1 Musa viyakalile uchana kudigongo da Sinai, MNDEWA kamulongela, 2 “Walongele Waislaeli wanilavile nhosa. Unibokelele nhosa kulawa ha munhu yoyose yali na moyo wa kulava. 3 Zino zizo nhosa zondaubokele kulawa kumwao, zahabu, madini ga feza, na shaba, 4 nyuzi za buluu, zambalau, na ndung'hu, kitani inogile, na mijusu ya menhe. 5 Ng'hwembe za songolomi wa ng'hondolo zisindikigwe na langi ndung'hu, ng'hwembe zinogile, mbamha za m'biki wa mjoholo, 6 mavuta ga mzaituni ga kwika m'viwenge, vilungilo sama ya kulungila mavuta ga mzaituni ga kubakala na sama ya ubane unung'hila goya, 7 mabwe gakemigwe shohamu, na mabwe gayagwe ga hela bwando ga kuhambila mkizibao cha Mkulu wa Wakulu wose wa Nhambiko na mkifuko cha mmhambaga. 8 Abaho wanitendele hema da kuiting'hanila, giladi nipate kukala hamoja na mweye. 9 Ditende hema dino na vinhu vake vose kamba vondanikulagusile.

10 “Walongele wanhu watende Sanduku da Lagano na mbamha za mjoholo, diwe na utali wa sentimeta 110, ugazi wa sentimeta 66, na wimo wa sentimeta 66. 11 Digubikize na zahabu ing'alile mgati na kunze, na uditendele lugigo lwa zahabu uchana kuzunguluka idisanduku. 12 Ditendele vitindi vine va zahabu, na uvigwasike muna imigulu yake mine, vitindi vibili ng'ambu imwe na vitindi vibili ng'ambu iyagwe. 13 Abaho utende fimbo za m'biki wa mjoholo, uzigubikize na zahabu. 14 Zigele izifimbo m'vitindi vili mzimbavu za idisanduku, sama ya kudipapila idisanduku. 15 Izifimbo zikale m'vitindi va idisanduku, sambizisegezigwe. 16 Abaho uzingize Mdisanduku da Lagano zimbamha mbili za mabwe zondanikugwelele, mbamha zandikigwe ndagizi za Mulungu.

17 “Abaho utende ngubiko ya idisanduku na zahabu ing'alile. Iwe na utali wa sentimeta 110 na ugazi wa sentimeta 66. 18 Abaho watende vinyago vilingile na Makelubi*Makelubi wao wene ugima wali kuulanga walumbigwe na Mulungu wali na mabawa. wabili wa zahabu mkuwasana na nyundo, uweke kuzingwazo mbili za ingubiko ya idisanduku. 19 Mtende Kelubi imwe kuingwazo imwe na Kelubi iyagwe kuingwazo iyagwe, wawe mkidanga kimwe na ingubiko ya idisanduku, watende iwamakelubi muna izingwazo zake mbili. 20 Makelubi wogolosa mbawa zao uchana, na kuikikiwiza ingubiko ya idisanduku na izimbawa zao. Makelubi woilola, na vihanga vao voinamilila ingubiko ya idisanduku. 21 Uzike mgati ya idisanduku zimbamha mbili za mabwe, zondanikugwelele. Abaho wike ingubiko uchana ya idisanduku. 22 Haja hachana ya ingubiko hagatigati ya Makelubi wabili wali uchana ya Idisanduku da Lagano, noiting'hana na gweye na kukugwelela ndagizi zangu zose sama ya Waislaeli.”

23 Abaho kamulongela, “Tenda meza ya mbamha za mjoholo. Iwe na utali wa sentimeta 88, ugazi wa sentimeta 44, na wimo wa sentimeta 66. 24 Igubikize na zahabu ing'alile na uitendele lugigo lwa zahabu ing'alile uchana kuizunguluka imeza. 25 Uizungulusile mkungo uli na ugazi wa milimeta 75, abaho wike lugigo lwa zahabu kuzunguluka umkungo. 26 Tenda vitindi vine va zahabu, uvigwasike muna zimhembe nne za imeza, mmigulu yake mine. 27 Vija ivitindi vondavigoge zifimbo za kupapila imeza volondigwa viwe behi na umkungo. 28 Utende fimbo za m'biki wa mjoholo za kupapila imeza, na uzigubikize na zahabu. 29 Utende vyano na vikasi sama ya kufushila ubane, na utende majagi na mikungu sama ya nhosa ya divai. Via vino vose vitendigwe na zahabu ing'alile. 30 Wike mikate ilavigwe nhosa kumwangu uchana ya meza ino ili haulongozi wangu mazua gose.

31 “Tenda kiguzo cha kwikila viwenge cha zahabu ing'alile. Kikalilo chake na kiguzo chake uvitende na zahabu isanigwe na nyundo. Vikasi vake, vifundo vake, na malua gake viwe kinhu kimwe na ikiguzo. 32 Matambi sita gowa kuzing'ambu mbili za ikiguzo, matambi madatu ng'ambu imwe na matambi madatu ng'ambu iyagwe. 33 Vikasi vilingile kamba malua ga mulozi, kila kikasi kimwe na kifundo chake na malua gake, vidatu vikale mditambi dimwe na vidatu vikale mditambi diyagwe. Na matambi gose sita gowa mkiguzo cha kwikila viwenge. 34 Na uchana ya ikiguzo cha kwikila viwenge kuwe na vikasi vine vilingile kamba malua ga mulozi, kila kikasi na vifundo vake na malua gake. 35 Kifundo cha ichanduso kiwe hasi ya igamatambi mabili ga ichanduso gali mkiguzo cha kwikila viwenge, kifundo cha ikabili kiwe hasi ya igamatambi mabili ga ikabili, na kifundo cha ikadatu kiwe hasi ya igamatambi mabili ga ikadatu. Mheta ya matambi gose gawe sita. 36 Ivifundo, igamatambi, na ikiguzo cha kwikila viwenge visanigwe kulawa mkidanga kimwe cha zahabu ing'alile. 37 Abaho uvitende viwenge vake saba, viwenge sita uvike uchana ya igamatambi sita na kiwenge kimwe ukike uchana ya ikiguzo, giladi vimwemwese haulongozi wake. 38 Utende visahani vake na mibato yake sama ya kusegezela utambi ulukule. Na vinhu vino vose viwe va zahabu ing'alile. 39 Ikiguzo cha kwikila iviwenge na via vandakane navo volondigwa vitendigwe na zahabu ing'alile ili na kilo 35. 40 Tenda kila kinhu kamba vija vinikulagusile kukigongo kino.