1 “Mgale kumwangu mkulu wako Haloni na wanage wa kimbigalo, Nadabu, Abihu, Eliazali, na Isamali, wanage kulawa mwa wanhu wa Islaeli, giladi wanisang'hanikile kamba wakulu wa nhambiko. 2 Mtendele mkulu wako Haloni kivalo king'alile, giladi umgwelele yenzi na unozi. 3 Wakeme magalu wose, awo iniwagwelele udaho, walongele watende vivalo va Haloni, giladi um'bagule sama yangu nie kamba mkulu wa nhambiko msang'hano yangu. 4 Vino vivo ivivalo vondawavitende, kifuko cha mmhambaga, kizibao, kanzu, shati dihambigwe goya, kilemba, na lukumbulu. Wotenda vivalo vino ving'alile sama ya mkulu wako Haloni hamoja na wanage, giladi wanisang'hanikile nie kamba wakulu wa nhambiko. 5 Vivalo vino wavitende na nyuzi za zahabu, nyuzi za buluu, zambalau, na ndung'hu, na kitani inogile.

6 “Utende kizibao na nyuzi za zahabu, nyuzi za buluu, zambalau, na ndung'hu, na kitani inogile isokotigwe dihambigwe na muhambaji. 7 Kiwe na mikandala mibili ya mmaega ya kukilumbila ikizibao ng'ambu ya kuulongozi na ng'ambu ya kuchugu, giladi ikizibao kiilumbe hamoja. 8 Lukambala luhambigwe lwa ikizibao lutendigwe na vinhu vivija vitendile ikizibao, nyuzi za zahabu, nyuzi za buluu, zambalau, na ndung'hu, na kitani inogile isokotigwe lolondigwa lushonelwe mkizibao. 9 Sola mabwe mabili gakemigwe shohamu, na uchana yake ugasongole matwaga ga wana longo dimwe na wabili wa Islaeli, 10 kulingana na vija viwavumbuke, matwaga sita mdibwe dimwe, na matwaga sita mdibwe diyagwe. 11 Ugasongole matwaga ga wana wa Islaeli uchana ya igamabwe mabili kamba vija msongola dibwe da hela bwando viyosongola utango. Abaho ugagele mzifelemu zilukigwe na nyuzi za zahabu. 12 Mabwe gano mabili ugabandikize mmikandala ya mmaega ya ikizibao, gawe mabwe ga ng'humbukila sama ya wana wa Islaeli. Haloni yagapape matwaga gao mmaega gake giladi mazua gose nie, MNDEWA, niwakumbukile wanhu zangu. 13 Tenda felemu mbili zilukigwe na nyuzi za zahabu 14 na mikufu mibili ya zahabu ing'alile, isokotigwe kamba nzabi, na uibandikize imikufu muna izifelemu zilukigwe na nyuzi za zahabu.

15 “Utende kifuko cha mmhambaga chondakimtaze mkulu wa wakulu wose wa nhambiko kugelegeza gaja gonilonda nie, MNDEWA. Ukitende na ufundi mkulu na vinhu vivija vitendile ikizibao, ukitende na nyuzi za zahabu, nyuzi za buluu, zambalau, na ndung'hu, na kitani inogile isokotigwe. 16 Ukikunze mwanza umwe, na utende utali wake na ugazi wake uilinge, utali wake uwe sentimeta 22 na ugazi wake uwe sentimeta 22. 17 Abaho uchana yake ika minhongo mine ya mabwe ga hela bwando. Mumnhongo wa ichanduso, wike mabwe ga akiki, yakuti manjano, na bahalamani. 18 Mumnhongo wa ikabili, wike mabwe ga zumalidi, yakuti samawi, na alimasi. 19 Mumnhongo wa ikadatu, wike mabwe ga yasinto, akiki ndung'hu, na ametisto. 20 Mumnhongo wa ikane, wike mabwe ga zabalajadi, shohamu, na yasipi. Mabwe gano gose gageligwe mzifelemu za nyuzi za zahabu. 21 Kuwe na mabwe longo dimwe na mabili kamba vigali matwaga ga wana wa Islaeli. Mabwe gano gawe kamba utango wao, kila dibwe dimwe disongoligwe mtala umwe wa wana wa Islaeli.

