1 “Kamba munhu yeheba ng'ombe ama ng'hondolo na kumchinja ama kumguza, ija im'bavi kolondigwa yalihe ng'ombe watano sama ya ng'ombe imwe, na ng'hondolo wane sama ya ng'hondolo imwe. 2 Kamba m'bavi yahagogigwa ikilo yobomola giladi yengile mng'anda, abaho katoigwa na kudanganhika, ija yamtoile hatendile kilozo cha kukoma. 3 Ila yahakala mbaka zua disonga kulawa kileka yamkome, munhu hiyo kana kilozo cha kukoma.

“M'bavi yagogigwe kolondigwa yalihe vinhu vose viyebile. Kamba hadahile kuliha, kolondigwa yaguzwe kamba nyakadala kulihila ubavi wake. 4 Ila ija imng'onyo ihawa ng'ombe ama mhunda ama ng'hondolo yahavikigwa yali mgima mdidale da ija im'bavi, kolondigwa yalihe wang'onyo wabili sama ya mng'onyo imwe iyebile.

5 “Kamba munhu yahawachunga wang'onyo zake mumgunda ama mumgunda wake wa zabibu, abaho ija imunhu kawaleka wakaje vakuja mumgunda wa munhu iyagwe, avo ija mwene wang'onyo kolondigwa yalihe vakuja vinogile kulawa mumgunda wake ama kulawa mumgunda wake wa mizabibu.

6 “Kamba munhu yahasoma moto mumgunda wake na uja umoto ulokela mmijani na kwingila mumgunda wa munhu iyagwe na kulukuza vakuja havinasengigwa ama visengigwe, ama mgunda wose, ija yasomile umoto kolondigwa yalihe vinhu vose vilukule.

7 “Kamba munhu yahamgwelela miyage hela ama vinhu giladi yamwikile, abaho vibigwa kulawa muing'anda ya ija yekile, kamba ija im'bavi yahagogigwa, kolondigwa yalihe mianza mibili. 8 Ila kamba ija im'bavi hagogigwe, avo mwene ng'anda kolondigwa yagaligwe haulongozi wa Mulungu yakaloleswe kamba heyo iyo yasolile vinhu va miyage ama sio.

9 “Mbuli yoyose ya mbamila ihalawilila hagatigati ya wanhu wabili wogombela ng'ombe, mhunda, ng'hondolo, vivalo, ama vinhu vovose viyagwe vipotele, kila munhu yahalonga, ‘Kinhu kino changu nie.’ Mbuli ya wabili wano yogaligwa haulongozi wa Mulungu. Munhu yondayoneke na Mulungu kamba kahonyela komuliha miyage mianza mibili.

10 “Kamba munhu imwe yahamgwelela miyage mhunda, ng'ombe, ng'hondolo, ama mng'onyo yoyose iyagwe yamfugile, na ija imng'onyo yahadanganhika, kalumila, ama kebigwa, bila koneka na munhu, 11 wanhu wano wabili wokiiduila haulongozi wa MNDEWA, giladi yoneke kamba ija imunhu yagweleligwe imng'onyo hasolile mng'onyo wa miyage. Ija mwene imng'onyo kolondigwa yatogole ulamuzi uno, na haduhu maliho golondigwa galihigwe. 12 Ila kamba ija imng'onyo kebigwa kulawa mmakono ga ija imunhu yagweleligwe imng'onyo, avo ija yagweleligwe imng'onyo kolondigwa yamulihe ija mwene imng'onyo. 13 Kamba ija imng'onyo kagogigwa na mng'onyo wa kumuhulo, avo vija visigale kulawa ha ija imng'onyo yagogigwe, vigaligwe viwe kamba usindila. Na haduhu maliho gondagatendeke sama ya mng'onyo yagogigwe na mng'onyo wa kumuhulo.

14 “Kamba munhu yahapula mng'onyo kulawa ha miyage abaho ija imng'onyo kalumila ama kadanganhika kipigiti mwene mng'onyo yali haduhu, ija imunhu yampulile kolondigwa yalihe. 15 Ila kamba mwene mng'onyo kakala baho kipigiti gano vugalawilile, haduhu maliho gondagatendeke. Kamba ija imng'onyo kakodigwa, basi ija ihela yaakodiligwe yolihila ija imng'onyo yalumile ama yadanganhike.

16 “Kamba munhu yahamulonda mhambe yalibule mkasano na kuwasa nayo, kolondigwa yalave hela, yafunge pamvu giladi yawe mwehe wake. 17 Ila kamba tata wa ija imhambe yahalema mwanage sambiyasoligwe na heyo, avo ija imunhu kolondigwa yalihe kiasi kikija cha hela za kufunga pamvu.

18 “Sambiumuleke mtwanzi muhawi yawe mgima.

19 “Munhu yoyose yondayamuwase mng'onyo, yakomigwe.

20 “Munhu yoyose yolava nhosa ha miungu yoyose iyagwe na si ha MNDEWA yadanganhike.

21 “Sambiumtendele gehile ama kumonela muhenza, kwavija gweye vivija kukala muhenza muisi ya Misili. 22 Sambiumtendele gehile kizuka yoyose ama mkiwa. 23 Kamba uhawatendela gehile, wahanililila nie, nokitegeleza kililo chao. 24 Lusango lwangu lokwinuka, na nie nowakoma mweye na zele, na watwanzi zenu wowa vizuka na wana zenu wowa wakiwa.

25 “Kamba uhamkalizi hela imwe wa wanhu zangu ayo yali mkumbulu, sambiutende kamba vowotendaga wakalizi hela, sambiulonde hela ibanzile kumwake. 26 Kamba uhasola kivalo cha munhu wako wa habehi kiwe kamba zamana, kolondigwa um'bwezele kipigiti zua hadinakuswa, 27 kwavija siku miyago kicho kivalo chake choyotamanila kuigubika ikilo. Kamba humbwezele, miyago koigubika choni? Kamba humbwezele na heyo yahanililila nie, nokitegeleza kililo chake kwavija nie nna bazi.

28 “Sambiumulonge vihile Mulungu, ama kumdukumiza mkulu wa wanhu zako.

29 “Sambiukawe kulava malimbuko kulawa mdivai, mavuta, na vinhu vako vose vuuhunile.

“Wana zenu wa kimbigalo wa udele, ungwelele nie. 30 Vivija ungwelele nie wana mbigalo wa udele wa ng'ombe zako, ng'hondolo zako, na menhe zako. Uwaleke wakale na wamama zao mmazua saba, abaho ungwelele nie mdizua da nane.

31 “Mweye mowa wanhu zangu mng'alile, avo sambimje nyama ya mng'onyo yakomigwe na mng'onyo wa kumuhulo. Wasileni umbwa.