1 “Ditende hema da kuiting'hanila na miguo longo dimwe ya kitani inogile isokotigwe na nyuzi za buluu, zambalau, na ndung'hu, dihambigwe na muhambaji na ulembo wa vinhu vilingile na Makelubi.*Makelubi wao wene ugima wali kuulanga walumbigwe na Mulungu wali na mabawa. 2 Utali wa kila guo uwe meta 12, na ugazi wa kila guo uwe meta 2. Miguo yose iwe na utali umwe na ugazi umwe. 3 Miguo mitano uilumbe hamoja, na miguo mitano iyagwe uilumbe hamoja. 4 Utende matanzi ga buluu mulugigo lwa guo da kunze mmwanza wa ija imiguo ya ichanduso yuuilumbile hamoja, na vivija utende matanzi mulugigo lwa guo da kunze mmwanza wa ija imiguo iyagwe yuuilumbile hamoja. 5 Utende matanzi malongo matano mulugigo lwa idiguo da ichanduso dili mmiguo mitano ya ichanduso, na utende matanzi malongo matano mulugigo lwa idiguo dili mmiguo mitano iyagwe. Gamatanzi gakihindukile kila tanzi dimwe na miage. 6 Utende ving'hwangwazi malongo matano va zahabu, na uilumbe hamoja imiguo na iving'hwangwazi, giladi idihema da kuiting'hanila diwe kinhu kimwe.

7 “Vivija utende miguo longo dimwe na imwe itendigwe na mijusu ya menhe sama ya kugubikila idihema da kuiting'hanila. 8 Utali wa kila guo dimwe uwe meta 13, na ugazi wa kila guo uwe meta 2. Miguo yose longo dimwe na imwe iwe na utali umwe na ugazi umwe. 9 Uilumbe miguo mitano hamoja, na uilumbe miguo sita iyagwe hamoja. Dija idiguo da sita dikunze hagatigati mwanza umwe haulongozi wa idihema da kuiting'hanila. 10 Utende matanzi malongo matano mulugigo lwa idiguo da ikimambukizo da imiguo mitano ya ichanduso na matanzi malongo matano mulugigo lwa idiguo da ichanduso da imiguo sita iyagwe. 11 Utende ving'hwangwazi malongo matano va shaba abaho uvigele muna gamatanzi na uilumbe hamoja imiguo ya idihema da kuiting'hanila giladi iwe ngubiko imwe. 12 Lwenza lwa ikidanga kisigale kitungike kuchugu cha idihema da kuiting'hanila mbaka kibululuke hasi sentimeta 50. 13 Utali wa sentimeta 50 usigale wa imiguo uitungike ng'ambu mbili za mzimbavu za idihema da kuiting'hanila mbaka ibululuke hasi, giladi udikikiwize idihema da kuiting'hanila.

14 “Utende ngubiko sama ya kugubikila idihema da kuiting'hanila, ngubiko ya ng'hwembe za songolomi wa ng'hondolo isindikigwe na langi ndung'hu, na ngubiko ya kunze ya ng'hwembe zinogile.

15 “Utende felemu za wima za m'biki wa mjoholo sama ya idihema da kuiting'hanila. 16 Kila felemu iwe na wimo wa meta 4 na ugazi wa sentimeta 66. 17 Kila felemu iwe na vizingiti uchana na hasi giladi viitende imihimili mibili iwe kinhu kimwe, hamoja na migulu mibili yondaingizigwe mvikalilo vondaviwe hasi ya izifelemu, na utende vino mzifelemu zose za idihema da kuiting'hanila. 18 Utende felemu za idihema da kuiting'hanila, felemu malongo mabili ng'ambu ya kusi ya idihema da kuiting'hanila, 19 na utende vikalilo malongo mane va madini ga feza hasi ya izifelemu malongo mabili, vikalilo vibili hasi ya ifelemu ya ichanduso mmigulu yake mibili, na vikalilo vibili hasi ya felemu iyagwe mmigulu yake mibili. 20 Ng'ambu ya kaskazi ya idihema da kuiting'hanila, tenda felemu malongo mabili 21 na vikalilo malongo mane va madini ga feza, vikalilo vibili hasi ya kila felemu. 22 Kuchugu cha idihema da kuiting'hanila, ng'ambu ya uswelo wa zua, tenda felemu sita. 23 Utende felemu mbili ziyagwe mzimhembe za idihema da kuiting'hanila zili ng'ambu ya kuchugu. 24 Felemu zino za mzimhembe zolondigwa ziibande songela hasi mbaka uchana, na uchana zifungigwe na kitindi kimwe, zose mbili zolondigwa ziilinge. 25 Avo kiwambaza kino cha kuchugu chowa na felemu nane hamoja na vikalilo va madini ga feza, vikalilo longo dimwe na sita, vikalilo vibili hasi ya kila felemu.

26 “Utende boliti za m'biki wa mjoholo, boliti tano sama ya izifelemu za ng'ambu imwe ya idihema da kuiting'hanila, 27 na boliti tano sama ya izifelemu za ng'ambu iyagwe ya idihema da kuiting'hanila, na boliti tano sama ya izifelemu za ng'ambu ya kuchugu ya idihema da kuiting'hanila, ng'ambu ya uswelo wa zua. 28 Boliti ya hagatigati, yobita hagatigati ya izifelemu kulawa ng'ambu imwe mbaka ng'ambu iyagwe. 29 Uzigubikize zifelemu na zahabu, na uzitendele vitindi va zahabu vigoge iziboliti. Na uzigubikize iziboliti na zahabu. 30 Udisimike idihema da kuiting'hanila kamba vija vinikulagusile kukigongo kino.

31 “Utende guo na nyuzi za buluu, zambalau, na ndung'hu, na kitani inogile isokotigwe, dihambigwe na ulembo wa vinhu vilingile na Makelubi. 32 Ditungike uchana mzinguzo nne za m'biki wa mjoholo zigubikizwe na zahabu zili na ving'hwangwalingo va zahabu, na uzisimike zinguzo uchana ya vikalilo vine va madini ga feza. 33 Ng'ambu ya uchana ya idiguo, ditungike mving'hwangwazi vili mgati ya ikiswili cha idihema, na idiguo dohabagula Hanhu Hang'alile kulawa Hanhu Hang'alile Ng'hani. Avo udingize Idisanduku da Lagano Hanhu Hang'alile Ng'hani. 34 Uike ingubiko uchana ya Idisanduku da Lagano mgati ya Hanhu Hang'alile Ng'hani. 35 Uike imeza Hanhu Hang'alile ng'ambu ya kaskazi, hanze ya Hanhu Hang'alile Ng'hani, na ikiguzo cha kwikila viwenge kike ng'ambu ya kusi ya idihema da kuiting'hanila, kikiilole na imeza.

36 “Utende guo da kutungika hanhu ha kwingilila mdihema da kuiting'hanila na nyuzi za buluu, zambalau, na ndung'hu, na kitani inogile isokotigwe, na dihambigwe na muhambaji. 37 Uditendele idiguo nguzo tano za m'biki wa mjoholo, na uzigubikize na zahabu. Ving'hwangwalingo vake viwe va zahabu, na uzikile vikalilo vitano va shaba.