1 Wanhu viwonile kamba Musa kakawa kuhumuluka kulawa hakigongo, wamzunguluka Haloni, na kumulongela, “Izo, ututendele miungu, ayo yondaitulongole, kwavija Musa ija, yatulavile tweye kulawa muisi ya Misili, hatukitanga kinhu kimulawilile.”

2 Haloni kawalongela, “Soleni heleni za zahabu zili mmagwiti ga watwanzi zenu, wamhale zenu, na wandele zenu, na mzigale kumwangu.” 3 Avo wanhu wose wazivula ziheleni za zahabu kulawa mmagwiti gao, na kumgwelela Haloni. 4 Kazisola zija ziheleni, kazilumbula, na kutenda nyago da songolomi wa mwanang'ombe.

Abaho walonga, “Ino iyo miungu yetu tweye Waislaeli itulavile muisi ya Misili!”

5 Abaho Haloni kazenga kilingo cha kulavila nhosa haulongozi wa imwanang'ombe wa zahabu na kulonga, “Mayo kowa na lusona ha MNDEWA.” 6 Walamuka imitondo ng'hani zua da ikabili, walava nhosa za kulukuza na kugala nhosa za tindiwalo, abaho wakala hasi waja na kung'wa, wenuka na kuvina.

7 MNDEWA kamulongela Musa, “Humuluka hasi, kwavija wanhu zako, awo uuwalavile muisi ya Misili, watenda vilozo na kunilema nie. 8 Hima wazileka mbuli zose ziniwalondile hewo wazitende. Wakiitendela nyago da zahabu dilumbile kamba mwanang'ombe, wakitambikila na kukilavila nhosa, abaho walonga kamba ino iyo miungu yao iwalavile kulawa muisi ya Misili. 9 Niwona wanhu wano, vija viwali na singo ndala. 10 Nileke niwonele lusango, niwabanange. Abaho nokutenda gweye na lukolo lwako kuwa undewa mkulu.”

11 Ila Musa kamuyalalila MNDEWA Mulungu wake. Kalonga, “MNDEWA, habali uwonela lusango wanhu zako, awo uuwalavile muisi ya Misili na udaho mkulu na mkono wene mhiko? 12 Habali uwatenda Wamisili walonge kamba Mulungu wao kawalava muisi ya Misili kuno yali na nia ihile ya kuwakomela mmigongo na kuwabananga? Luhindule lusango lwako, hindula ngelegeza zako, na sambiugale mwangalo mwa wanhu zako. 13 Wakumbukile watumigwa zako Ablaham, Isaka, na Yakobo, awo yuuwaduilile gweye mwenyego, ulonga, ‘Nozitenda ng'holo zenu zongezeke kamba nhondo za kuulanga, na kuwagwelela isi inikile kilagano na mweye kamba, ng'holo zenu ziihale gunge na gunge.’ ” 14 Avo MNDEWA kazihindula ngelegeza zake na kugimbula kuwatendela wanhu zake mbuli ihile iyalondile kuwatendela.

15 Abaho Musa kahinduka na kuhumuluka hasi kulawa mkigongo, kuno yapapile mbamha mbili za mabwe za Lagano mmakono gake, mbamha zikalile zandikigwe ng'ambu zose, kuulongozi na kuchugu. 16 Mbamha zino zikala zitendigwe na Mulungu mwenyego, na izinyandiko zikala nyandiko za Mulungu, zisongoligwe uchana ya izimbamha.

17 Yoshua viyahulike nyangi za wanhu woguta, kamulongela Musa, “Hana dizwi da ng'hondo mgati ya ing'hambi.”

18 Ila Musa kalonga, “Sio dizwi da mhuma ama kililo cha kuhumwa, ila dinihulika nie dizwi da wanhu wokwimba.”

19 Musa viyaikwenhukile ing'hambi na kona imwanang'ombe wa zahabu na wanhu wovina, kona lusango ng'hani na kwasa izimbamha kulawa mmakono gake, kazibena vidangavidanga hasi ya idigongo. 20 Kamsola imwanang'ombe ija iwamtendile na kumsoma muna umoto. Abaho kamsiginha na ija imwanang'ombe kawa kamba usage, abaho Musa kausola uusage na kuumizila mmazi na kuwashulutiza Waislaeli wang'we. 21 Musa kamulongela Haloni, “Choni chawakutendele wanhu wano mbaka kuwalongoza mkilozo kikulu kamba kino?”

22 Haloni kalonga, “Sambiwone lusango, mndewa wangu, gweye mwenyego kovitanga vija wanhu wano viwehile. 23 Wanilongela, ‘Tutendele miungu yondaitulongoze, kwavija Musa ija, ayo yatulavile tweye kulawa muisi ya Misili, hatukitanga kinhu kimulawilile.’ 24 Avo niwalongela, ‘Munhu yoyose yali na zahabu, yaivule.’ Abaho wanigwelela zizahabu, na nie nizigela muna umoto, na kalawilila mwanang'ombe ino.”

25 Musa kona kamba wanhu watenda mbuli za ubozi, na Haloni iyo yawalekile watende mbuli za ubozi na kuwatenda wasekigwe na wadumuka zao. 26 Avo Musa kema hanhu ha kwingilila muna ing'hambi na kulonga, “Munhu yoyose yali ng'ambu ya Mulungu, yeze kumwangu!” Na Walawi wose wamcholela na kumzunguluka. 27 Abaho kawalongela, “Vino vivo MNDEWA, Mulungu wa Islaeli, voyolonga, ‘Kila munhu mmwanza wenu yadifunge mchuno zele jake na kuchola kuchugu cha ing'hambi na kuulongozi wa ing'hambi kulawa ng'ambu ino mbaka ng'ambu iyagwe yakamkome ndugu yake, mbwigaake, na munhu wa habehi yake.’ ” 28 Walawi watenda kamba Musa viyawalagize, na mdizua hijo wanhu alufu ndatu (3,000) wadanganhika. 29 Abaho Musa kalonga, “Lelo muisimika wenyego sama ya sang'hano ya MNDEWA, kwavija mtogola kuwakoma wanenu na wandugu zenu, na MNDEWA lelo kowamoteza.”

30 Imitondo iyagwe Musa kawalongela waja iwanhu, “Mtenda vilozo vikulu ng'hani. Ila sambi nochola ha MNDEWA, siku nodaha kutenda mpatano sama ya vilozo venu.” 31 Avo Musa kabweleganya ha MNDEWA na kulonga, “Wanhu wano watenda vilozo vikulu ng'hani. Wakitendela wenyego miungu ya zahabu. 32 Ila sambi, nokuyalalila uvigele kumgongo vilozo vao. Ila kamba huwagela kumgongo, disegeze twaga jangu mkitabu chuuwandike matwaga ga wanhu zako.”

33 MNDEWA kamulongela Musa, “Munhu yoyose yanitendile vilozo iyo yondanidisegeze twaga jake mkitabu changu. 34 Sambi genda, walongoze wanhu mbaka hanhu hanikulongele, na msenga wangu wa kuulanga kokulongola, ila kipigiti chokwiza aho hondaniwasune wanhu wano sama ya vilozo vao.”

35 Avo MNDEWA kaugala utamu wihile ng'hani mwa wanhu, kwavija viwamswagize Haloni yatende nyago da mwanang'ombe.