonga, ‘Nimnogela mndewa wangu, mtwanzi wangu, na wanangu, silonda kusegela na kuwa munhu yailegehe,’ 6 avo mndewa wake yamsole yamgale haulongozi wa Mulungu. Abaho yamgale hana ulwivi ama hana umuhimili wa ulwivi, na mndewa wake yamtoge gwiti jake na shindano. Abaho komsang'hanikila mndewa wake mkipigiti chose cha ugima wake.

7 “Munhu yahamguza mndele wake yawe nyakadala, heyo hasegela na kuwa munhu yailegehe kamba viili ha nyakadala wa kimbigalo. 8 Kamba mndele ija hamnogela mndewa wake, ayo iyamsagule yawe mtwanzi wake wa kunze, kolondigwa yaguzigwe ha tata wa ija imndele. Ila mndewa wake kabule udaho wa kumguza ha munhu muhenza, kwavija mndewa iyo yamtendele uzenzeleganye. 9 Ila kamba komsagula yawe mwehe wa mwanage, kolondigwa yamtende kamba mndele wake mwenyego. 10 Kamba munhu yamsolile nyakadala kuwa mtwanzi wake wa kunze, yahalonda kusola mtwanzi iyagwe, kolondigwa kugendelela kumgwelela ija imtwanzi wake wa kunze wa ichanduso ija inyakadala, kiasi kikija cha mandia, vivalo, na uwaso. 11 Na kamba hamtendela vinhu vino vidatu, ija imtwanzi kodaha kusegela bila maliho gogose.”

12 Mulungu kagendelela kulonga, “Munhu yoyose yondayamtoe na kumkoma miyage, na heyo yakomigwe. 13 Ila kamba hatendile giladi, ila galawilila sama ya manogelwa ga Mulungu, kolondigwa yakimbilile hanhu hondanikulongele. 14 Ila kamba munhu yoyose yahamkoma miyage giladi, hata kamba yahakimbilila hana ikilingo cha kulavila nhosa, yakwekwesigwe yalavigwe hana ikilingo cha kulavila nhosa abaho yakomigwe.

15 “Munhu yoyose yondayamtoe tataake ama mamaake, yakomigwe.

16 “Munhu yoyose yondayam'vamhile miyage, na kumgala hanhu bila kulonda, ihawa kamguza ama kang'hali mmakono gake, kolondigwa yakomigwe.

17 “Munhu yoyose yondayamdukumize tataake ama mamaake, kolondigwa yakomigwe.

18 “Wanhu wabili wahagomba na imwe yahamtoa miyage na dibwe ama ng'honde na hadanganhike, ila kamtenda ija yatoigwe yalumwe na kuwasa mulusazi, 19 na abaho kona vinogile na kulawa hanze kabili kuno yotembelela fimbo, ija yamtoile hatagusigwa ila kolondigwa yamulihe ija yalumile sama ya kipigiti kija kipotele kipigiti viyakalile mulusazi, na yamuguze mbaka vondayahone.

20 “Kamba munhu yahamtoa na lubiki nyakadala wake wakitwanzi ama wakimbigalo, na ija inyakadala bahaja kadanganhika, ija imunhu kolondigwa yatagusigwe. 21 Ila kamba ija inyakadala hadanganhike mdizua dimwe ama mabili, ija mwene inyakadala hatagusigwa, kwavija kamtoa nyakadala wake mwenyego.

22 “Kamba wambigalo wabili wogomba na kumkunhiza mtwanzi yali na inda na kutenda inda yake ilawe bila kumulumiza, ija yamkunhize kolondigwa yatozigwe kiasi chochose choyolonda mbigalo wa ija imtwanzi, sambiibanze vija mulamula vondayalonge. 23 Ila kamba ihalawilila ija imtwanzi kalumizwa na mkunhizo uja, avo ija yamulumize kolondigwa yamulihe ija imtwanzi ugima kwa ugima, 24 siso kwa siso, zino kwa zino, mgulu kwa mgulu, mkono kwa mkono, 25 kulukuza kwa kulukuza, kilonda kwa kilonda, na mkubulo kwa mkubulo.

26 “Kamba munhu yahamtoa msiso nyakadala wake wa kitwanzi ama wa kimbigalo na kuditula, avo ija imunhu kolondigwa yamuleke ija inyakadala yachole, na kuwa munhu yailegehe, kudilihila siso jake. 27 Na kamba munhu yahamtoa na kuding'ola zino da nyakadala wake wakitwanzi ama wakimbigalo, avo ija imunhu kolondigwa yamuleke ija inyakadala yachole na kuwa munhu yailegehe kudilihila zino jake.

28 “Kamba ng'ombe yahamuhoma munhu mbigalo ama mtwanzi na mhembe zake na kumkoma, ija ing'ombe kolondigwa yatoigwe na mibwe mbaka yadanganhike, na nyama yake sambiidigwe, ila ija imwene ng'ombe sambiyatagusigwe. 29 Ila kamba ng'ombe ija kakala na nzoela ya kuwahoma wanhu na mhembe zake, na mwene ng'ombe kakala yalongeligwe ila hamfungile ng'ombe wake, abaho ija ing'ombe kamkoma munhu mtwanzi ama mbigalo, ija ing'ombe kolondigwa yatoigwe na mibwe mbaka yadanganhike. Na ija mwene ng'ombe vivija yakomigwe. 30 Ila mwene ng'ombe yahalondigwa kuliha hela giladi yaukombole ugima wake, kolondigwa yalihe kiasi chochose kilondigwa.

31 “Ndagizi ino vivija yosang'hanika ihawa ng'ombe yahamkoma mmhale ama mndele. 32 Kamba ng'ombe yahamuhoma na mhembe nyakadala wakimbigalo ama wakitwanzi, ija mwene ng'ombe kolondigwa yamulihe mwene nyakadala vidanga malongo madatu va madini ga feza, na ija ing'ombe yatoigwe na mabwe mbaka yadanganhike.

33 “Kamba munhu yahaleka kudigubika kolongo, ama yahahimba kolongo na kuleka kudigubika, na ng'ombe ama mhunda yahalagalila mgati yake, 34 ija mwene idikolongo kolondigwa yamulihe mwene imhunda ama mwene ing'ombe, na ija imng'onyo yadanganhike kowa wa munhu ija mwene idikolongo.

35 “Kamba ng'ombe wa munhu imwe yahamulumiza ng'ombe wa munhu iyagwe na kudanganhika, wanhu wano wabili wolondigwa kumguza ing'ombe yali mgima na kuigolela zihela, na vivija ija ing'ombe yadanganhike waigolele nyama yake. 36 Ila kamba ija ing'ombe kakala na nzoela ya kuwahoma wayage na mhembe, ila ija mwene ng'ombe hamfungile, basi ija mwene ng'ombe yamkomile miyage kolondigwa yalihe ng'ombe mgima sama ya ng'ombe ija yadanganhike, na ija ing'ombe yadanganhike kowa wake heyo.”