29
Ndagizi ya Kuwasimika Haloni na Wanage wa Kimbigalo Sama ya MNDEWA
(Law. 8:1-36)
“Vino vivo vondauwabagule Haloni na wanage sama yangu nie, giladi wanisang'hanikile kamba wakulu wa nhambiko. Sola songolomi imwe wa ng'ombe na songolomi wabili wa ng'hondolo walibule ulemale. Sola usage unogile wa ngano, tenda mikate ilibule mela yokigwe bila mavuta, abaho tenda mikate iyagwe ilibule mela yokigwe na mavuta, na utende vikate vilibule mela uvibake mavuta. Uigele mumgelo na uilave nhosa kumwangu kipigiti vondaulave nhosa ya songolomi wa ng'ombe na iwang'hondolo wabili songolomi.
“Abaho wagale Haloni na wanage hanhu ha kwingilila mdihema da kuiting'hanila na uwanave na mazi. Abaho m'vaze Haloni vivalo va mkulu wa nhambiko, shati, kanzu, kizibao, kifuko cha mmhambaga, na umfunge mchuno na lukambala luhambigwe lwa ikizibao. M'vaze kilemba mditwi jake, na ukibandikize ikidiwala kibanhibanhi king'alile cha zahabu uchana ya ikilemba. Usole mavuta ga kubakala, umwitile mditwi jake, kulagusa kamba kum'bagula sama yangu nie. Abaho uwagale wanage, na uwavaze mashati, na uwafunge ng'humbulu mchuno na kuwavaza kofia mmatwi gao. Sang'hano ya ukulu wa nhambiko iwe yao milongo yose. Abaho uwasimike Haloni na wanage.
10 “Umgale songolomi wa ing'ombe haulongozi wa idihema da kuiting'hanila, abaho uwalongele Haloni na wanage weke makono gao mditwi jake. 11 Abaho umchinje isongolomi wa ng'ombe haulongozi wangu nie, MNDEWA, hanhu ha kwingilila mdihema da kuiting'hanila. 12 Usole mulopa kidogo wa ing'ombe na kidole chako uugele mzimhembe za ikilingo cha kulukuzila nhosa, na umulopa wondausigale uwitile hasi ya ikilingo cha kulukuzila nhosa. 13 Abaho usole mavuta gose gali mgati muinda na ng'ambu ya hasi ya ini, na usole figo zose mbili na gamavuta gali uchana yake, uvilukuze uchana ya ikilingo cha kulukuzila nhosa. 14 Ila inyama ya ng'ombe, kwembe jake, na mavi gake uvisome hanze ya ing'hambi, viwe nhosa ya upatanizo.
15 “Abaho sola imwe wa songolomi wa ng'hondolo, na Haloni na wanage weke makono gao mditwi jake. 16 Mchinje abaho usole mulopa wake uumize mzing'ambu zake zose nne za ikilingo cha kulukuzila nhosa. 17 Mkanhe ing'hondolo vidangavidanga, na uvisuluze vinhu va mgati na migulu, na uvike hamoja na iditwi na ividanga viyagwe. 18 Abaho mulukuze ing'hondolo wose uchana ya ikilingo cha kulukuzila nhosa. Ino iyo nhosa ya kulukuza ha nie, MNDEWA, nhosa inung'hila goya, ilavigwa kumwangu nie.
19 “Msole songolomi wa ng'hondolo iyagwe, na Haloni na wanage weke makono gao mditwi jake. 20 Mchinje songolomi wa ing'hondolo na usole kiasi cha mulopa wake uugele mzindewe za magwiti ga ng'ambu ya ukulume ga Haloni na wanage, m'vidole gumba va magulu gao ga ukulume, na m'vidole gumba va makono gao ga ukulume. Mulopa usigale umize mzing'ambu zose nne za ikilingo cha kulukuzila nhosa. 21 Abaho usole kiasi cha mulopa uli mkilingo cha kulukuzila nhosa na kiasi cha gamavuta ga kubakala, na uwamizile Haloni na vivalo vake na wanage na vivalo vao. Mkutenda avo, kowasimika hewo na vivalo vao sama yangu nie.
22 “Vivija kolondigwa usole mavuta ga songolomi wa ng'hondolo, mavuta ga mumkila, mavuta gali mgati muinda na ng'ambu ya hasi ya idiini, figo zose mbili na mavuta gali uchana yake, na mgulu wa kuchugu wa ukulume kwavija ng'hondolo ino ka mmwanza wa vilokotelo va kusimikila. 23 Kulawa mumgelo wa mikate yondailavigwe kumwangu, sola mkate umwe ulibule mela wokigwe bila mavuta na mkate umwe ulibule mela wokigwe na mavuta na kikate kimwe kibanhibanhi kilibule mela. 24 Vakuja vino vose uwagwelele Haloni na wanage na uwalongele wavinule kumwangu kamba nhosa kisinyo. 25 Abaho uvisole ivakuja kulawa mmakono gao na uvilukuze uchana ya ikilingo cha kulukuzila nhosa hamoja na nhosa ya kulukuza, iwe nhosa ya vakuja ilavigwa kumwangu nie. Mnung'ho wa nhosa ino woninogela nie.
