1 Avo Usufu kachola na kumulongela Falao, kalonga, “Tataangu na wandugu zangu hamoja na madale gao ga ng'hondolo na ng'ombe na vinhu vao vose viwali navo weza kulawa Kanaani na sambi wa muisi ya Gosheni hano Misili.” 2 Kawasola wanhu watano mmwanza wa wandugu zake na kuwagala haulongozi wa Falao. 3 Falao kawauza, “Mna sang'hano yaki imtendaga?”

Walonga, “Mndewa, tweye twa wachunga wang'onyo kamba viwakalile wotenda wahenga zetu. 4 Twiza kukala muisi ino kwavija kuna iisi ya Kanaani kuna nzala mpamanho, na wang'onyo wa watumigwa zako wabule mijani. Avo tokuyalalila, utuleke watumigwa zako tukale hano Gosheni.”

5 Falao kamulongela Usufu, “Tataako na wandugu zako weza kumwako, 6 avo sagula hanhu hohose muisi ya Misili hawanogele hewo kukala, mwike tataako na wandugu zako hanhu hanogile ng'hani muna iisi, wagale wakakale muisi ya Gosheni, na kamba kuna wanhu mmwanza wao wali na udaho, watende kuwa wemilizi wa wang'onyo wangu.”

7 Abaho Usufu kamwingiza mng'anda tataake Yakobo, na kumwika haulongozi wa Falao, na Yakobo kammoteza Falao. 8 Falao kamulongela Yakobo, “Kuna milao mingahi songela hauvumbuke?”

9 Yakobo kamulongela Falao, “Milao yangu ya kutembela muisi ivika mia na malongo madatu, milao yangu ikala midodo, imemile migayo, hailingile na milao ya wahenga zangu kipigiti viwakalile wotembela muisi.” 10 Abaho Yakobo kammoteza Falao mwanza wa ikabili na kusegela. 11 Avo Usufu kaweka tataake na ndugu zake muisi ya Misili na kuwagwelela hanhu hanogile muisi ija behi na kiwambo kikemigwa Lamesesi kamba Falao viyalagize. 12 Usufu kawagwelela mandia tataake, ndugu zake, na wose wakalile mng'anda ya tataake, kulingana na mheta ya wana zao.

13 Nzala ikala mpamanho, kukala haduhu mandia muisi yose ya Misili na isi ya Kanaani, na wanhu wasonga kunyolila sama ya nzala. 14 Wanhu kulawa Misili na kulawa Kanaani viwakalile wogula vakuja, Usufu kazikunzanya hela zose na kuzigala kung'anda ya Falao. 15 Hela za wanhu wa Misili na za wanhu wa Kanaani vuzimalile, wanhu wose wa Misili weza ha Usufu na kumulongela, “Tugwelele mandia. Habali tudanganhike hameso gako? Kwavija hela zetu zose zimala.”

16 Usufu kawedika, “Kamba hela zenu zimala, basi natuibadilishe, ngweleleni wang'onyo zenu wa kufuga, na nie nowagwelela mandia.” 17 Avo wagala wang'onyo zao wa kufuga ha Usufu, na heyo kawagwelela mandia mkuibadilisha na falasi, ng'hondolo, menhe, ng'ombe, na mhunda. Avo mulao uja kawagwelela wanhu mandia mkuibadilisha na wang'onyo zao wose wa kufuga.

18 Mulao uja umala, vuusongile mulao uyagwe, wamwizila na kulonga, “Hatudaha kumfisa mndewa wetu kweli ino, kamba, hela zetu zimala, na wang'onyo zetu wa mmakono gako, twabule kinhu kisigale ila ng'huli zetu na migunda yetu. 19 Habali tweye tudanganhike hameso gako na migunda yetu ibanangike? Tugule tweye hamoja na migunda yetu mkutubadilisha na mandia. Tweye hamoja na migunda yetu towa nyakadala wa Falao. Tugwelele mbeyu giladi sambitudanganhike, na migunda yetu sambiigaluke luwala.”

20 Avo Usufu kamgulila Falao migunda yose ya Misili. Wamisili wose waguza migunda yao, kwavija nzala ikala mpamanho na migunda yose ikala ya Falao. 21 Na wanhu wose kulawa ng'ambu imwe ya isi mbaka ng'ambu iyagwe ya isi kawatenda kuwa nyakadala. 22 Migunda ilekile kuguligwa ikala migunda ya wakulu wa nhambiko kwavija wakulu wa nhambiko wakala wobokela mandia kulawa ha Falao, avo wakala bule kilamso cha kuguzila migunda yao 23 Usufu kawalongela wanhu, “Loleni, lelo niwagula mweye hamoja na migunda yenu muwe wa Falao, zino hano mbeyu, soleni mkahande mmigunda. 24 Kipigiti cha kuhuna kihavika, molondigwa mumgwelele Falao fungu dimwe kulawa mmafungu matano ga vakuja na mafungu mane gasigale msole mweye mkeke mbeyu na gawe mandia genu mweye na wanhu wose wali nzing'anda zenu hamoja na wanenu.”

25 Wamulongela, “Mndewa, gweye kuukombola ugima wetu na kututendela ganogile, na tweye towa nyakadala wa Falao.” 26 Avo Usufu kaditenda dija diwe lagizo da isi muisi yose ya Misili, na lagizo dino dosang'hanika mbaka lelo,*Mbaka lelo nhegulo yake mbaka kipigiti vichandikigwe kitabu kino. kamba fungu dimwe kulawa mmafungu matano dochola ha Falao, na migunda ya wakulu wa nhambiko iyo iiyeka ilekile kuwa migunda ya Falao.

27 Waislaeli wakala muisi ya Misili hanhu hokemigwa Gosheni, aho kuwapatile ugoli na kuwa na wana bwando na kongezeka ng'hani. 28 Yakobo kakala muisi ya Misili milao longo dimwe na saba, avo milao ya Yakobo yose kwa yose ikala mia na malongo mane na saba. 29 Kipigiti cha Yakobo kudanganhika vukikwenhuke, kamkema mwanage Usufu na kumulongela, “Kamba kweli nie ningila mmoyo wako, ika mkono wako hasi ya haza jangu uniduilile kamba konitendela galibule uzenzeleganye na gali kweli kamba hunizika muisi ya Misili. 30 Nihadanganhika, unisegeze hano muisi ya Misili ukanizike kuwazikigwe wahenga zangu.”

Usufu kamwidika, yolonga, “Notenda kamba vowolonga.”

31 Yakobo kamulongela Usufu, “Niduilile kamba kotenda avo.” Avo Usufu kamduilila Yakobo. Abaho Yakobo kainamila mulusazi lwake.