1 “Sambiubwililise mbuli za uvwizi. Sambiuilumbe na munhu mwene vilozo kulava usindila wa uvwizi. 2 Sambiuilumbe na dale da wanhu mkutenda gehile. Uhalava usindila hana ibalaza, sambiugolowanye na kuilumba na dale da wanhu bwando giladi kuigubikiza ikweli. 3 Sambiulaguse bazi ha munhu sama ya ukumbulu wake kipigiti yahagaligwa muibalaza.

4 “Kamba uhamona ng'ombe ama mhunda wa mdumuka wako kaga, m'bweze ha mwenyego. 5 Kamba uhamona mhunda wa munhu yokwihila gweye kagwa hasi na bahasha jake kumgongo, sambium'bite, ila wime umtaze kumwinula mhunda wake.

6 “Sambiuigolowanye ikweli ihawa mkumbulu yali mmwanza wa wanhu zako yahagaligwa kuna ibalaza. 7 Sambiuwagale wanhu kukitala mmbuli za uvwizi, na sambiuwakome wanhu walibule vilozo na walibule uzenzeleganye, kwavija nie simgela kumgongo munhu yoyose yotenda mbuli zihile. 8 Sambiubokele hongo, kwavija hongo dowagela umbugumbugu awo wolola na kuzigolowanya mbuli za wanhu walibule uzenzeleganye.

9 “Sambiumgaze muhenza, kwavija mweye wenyego movitanga vija voyogelegeza muhenza, kwavija na mweye mkala wahenza muisi ya Misili.

10 “Mkipigiti cha milao sita kohanda mgunda wako na kohuna vakuja vako. 11 Ila mmulao wa saba uuleke umgunda uhumule sambiuulime. Avo wakumbulu kulawa mmwanza wa wanhu zako wapate vakuja kulawa himo, na vija visigale wang'onyo wa kumuhulo waje. Utende vivo mumgunda wako wa mizabibu na mumgunda wako wa mizaituni.

12 “Mazua sita, sang'hana sang'hano zako, ila mdizua da saba sambiusang'hanike, giladi ng'ombe wako na mhunda wako wahumule, na nyakadala wavumbuke mng'anda yako hamoja na wahenza wahumule.

13 “Gategeleze goya gano gose ganikulongele, sambiuitambikile miungu iyagwe, hata matwaga gao sambiugatambule.

14 “Mianza midatu mkila mulao konitendela lusona. 15 Utende Lusona lwa Mikate Ilibule Mela, mmazua saba uje mikate ilibule mela kamba vunikulagize. Zitende mbuli zino mkipigiti kikigwe, muna umulenge wa Abibu, kwavija uno uwo umulenge umulawile muisi ya Misili. Munhu sambiyeze haulongozi wangu bila kinhu.

16 “Tenda lusona lwa kuhuna malimbuko ga vakuja vuuhandile mumgunda wako.

“Abaho tenda lusona lwa vizewe kipigiti uhagela kukano vakuja vako kulawa mumgunda wako kipigiti cha msimu wa kumambukiza kuhuna vakuja venu. 17 Wambigalo wose weze haulongozi wa MNDEWA Mulungu mianza midatu mkila mulao kutambika.

18 “Sambimunilavile nhosa ya mulopa wa wang'onyo wachinjigwe hamoja na mikate igeligwe mela. Mavuta ga wang'onyo galavigwe nhosa kipigiti cha lusona lwangu sambigasigale mbaka imitondo iyagwe.

19 “Vakuja vinogile ng'hani va malimbuko va mgunda wako uvigale kung'anda yangu nie, MNDEWA Mulungu wako.

“Sambiumtogose mwanamenhe mmatombo ga mamaake.

20 “Nomtuma msenga wangu wa kuulanga yakulongole, giladi yakwimilize mnzila na yawagale hanhu hanisasale. 21 Mtegelezeni na mgagoge gaja goyowalongela. Sambimumdulukile, heyo haugela kumgongo udulu wenu kwavija nie iyo nimtumile heyo. 22 Ila kamba muhamtegeleza goya na kugatenda gose gonilonga, nie nowa mdumuka ha wadumuka zenu, na nowabamilila awo wokubamilila gweye. 23 Msenga wangu wa kuulanga kowalongola na kuwagala muisi ya Waamoli, Wahiti, Wapelizi, Wakanaani, Wahivi, na Wayebusi, na nie nowabananga. 24 Sambiufugame mavindi na kuinamila mbaka hasi haulongozi wa miungu yao ama kuitambikila ama kutenda viilonda miungu yao, ila uibanange na kuitula vidangavidanga miguzo yao ya mibwe yowoitambikila. 25 Nitambikileni nie, MNDEWA Mulungu wenu, na motelo zangu zowa mmandia genu na mmazi. Nowasegezela vitamu kulawa kumwenu, 26 na haduhu hata mtwanzi imwe inda yake yondailawe ama yondayawe mgumba. Nokutenda ukale milao bwando.

27 “Nogala bwembwe haulongozi wenu, na kuwatenda wadumuka zenu wondawawezile wazanywe ng'hani. Abaho nowatenda hewo wahinduke kuchugu na kuwakimbila mweye. 28 Nogala midondola haulongozi wenu yondaiwawinge Wahivi, Wakanaani, na Wahiti wasegele mnzila yako. 29 Siwawinga mkipigiti cha mulao umwe kwavija kamba nihatenda avo, isi yowa bule munhu na wang'onyo wa kumuhulo wokongezeka ng'hani na kuwavamhila. 30 Nowawinga kidogokidogo, mbaka mweye vondamongezeke abaho nowagwelela isi yenu. 31 Nokwikila mbaka zako kulawa Kuibahali Ndung'hu mbaka kuibahali ya Wafilisti na kulawa muluwala mbaka Kulwanda lwa Yuflati. Kwavija nokugwelela mhiko za kuwahuma wenekae wa isi ino na kuwawinga. 32 Sambimtende lagano na hewo ama na miungu yao. 33 Sambimuwaleke wakale muisi yenu bule wowatenda mweye munitendele nie vilozo, kwavija nhambiko ya miungu yao yowa mtego kumwenu mweye.”