1 “Utende kilingo cha kulukuzila nhosa cha m'biki wa mjoholo, utali na ugazi wake viilinge. Utali wake uwe meta 2.2 na ugazi wake uwe meta 2.2 na wimo wake uwe meta 1.3. 2 Utende mhembe kuna zimhembe nne za ikilingo cha kulukuzila nhosa. Zimhembe zisongoligwe kulawa mkigogo cha idibiki ditendile ikilingo cha kulukuzila nhosa, na uzigubikize na shaba. 3 Utende nongo za kwikila mitozi, makulega, mikungu, uma, na vizolelo va kuzolela moto. Via vino vose viwe va shaba. 4 Kitendele lwavu lwa shaba, na uchana ya ulwavu uvigwasike vitindi vine va shaba mzimhembe zake nne. 5 Lwike lwavu luno lwa shaba hasi ya ulugigo luzunguluka ikilingo cha kulukuzila nhosa giladi luvike lwenza lwa ikilingo cha kulukuzila nhosa kulawa hasi. 6 Utende fimbo za m'biki wa mjoholo sama ya ikilingo cha kulukuzila nhosa, abaho uzigubikize na shaba. 7 Uzisomeke izifimbo m'vitindi vili mumgwazo wa ikilingo cha kulukuzila nhosa, giladi izifimbo zilawile ng'ambu zose mbili za ikilingo, na ziwe vipapilo va ikilingo. 8 Ukitende ikilingo na mbamha za m'biki wa mjoholo, na kiwe kamba sanduku dipongole. Ukitende kamba vija vuulagusiligwe hano hakigongo.

9 “Utende konhi da idihema da kuiting'hanila. Ng'ambu ya kusi ya idikonhi utungike miguo itendigwe na kitani inogile isokotigwe, ili na utali wa meta 44, 10 nguzo zake malongo mabili na vikalilo vake malongo mabili viwe va shaba, ila iving'hwangwalingo va izinguzo na kabali zake ziwe za madini ga feza. 11 Vivija ng'ambu ya kaskazi ya idikonhi utungike miguo ili na utali wa meta 44, nguzo zake malongo mabili na vikalilo vake va shaba viwe malongo mabili, ila iving'hwangwalingo va izinguzo na kabali zake ziwe za madini ga feza. 12 Ng'ambu ya uswelo wa zua ya idikonhi kowa na miguo ili na utali wa meta 22, hamoja na nguzo longo dimwe na vikalilo longo dimwe. 13 Vivija idikonhi dolondigwa diwe na ugazi wa meta 22 ng'ambu ya ulawilo wa zua kuli na hanhu ha kwingilila. 14 Miguo ili na utali wa meta 6.6 yolondigwa iwe ng'ambu imwe, hamoja na nguzo ndatu na vikalilo vidatu. 15 Na miguo ili na utali wa meta 6.6 yolondigwa iwe ng'ambu iyagwe, hamoja na nguzo ndatu na vikalilo vidatu. 16 Hanhu ha kwingilila mdikonhi utungike guo dili na utali wa meta 9, ditendigwe na nyuzi za buluu, zambalau, na ndung'hu, na kitani inogile isokotigwe, dihambigwe na muhambaji. Guo dino dolondigwa ditungikwe mzinguzo nne na vikalilo vine. 17 Nguzo zose kuzunguluka idikonhi zolondigwa zifungigwe na kabali za madini ga feza. Ving'hwangwalingo vake vowa va madini ga feza, na vikalilo vake vowa va shaba. 18 Idikonhi diwe na utali wa meta 44, ugazi wa meta 22, na wimo wa meta 2.2. Miguo yake itendigwe na nyuzi za kitani inogile isokotigwe, na vikalilo vitendigwe na shaba. 19 Via vose visigale va idihema da kuiting'hanila va kila sang'hano hamoja na vigingi vose va idihema da kuiting'hanila na vigingi vose vizunguluke idikonhi, vitendigwe na shaba.

20 “Walongele wanhu wa Islaeli wakugalile mavuta ganogile ga mzaituni gakamuligwe ga kugela m'viwenge, giladi iviwenge vigendelele kwaka. 21 Ikiguzo cha kwikila viwenge cholondigwa kime mdihema da kuiting'hanila, haulongozi wa idiguo da mgati dikikiwiza Idisanduku da Lagano. Haloni na wanage wa kimbigalo wolondigwa wavibwinhe iviwenge na kuvileka vake kilo ngima haulongozi wa MNDEWA. Sang'hano ino iwe ya digunge mwa wanhu wa Islaeli na milelo yao yondaize.