26 “Sola nyama ya mmhambaga ya ng'hondolo wa kumsimikila Haloni, na uinule uchana haulongozi wangu iwe kamba nhosa kisinyo kumwangu nie, abaho uisole iwe mandia gako gweye.
27 “Zibagule izinyama sama yangu nie, nyama ya imhambaga inuligwe na nyama ya idihaza ikigwe hamgwazo ziwe nhosa kisinyo kumwangu nie kulawa ha songolomi wa ng'hondolo wa kumsimika Haloni, na nyama hizo zowa za Haloni na lukolo lwake. 28 Gano gago magao gondawabokele Haloni na wanage kulawa ha Waislaeli mazua gose. Ino iyo nhosa ya Waislaeli yondawalave kulawa mnhosa zao za tindiwalo, nhosa yao kumwangu nie.
29 “Haloni yehesha kudanganhika, vivalo vake ving'alile wagweleligwe wanage, wavivale kipigiti wahabakigwa mavuta na kusimikwa. 30 Mwana wa Haloni yondayamuhale tataake muisang'hano ya ukulu wa nhambiko na yondayengile mdihema da kuiting'hanila kusang'hanika Hanhu Hang'alile kolondigwa yavale vivalo vino mmazua saba.
31 “Sola nyama ya songolomi wa ng'hondolo wa kuwasimikila Haloni na wanage na uitogosele mgati ya idikonhi da idihema. 32 Hanhu ha kwingilila mdihema da kuiting'hanila, Haloni na wanage waje inyama ya ing'hondolo na imikate isigale mumgelo. 33 Hewo weiyeka wao wolondigwa kuija inyama na imikate yondailavigwe nhosa sama ya kugeligwa kumgongo vilozo vao mkipigiti cha kusimikwa na kubagulwa sama yangu nie. Haduhu munhu iyagwe yolondigwa kuija, kwavija vinhu vino ving'ala. 34 Kamba kiasi cha inyama ama kiasi cha umkate visigala mbaka imitondo, visomigwe. Sambividigwe, kwavija ving'ala.
35 “Watendele Haloni na wanage kila kinhu kinikulagize, watendele lusona lwa kuwasimika mkipigiti cha mazua saba. 36 Kila zua ulave nhosa ya songolomi wa ng'ombe iwe nhosa ya upatanizo. Vivija ulave nhosa ya upatanizo sama ya ikilingo cha kulukuzila nhosa, kipigiti uhakitendela upatanizo ikilingo cha kulukuzila nhosa, na ukibake mavuta, na kukibagula sama yangu nie. 37 Mkipigiti cha mazua saba tenda ung'alizo sama ya ikilingo cha kulukuzila nhosa na ukibagule sama yangu nie. Abaho ikilingo cha kulukuzila nhosa chong'ala kabisa, na munhu yoyose yondayakikwase ikilingo cha kulukuzila nhosa kong'ala.
Nhosa za Kila Zua
(Mhet. 28:1-8)
38 “Zino zizo nhosa zondaunilavile nie kila zua mkilingo cha kulukuzila nhosa. Kila zua ulave ng'hondolo wabili wa mulao umwe. 39 Ng'hondolo imwe mulave imitondo na ng'hondolo iyagwe mulave ichungulo. 40 Ng'hondolo wa ichanduso umulave hamoja na kilo imwe ya usage unogile wa ngano utibulizwe na lita imwe ya mavuta ganogile ga mzaituni. Gida lita imwe ya divai iwe kamba nhosa. 41 Mulave ng'hondolo wa ikabili mkipigiti cha ichungulo, mulave hamoja na kiasi kikija cha usage wa ngano, mavuta ga mzaituni, na divai kamba vuutendile imitondo, iwe nhosa inung'hila goya, nhosa ya kulukuza ha nie, MNDEWA. 42 Mkipigiti chose kikwiza, nhosa ino ya kulukuza ilavigwe haulongozi wangu hanhu ha kwingilila mdihema da kuiting'hanila, aho hondaniiting'hane na wanhu zangu na kulonga na gweye. 43 Ako vivija noiting'hana na Waislaeli, na hanhu aho hong'alizwa na yenzi yangu. 44 Novibagula sama yangu nie idihema da kuiting'hanila na ikilingo cha kulukuzila nhosa. Na vivija nowabagula Haloni na wanage sama yangu nie giladi wanisang'hanikile nie kamba wakulu wa nhambiko. 45 Nokala hamoja na Waislaeli, na nie nowa Mulungu wao. 46 Na hewo wovitanga kamba nie iyo MNDEWA Mulungu wao, niwalavile muisi ya Misili giladi nikale hamoja na hewo. Nie iyo MNDEWA Mulungu wao.