1 Yakobo kafungasha vinhu vose viyakalile navo na kuchola Beeli-Sheba kulava nhosa ha Mulungu wa tataake Isaka. 2 Mulungu kalonga na Yakobo mnzozi kamkema na kulonga, “Yakobo, Yakobo!”

Yakobo kedika, “Nie hano.”

3 Mulungu kalonga, “Nie iyo Mulungu wa tataako, sambiudumbe kuchola Misili, kwavija ako nokutenda gweye kuwa undewa mkulu. 4 Nie nochola na gweye Misili na nolubweza lukolo lwako kabili muisi ino. Na gweye kodanganhikila mmakono ga Usufu.”

5 Avo Yakobo kasegela Beeli-Sheba. Wanage wamsola Yakobo tataao na wana zao na watwanzi zao wawagela mmikwama iyawagalile Falao. 6 Wasola fugo zao, na vinhu viwakalile navo haja Kanaani. Yakobo na lukolo lwake lose wachola Misili. 7 Kachola hamoja na wanage wa kitwanzi na wa kimbigalo na wazukulu zake wa kitwanzi na wa kimbigalo. Lukolo lwake lose kalugala Misili.

8 Gano gago matwaga ga wana wa Yakobo wacholile Misili. Mwana wa ichanduso wa Yakobo kakala Lubeni. 9 Wana wa Lubeni wakala Hanoki, Palu, Heziloni, na Kami. 10 Mwana iyagwe wa Yakobo kakala Simioni. Wana wa Simioni wakala Yemueli, Yamini, Ohadi, Yakini, Zohali, na Shauli. Shauli kakala mwana iyamulelile na mtwanzi wa Kanaani. 11 Mwana iyagwe wa Yakobo kakala Lawi. Wana wa Lawi wakala Gelishoni, Kohasi, na Melali. 12 Mwana iyagwe wa Yakobo kakala Yuda. Wana wa Yuda wakala Eli, Onani, Shela, Pelezi, na Zela. Ila Eli na Onani wadanganhikila muisi ya Kanaani. Wana wa Pelezi wakala Heziloni na Hamulu. 13 Mwana iyagwe wa Yakobo kakala Isakali. Wana wa Isakali wakala Tola, Puva, Jashubu, na Shimloni. 14 Mwana iyagwe wa Yakobo kakala Zabuloni. Wana wa Zabuloni wakala Seledi, Eloni, na Jaleeli. 15 Wano wao wana wa Lea iyamulelele Yakobo ako Padani-Alamu uhasegeza mndele wake Dina. Mheta ya wanhu wa lukolo lwa Yakobo watwanzi na wambigalo kubitila Lea, wose kwa wose wakala malongo madatu na wadatu.

16 Mwana iyagwe wa Yakobo kakala Gadi. Wana wa Gadi wakala Zifoni, Hagi, Shuni, Eziboni, Eli, Alodi, na Aleli. 17 Mwana iyagwe wa Yakobo kakala Asheli. Wana wa Asheli wakala Imna, Ishiva, Ishivi, Belia, na lumbu jao Sela. Wana wa Belia wakala Hebeli na Malikieli. 18 Ino iyo mheta ya wanhu wa lukolo lwa Yakobo kubitila Zilpa, ayo Labani iyamgwelele mwanage Lea yawe mtumigwa wake, wose kwa wose wakala longo dimwe na sita.

19 Usufu na Benjamini wano wao wana wa Yakobo waleligwe na mtwanzi wake yokemigwa Laheli. 20 Manase na Eflaim wakala wana wa Usufu iyamulelele Asinati mwanage Potifela, mkulu wa nhambiko wa wambo da Heliopoli, muisi ya Misili. 21 Wana wa Benjamini wakala Bela, Becha, Ashibeli, Gela, Naamani, Ehi, Loshi, Mupim, Hupim, na Adi. 22 Ino iyo mheta ya wanhu wa lukolo lwa Yakobo kubitila Laheli, wose kwa wose wakala longo dimwe na wane.

23 Mwana iyagwe wa Yakobo kakala Dani. Mwana wa Dani kakala Hushim. 24 Mwana iyagwe wa Yakobo kakala Naftali. Wana wa Naftali wakala Jazeeli, Guni, Jezeli, na Shilem. 25 Ino iyo mheta ya wanhu wa lukolo lwa Yakobo kubitila Bilha, ayo Labani iyamgwelele mwanage Laheli yawe mtumigwa wake, wose kwa wose wakala saba.

26 Wanhu wacholile Misili hamoja na Yakobo, awo wakalile wa lukolo lwake Yakobo, uhawalava watwanzi wa wanage, wakala wanhu malongo sita na sita. 27 Uhongeza wana wabili wa Usufu iyawalelile Misili, wanhu wakalile wolawa mulukolo lwa Yakobo wakalile wacholile Misili wakala malongo saba.

28 Viwakalile wokwenhukila kuvika, Yakobo kamtuma Yuda yalongole yachole ha Usufu yakamulagile inzila icholile Gosheni. Viwavikile muisi ya Gosheni, 29 Usufu kengila mdikwama jake na kuchola Gosheni kuiting'hana na tataake Yakobo, viwaiting'hane Usufu kamkumbatila tataake msingo na kulila ng'hani. 30 Yakobo kamulongela Usufu, “Sambi nihadanganhika, haduhu mbuli kwavija nikona nene mwenyego kamba ung'hali mgima.”

31 Abaho Usufu kawalongela wandugu zake na wanhu wa mulango wa tataake, kalonga, “Nochola nikamulongele Falao kamba ndugu zangu na wose wali mng'anda ya tataangu weza kumwangu kulawa Kanaani. 32 Nomulongela kamba wanhu wano wafugaga wang'onyo avo weza na madale gao ga ng'hondolo, menhe, na ng'ombe na kila kinhu kiwalinacho. 33 Avo Falao yahawakema na kuwauza mna sang'hano yaki imtendaga, 34 mulongeleni kamba, ‘Mazua gose tweye watumigwa zako tochunga wang'onyo, kamba wahenga zetu viwakalile wotenda.’ Mkulonga vino kowaleka mkale muisi ya Gosheni.” Usufu kalonga vino kwavija wanhu wa Misili wakala wawehile ng'hani wachunga wang'onyo sama ya ndagizi za nhamanila yao.