1 “Usole m'biki wa mjoholo utende kilingo cha kufushila ubane. 2 Ng'ambu zose ziilinge, kiwe na utali wa sentimeta 45 na ugazi wa sentimeta 45 na wimo wa sentimeta 90. Mhembe zake zili mzimhembe zake nne zisongoligwe kulawa mdibiki dimwe ditendile ikilingo cha kufushila ubane. 3 Uchana ya ikilingo cha kufushila ubane, ng'ambu zake zose, na izimhembe zake zose uzigubikize na zahabu ing'alile. Na ukitendele lugigo lwa zahabu uchana kuzunguluka ikilingo cha kufushila ubane. 4 Ukitendele vitindi vibili va zahabu va kugogela izifimbo za kukipapila, hasi ya ulugigo lwake, mzing'ambu zake mbili. 5 Utende fimbo za m'biki wa mjoholo, na uzigubikize na zahabu. 6 Kilingo kino cha kufushila ubane cholondigwa ukike haulongozi wa idiguo ditungikigwe haulongozi wa idisanduku na ingubiko yake. Uchana ya ingubiko baho hanhu hondanilonge na gweye. 7 Kila imitondo kipigiti Haloni yeheza kuvigongomanya iviwenge, yafushe ubane unung'hila goya uchana ya ikilingo cha kufushila ubane. 8 Na kila ichungulo kipigiti yahabwinha iviwenge, vivija kolondigwa yafushe ubane haulongozi wangu nie, MNDEWA. Mbuli ino yolondigwa itendeke mmilelo yako yose yondaize. 9 Sambiufushe ubane wowose ugomesigwe uchana ya ikilingo cha kufushila ubane, ama nhosa yoyose ya kulukuza, ama nhosa yoyose ya usage, na sambiugide nhosa yoyose ya divai uchana yake. 10 Mwanza umwe mmulao umwe Haloni kolondigwa yatende mpatano sama ya ikilingo cha kufushila ubane mkuzibaka zimhembe za ikilingo na mulopa wa mng'onyo yalavigwe nhosa ya kuwapataniza wanhu watendile vilozo. Sang'hano ino yolondigwa itendeke na Haloni na milelo yake yose yondaize, kwavija kino kicho kilingo cha kufushila ubane king'alile ha MNDEWA.”

11 Abaho MNDEWA kamulongela Musa, 12 “Kipigiti vondauwapete Waislaeli, kila munhu yalihe hela kumwangu sama ya kuukombola ugima wake, giladi sambiyavikigwe na utamu wihile ng'hani mkipigiti cha wanhu kupetigwa. 13 Kila munhu yopetigwa kolondigwa yalihe lwenza lwa kidanga cha madini ga feza kulingana na kipimilo kili mdihema da kuiting'hanila. Lwenza luno lwa ikidanga cha madini ga feza lowa nhosa kumwangu nie, MNDEWA. 14 Kila munhu yopetigwa, songela munhu yali na milao malongo mabili na kugendelela, kolondigwa yanilavile nhosa nie, MNDEWA. 15 Munhu yali mgoli sambiyabanzilize kulava, na mkumbulu sambiyahunguze kulava kipigiti cha kulava nhosa ya mpatano na MNDEWA sama ya ugima wenu. 16 Zibokele hela hizo za mpatano kulawa ha Waislaeli zitende sang'hano ya kudigongomanya idihema da kuiting'hanila. Hela hizo zowatenda Waislaeli wakumbukigwe haulongozi wangu nie, MNDEWA, na kutenda mpatano sama ya ugima wenu.”

17 Abaho MNDEWA kamulongela Musa, 18 “Tenda teleko da shaba na kikalilo chake kiwe cha shaba sama ya kunavila magulu na makono. Dike hagatigati ya idihema da kuiting'hanila na ikilingo cha kulukuzila nhosa, abaho dimemeze mazi. 19 Haloni na wanage wolondigwa wanave magulu gao na makono gao na mazi gali mditeleko dino. 20 Kipigiti wehengila mdihema da kuiting'hanila, ama kipigiti cha kukwenhukila ikilingo cha kulukuzila nhosa muisang'hano ya kulava nhosa ya kulukuza ha MNDEWA, wolondigwa wainave na mazi gano, giladi sambiwadanganhike. 21 Wolondigwa wainave magulu gao na makono gao, giladi sambiwadanganhike. Haloni na lukolo lwake wolondigwa waigoge ndagizi ino milongo yose.”

22 Abaho MNDEWA kamulongela Musa, 23 “Sola vilungilo vino vinogile, kilo sita za manemane ga ululu, kilo ndatu za mdalasini unung'hila goya, kilo ndatu za migua inung'hila goya, 24 na kilo sita za namna iyagwe ya mdalasini zipimigwe kulingana na kipimilo kili mdihema da kuiting'hanila. Yongeza na lita nne za mavuta ga mzaituni, 25 na ugatende mavuta gano gang'alile ga kubakala kamba viyatendaga galu wa kutenda mavuta ga kunung'hila. Gowa mavuta gang'alile ga kubakala. 26 Abaho ugasole na ubakaze mdihema da kuiting'hanila, Mdisanduku da Lagano, 27 muimeza na via vake vose, mkiguzo cha kwikila viwenge na via vake vose, mkilingo cha kufushila ubane, 28 mkilingo cha kulukuzila nhosa hamoja na via vake vose, na mditeleko hamoja na kikalilo chake. 29 Uvibagule sama yangu nie giladi ving'ale ng'hani, na munhu yoyose yondayavikwase kong'ala, na kinhu chochose chondakivikwase chong'ala. 30 Uwabake mavuta Haloni na wanage na uwabagule sama yangu nie giladi wanisang'hanikile nie wawe wakulu wa nhambiko. 31 Walongele Waislaeli, ‘Gano gowa mavuta gang'alile gangu nie, MNDEWA, ga kubakala mmilelo yenu yondaize. 32 Sambim'bakale mavuta gano kamba vum'bakala mavuta gayagwe mzing'huli zenu na sambimtende mavuta gayagwe na vilokotelo vilingile na vino. Mavuta gano gang'ala, na golondigwa gang'ale kumwenu mweye. 33 Munhu yoyose yotenda mavuta galingile na gano, ama kum'baka munhu yoyose yalekile kuwa mkulu wa nhambiko, munhu hiyo kolondigwa yasegezigwe kulawa mmwanza wa wanhu zake.’ ”

34 Abaho MNDEWA kamulongela Musa, “Deha kiasi kiilingile kulawa m'vilungilo vose vilimwilile vili hano hasi, ululu wa natafi, ululu wa shekeleti, ululu wa kelibena, na ubane unung'hila goya ung'alile. 35 Sola vilungilo uvike hamoja, na uvitibulize kamba galu wa kutenda mavuta ga kunung'hila viyatendaga, abaho uvimizile munyu giladi upate ubane unung'hila goya unogile na ung'alile. 36 Sola vilungilo kidogo uvisiginhe viwe usage, na uvike haulongozi wa Idisanduku da Lagano mdihema da kuiting'hanila, ako kondaniiting'hane na gweye. Uno wowa ubane ung'alile ng'hani kumwenu. 37 Sambimkiitendele ubane wowose mnzila ino, uvitange kamba uno uwo ubane ung'alile kumwangu nie, MNDEWA. 38 Munhu yoyose yotenda ubane kamba uno sama ya kuitenda yanung'hile kolondigwa yasegezigwe kulawa mmwanza wa wanhu zangu.”