1 MNDEWA kamulongela Musa, “Segela hanhu hano, gweye hamoja na wanhu yuuwalavile muisi ya Misili, na uchole kuisi iniwaduilile kuwagwaa Ablaham, Isaka, na Yakobo, ahaja viniwalongele kamba nowagwelela ng'holo zao isi ino. 2 Nomulagiza msenga wangu wa kuulanga yawalongole, na nie nowawinga Wakanaani, Waamoli, Wahiti, Wapelizi, Wahivi, na Wayebusi. 3 Gendeni muisi ili na lutuba na ugoli. Ila nie sichola hamoja na mweye, kwavija nihachola na mweye, nowabananga mnzila, mana mweye mwa wanhu muli na singo ndala.”

4 Wanhu viwahulike mbuli zino zihile, wasonga kona giogio na haduhu munhu yaihambile. 5 Kwavija MNDEWA kakala yamulongele Musa, “Walongele Waislaeli, ‘Mweye mwa wanhu muli na singo ndala. Kamba nihacholile na mweye, mkipigiti kiguhi nihawabanange. Avo segezeni mahamba genu, giladi nilamule kija chondaniwatende.’ ” 6 Avo Waislaeli wavula mahamba gao haja Hadigongo da Holebu.*Holebu dijo twaga diyagwe da Gongo da Sinai.

7 Musa kaisola ihema na kuiwamba kutali kidogo hanze ya ing'hambi na kaikema hema ya kuiting'hanila. Na munhu yoyose yalondile kutambika kalondigwa yalawe yachole kuihema ya kuiting'hanila, ikalile hanze ya ing'hambi. 8 Na mazua gose Musa viyakalile yochola kuihema ya kuiting'hanila, wanhu wose wenuka na kwima hanhu ha kwingilila mzihema zao. Wamulola Musa mbaka viyengile muihema ya kuiting'hanila. 9 Musa viyeshile kwingila muihema ya kuiting'hanila, wingu dilingile na nguzo dihumuluka na kukala hanhu ha kwingilila muihema ya kuiting'hanila kipigiti MNDEWA viyakalile yolonga na Musa. 10 Mazua gose wanhu viwajonile idiwingu dilingile na nguzo dimile hanhu ha kwingilila muihema ya kuiting'hanila, wanhu wose wenuka na kuinamila, kila munhu hanhu hake ha kwingilila muihema yake. 11 MNDEWA kalonga na Musa kihanga kwa kihanga, kamba vija munhu na mbwigaake. Abaho Musa kabwela mng'hambi. Ila mmhale yakalile yomtaza Musa, yokemigwa Yoshua mwana wa Nuni, kasigala muihema ya kuiting'hanila.

12 Musa kamulongela MNDEWA, “Lola, gweye kunilongela niwalongoze wanhu wano, na kunilongela kamba kunitanga nie mkunitambula na twaga. Kunogelwa na nie, ila hunilongele ija yondaumtume yachole hamoja na nie. 13 Kamba kweli gweye kunogelwa na nie, nifundize nzila zako, giladi nie nikutange goya na nigendelele kukunogeza. Na sambiuisemwe kamba wano wanhu zako.”

14 MNDEWA kalonga, “Nie mwenyego nochola hamoja na gweye, na nie nokugwelela gweye mhumulo.”

15 Musa kamulongela MNDEWA, “Kamba gweye huchola na tweye, sambiutulave hanhu hano. 16 Wanhu wovitangaze kamba gweye kunogelwa na nie hamoja na wanhu zako kamba hucholile hamoja na tweye? Kinhu chaki kiyagwe chondakitutende nie hamoja na wanhu zako sambituilinge na wanhu wayagwe muisi?”

17 MNDEWA kamulongela Musa, “Nokitenda kila kinhu chuunipulile, kwavija ninogelwa na gweye na nikutanga mkukutambula na twaga jako.”

18 Musa kalonga, “Nokuyalalila, nilagusile yenzi yako.”

19 MNDEWA kalonga, “Nokutenda wone unozi wangu, na nokulongela kinaganaga kamba YEHOVA dijo twaga jangu, na nomtendela ganogile na kumonela bazi munhu yoyose inimsagule. 20 Ila hudaha kuchona kihanga changu, kwavija haduhu munhu yondayanyone nie abaho yawe mgima. 21 Lola, kuna hanhu behi na nie aho baho haulondigwa kwima uchana ya idibwe. 22 Na yenzi yangu vondaibite, gweye nokwika mmhango ya idibwe na kukugubika na mkono wangu mbaka vondanibite. 23 Abaho nousegeza mkono wangu, na gweye kowona mgongo wangu, ila huchona kihanga changu.”