22 “Ukitendele ikifuko cha mmhambaga mikufu ya zahabu ing'alile, isokotigwe kamba nzabi, 23 na ukitendele ikifuko cha mmhambaga vitindi vibili va zahabu, abaho uvigwasike ivitindi vibili mzimhembe mbili za uchana za ikifuko cha mmhambaga. 24 Uigwasike imikufu mibili ya zahabu m'vitindi vibili vili mzimhembe za uchana ya ikifuko cha mmhambaga, 25 sota mbili ziyagwe za imikufu ya zahabu uzifudike mzifelemu mbili za nyuzi za zahabu, uzifudike mmikandala ya mmaega ya ikizibao ng'ambu ya kuulongozi. 26 Utende vitindi vibili va zahabu, na uvigwasike mzimhembe mbili za hasi ya ikifuko cha mmhambaga, mulugigo lwake lwa mgati behi na ikizibao. 27 Utende vitindi vibili viyagwe va zahabu, uvigwasike hasi ya imikandala mibili ya mmaega kuulongozi wa ikizibao, behi na ulugigo uchana ya ulukambala luhambigwe lwa ikizibao. 28 Uvifudike ivitindi va ikifuko cha mmhambaga kuna ivitindi va ikizibao na nzabi za buluu, giladi ikifuko cha mmhambaga kikale uchana ya ulukambala luhambigwe lwa ikizibao, na kija ikifuko cha mmhambaga hakilondigwa kilegele kulawa mkizibao.

29 “Kipigiti Haloni vondayengile Hanhu Hang'alile, yagapape matwaga ga wana wa Islaeli hana umoyo wake mkifuko cha mmhambaga chondakimtaze kugelegeza gaja gonilonda nie, MNDEWA, giladi nigendelele kuwakumbuka wanhu zangu mazua gose. 30 Vivija gela Ulimu na Tumimu mkifuko cha mmhambaga vikale hana umoyo wa Haloni kipigiti vondayengile haulongozi wangu nie. Mnzila ino, Haloni kolondigwa yakivale kifuko kino cha mmhambaga giladi yagagelegeze gaja gonilonda nie sama ya Waislaeli.

31 “Utende kanzu ya langi ya buluu ya kuvalila mgati ya ikizibao. 32 Utende zonzo hagatigati, sama ya kwingizila ditwi. Wike lugigo lulukigwe kuzunguluka idizonzo, giladi ikanzu sambiidegeke. 33 Kuzunguluka ulugigo lose lwa hasi ya ikanzu kuhambigwe vinhu vilingile na makomamanga, vihambigwe na nyuzi za buluu, zambalau, na ndung'hu. Hagatigati ya makomamanga gano kuwe na mbugi za zahabu. 34 Zimbugi za zahabu na igamakomamanga voisondolele, komamanga kuchugu mbugi haulongozi kuzunguluka ulugigo lwa ikanzu. 35 Haloni kolondigwa yaivale ikanzu kipigiti cha kunisang'hanikila nie, MNDEWA. Dizwi da izimbugi nodihulika kipigiti viyokwingila Hanhu Hang'alile haulongozi wangu na kipigiti voyolawa hanze, giladi sambinimkome.

36 “Utende kidiwala kibanhibanhi cha zahabu ing'alile, uchana yake ukisongole nyandiko kamba viwasongolaga utango na uchandike mbuli zino, ‘YANG'ALILE HA MNDEWA’ mkukisongola kamba vawasongolaga utango. 37 Ukifudike ikidiwala kibanhibanhi na nzabi ya langi ya buluu haulongozi wa ikilemba. 38 Mazua gose Haloni kokivala mkihanga chake, giladi nie, MNDEWA, nizibokele nhosa zose azo Waislaeli wondawazibagule sama yangu nie, hata kamba wanhu wahahonyela mkipigiti cha kuzilava.

39 “Uluke shati ya kitani inogile, na utende kilemba cha kitani inogile. Abaho tenda lukumbulu luhambigwe na muhambaji.

40 “Watendele wana wa kimbigalo wa Haloni mashati, ng'humbulu, na kofia, sama ya kuwagwelela yenzi na unozi. 41 Vivalo vino kowavaza Haloni hamoja na wanage, uwabake mavuta, uwasimike, na uwabagule sama yangu nie, giladi wanisang'hanikile kamba wakulu wa nhambiko. 42 Watendele kaputula za kitani za kuvaza ng'huli zao zondazigubike songela mchuno mbaka mmahaza. 43 Haloni na wanage wolondigwa wavale kaputula zino kipigiti vondawengile mdihema da kuiting'hanila, ama wahakikwenhukila ikilingo cha kulavila nhosa kipigiti cha kulava nhosa za kulukuza. Ila kamba hawazivalile kaputula zino, wokiigalila vilozo wenyego na wodanganhika. Haloni na lukolo lwake wose wakimbigalo wolondigwa wazigoge ndagizi zino milongo yose.