1 MNDEWA kamulongela Musa, “Songola mbamha mbili za mabwe kamba zija za ichanduso, na nie nokwandika mbuli zikalile mzimbamha za ichanduso zuuzibenile. 2 Mayo imitondo uisasale, ukwele uchana hainhembeti ya Idigongo da Sinai uiting'hane na nie. 3 Sambiukwele na munhu yoyose, na sambiyoneke munhu yoyose hanhu hohose mdigongo, na haduhu ng'hondolo ama ng'ombe yondayachungigwe hasi ya idigongo.” 4 Musa kasongola mbamha mbili za mabwe kamba zija za ichanduso, na imitondo ng'hani kakwela Idigongo da Sinai, kamba MNDEWA viyamulagize, kuno yazipapile zimbamha mbili za mabwe mmakono gake.

5 MNDEWA kahumuluka hasi mdiwingu na kwima hamoja na Musa, na kudipeta twaga jake dikemigwa YEHOVA. 6 Abaho MNDEWA kabita haulongozi wa Musa, kalonga, “Nie iyo YEHOVA! MNDEWA! Mulungu mwene bazi na mwene ngekewa, nilibule lusango lwa himahima, nimemile noge dilekile kuhuha, na kuwabule uzenzeleganye. 7 Nogendelela kudilagusa noge jangu dilekile kuhuha ha maalufu ga milelo, nowagela kumgongo waja wali wavu na waja wahonyele na watendile vilozo, ila nowasuna awo woneke kuwa wavu na siwatagusa hewo weiyeka ila hamoja na wana zao na wana wa wana zao, mbaka mulelo wa ikadatu na mulelo wa ikane.”

8 Hima Musa kafugama mavindi kainamila mbaka hasi, na kutambika. 9 Musa kalonga, “Mndewa, kamba kweli kunogelwa na nie, nokuyalalila uchole hamoja na tweye. Wanhu wano wana singo ndala, ila tugele kumgongo wiho wetu na vilozo vetu utubokele, tweye twa wanhu zako mwenyego.”

10 Abaho MNDEWA kamulongela Musa, “Notenda lagano jangu hamoja na Waislaeli. Haulongozi wao notenda mizonza hainatendeka hanhu hohose muulumwengu na muundewa wowose. Wanhu wose awo uukala hagatigati yao wozona sang'hano ng'hulu zondanitende, kwavija notenda mbuli ya mkanganyo sama yako.” 11 Gagogeni gaja ganiwalagiza lelo. Lola, nowawinga haulongozi wenu Waamoli, Wakanaani, Wahiti, Wapelizi, Wahivi, na Wayebusi. 12 Mteganye, sambimtende lagano hamoja na wanhu wa isi imuicholela, kamba muhatenda avo, yowa mtego kumwenu. 13 Ila uvibomole vilingo vao va kulavila nhosa, uibene miguzo yao ya mibwe yowoitambikila, na uzikanhe nguzo zao zowomtambikila mulungu wao wa kitwanzi yokemigwa Ashela.

14 “Sambiumtambikile mulungu iyagwe yoyose, kwavija nie, MNDEWA, nikemigwa wivu, nie iyo Mulungu mwene wivu. 15 Mteganye sambimtende lagano jojose hamoja na wanhu wokala muisi hiyo, kwavija kipigiti wahaitambikila miungu yao ya kimhazi na kuilavila nhosa, wowagoneka na mweye muilumbe na hewo na kuja mandia gowowalavila nhosa miungu yao. 16 Wanenu wa kimbigalo wowasola wandele zao, na wandele wano woitambikila miungu yao ya kimhazi, vivija wowaswagiza na wanenu waitambikile miungu ya kimhazi ya watwanzi zao.

17 “Sambiutende minyago ya chuma na kuitambikila.

18 “Tendeni Lusona lwa Mikate Ilibule Mela. Mmazua saba dieni mikate ilibule mela, kamba vija viniwalagize. Tenda lusona luno mkipigiti cha mulenge wa Abibu, kwavija hiwo uwo mulenge umulawile muisi ya Misili.

19 “Wanenu wose waudele wa kimbigalo na wana wose waudele wa kimbigalo wa wang'onyo zenu wa kufuga wowa wangu nie. 20 Mkombole mwana wa udele wa mhunda mkumulihila mwanang'hondolo, ila kamba humkombole, m'bene singo yake. Wakombole wana wenu wose wa udele wa kimbigalo.

“Munhu sambiyeze haulongozi wangu bila kinhu.

21 “Mazua sita sang'hanikeni, ila zua da saba humuleni, hata mkipigiti cha kulima ama mkipigiti cha kuhuna, humuleni.

22 “Tendeni Lusona lwa Kuhuna kipigiti cha kusonga kuhuna vakuja va ichanduso va ngano zenu, na tendeni Lusona lwa Vizewe kipigiti cha msimu wa kumambukiza kuhuna vakuja venu.

23 “Mianza midatu kila mulao wambigalo wose weze kunitambikila nie, MNDEWA, Mulungu wa Islaeli. 24 Nie nogawinga madale ga wanhu gasegele muisi yenu na kuzongeza mbaka zenu. Haduhu munhu yondayaisulukile isi yenu kipigiti vondamchole kunitambikila nie, MNDEWA, Mulungu wenu, mianza ino midatu ya kila mulao.

25 “Sambimunilavile nhosa ya mulopa wa wang'onyo wachinjigwe hamoja na mikate igeligwe mela. Sambimsigaze nyama ya nhosa Mulusona lwa Pasaka mbaka imitondo.

26 “Vakuja vinogile ng'hani va malimbuko va mgunda wako uvigale kung'anda yangu nie, MNDEWA Mulungu wako.

“Sambiumtogose mwanamenhe mmatombo ga mamaake.”

27 MNDEWA kamulongela Musa, “Wandike mbuli zino zose zinikulongele, mzimbuli zino notenda lagano na gweye hamoja na Waislaeli wose.” 28 Musa kakala hakigongo hamoja na MNDEWA mazua malongo mane misi na kilo, kipigiti chose hadile mandia na hang'wile mazi. Kakala yokwandika mbuli za lagano mzimbamha, azo zikalile ndagizi longo dimwe.

29 Musa viyakalile yohumuluka Mdigongo da Sinai kuno yapapile zija zimbamha mbili za lagano mmakono gake, havitangile kamba kihanga chake kikala kinang'hazika kwavija kakala yalongile na MNDEWA. 30 Haloni na Waislaeli wose viwakiwene kihanga cha Musa kinang'hazika, wadumba kumkwenhukila. 31 Ila Musa kawakema, avo Haloni na vilangizi wose wa wanhu wamkwenhukila, na Musa kalonga na hewo. 32 Abaho Waislaeli wose wamkwenhukila, na heyo kawagwelela malagizo gose gayamgwelele MNDEWA kipigiti viyakalile Mdigongo da Sinai. 33 Musa viyamambukize kulonga na hewo, kakigubika kihanga chake na kiziweziwe. 34 Kila kipigiti Musa viyakalile yokwingila mdihema da kuiting'hanila kulonga na MNDEWA, kakivula ikiziweziwe mbaka viyalawile hanze. Na kipigiti viyalawile hanze, kawalongela Waislaeli kila kinhu MNDEWA kiyamulongele yakilonge. 35 Waislaeli wachona kihanga chake vukikalile kinang'hazika. Abaho Musa kakivala kabili ikiziweziwe mkihanga chake mbaka viyengile kabili kulonga na MNDEWA.