11
Taatabhugya akyaari kwaanga Abhiiziraeri okubha abhaatu bhaaye
1 Bhoono nirabhuurya, mbe, Taatabhugya yaangiri abhaatu bhaaye? Zeyi, naabhe hasuuhu! Enye omweene ni Mwiiziraeri, okurwa murwiibhuro rwa Aburahamu, mukisyooko kya Benjamini. 2 Taatabhugya ataangiri abhaatu bhaaye bhano akabhasora kweema ekyaaro kikyaari kubhuumbwa. Mutamenyiri kino Amakaamo Amahoreeru gakubhuga iguru yo omurooti Eriya hano yamuriririiri Taatabhugya iguru wa Abhiiziraeri? Akabhuga, 3 “Omukuru, abhaatu bhano bhiitiri abharooti bhaazo, bhasarirye ahagiro ho okuruusirya ekimweeso. Enye nisaagiri omweene ego, neebho bhareenda kuniita!”*Rora 1 Abhatemi 19:10, 14. 4 Nawe Taatabhugya akamukyoorabhwi? Akabhuga, “Niisaagiirye abhaatu ebhikwe muhuungati (7,000) bhano bhatakuseengera Baari.”†Rora 1 Abhatemi 19:18.
5 Naabhe bhoono ego niigo eri, bhasaagiri abhaatu bhasuuhu bhano Taatabhugya yabhasoriri kwo orubhaango rwaaye. 6 Bhasorirwe kwo orubhaango rwa Taatabhugya, kweego bhatakutuuribhwa kwe ekigirirye kya amahokya gaabhu. Kyeego bhaangatuuriibhwe kwe ekigirirye kya amahokya gaabhu, ambe orubhaango rutaangabheeri orubhaango kweeki. 7 Kweego, amangʼana gaazo gari ego. Abhiiziraeri bhakakomya bhe eheene embere wa Taatabhugya, nawe bhataabhweeni. Ni bharya bhano bhaasorirwe na Taatabhugya, nibho bhakabhona. Abhaandi bhoosi bhano bhakasaaga, Taatabhugya akabhakora bhabhe ne eziikoro kongʼu. 8 Ni kyeego Amakaamo Amahoreeru gakubhuga,
“Taatabhugya akabhakora bhabhe ne eziikoro kongʼu,
akabharibha ameeso okubha bhatarora,
kweeki akabharibha amatwi okubha bhatiigwa.
Niigo bhari reero yino.”‡Rora Obhuhiiti bhwe Emigiro 29:4; Isaya 29:10.
9 No omutemi Daudi akabhuga,
“Hano bhakukora eziinyaangi zyaabhu kwo obhuzomererwa,
Taatabhugya azikyoosye zibhe ekitiimbo kyo okubhatiimbya,
ne ekitiimbo kyo okugwiisya,
na zibhe obhutemwa kweebho.
10 Ameeso gaabhu gabhe mamwaamu,
okubha bhatarora kyokyoosi kweeki,
ne emigoongo gyaabhu gigeenderere okwiikiika,
okutuukana ne eziinyaako zyaabhu.”§Mumangʼana gayo ge Ezaburi, Daudi arabhuga amangʼana ga abhabhisa bhaaye. Bhoono Pauro agegiri amangʼana gayo aragagaambira amangʼana ga Abhiiziraeri bhano bhakwaanga okwiikirirya Amangʼana Amazomu iguru yo Omukuru Yeesu. Rora Zaburi 69:22-23.
Okwaanga kwa Abhiiziraeri kubheeri orubhaango
kubhano bhatari Abhiiziraeri
kubhano bhatari Abhiiziraeri
11 Bhoono nirabhuurya, mbe, Abhiiziraeri bhakiikuza okubha bhagwe no okusikibhwa bhukongʼu? Zeyi, naabhe hasuuhu! Nawe, ni kutuukana no okwaanga kwaabhu obhutuurya bhubhahikiiri abhaatu bhano bhatari Abhiiziraeri. Kwe enzira yiyo, Taatabhugya akeenda Abhiiziraeri bhiigwe eriihari ryo okubhona obhutuurya kyeego abhaatu bhano bhatari Abhiiziraeri bhaabhweeni. 12 Bhoono, abhaatu bhano bhatari Abhiiziraeri, bhakabhona orubhaango orukuru kwo okubha Abhiiziraeri bhakamwaanga Omutuurya. Ambe bharabhona naabhe orubhaango orukuru kukiraho hano Abhiiziraeri bhoosi bharaabhe bhatuuriibhwe.
13 Bhoono, niragaamba na neemwe, abhaatu bhano bhatari Abhiiziraeri. Eheene Taatabhugya akaanituma nibhe omweega kwiiguru wa abhaatu bhano bhatari Abhiiziraeri. Niraguungya emirimo giyo gino niheerwe, 14 nawe kwo okuhitira emirimo gyaane giyo, niriisiga kubha, Abhiiziraeri abharikyaane bhariigwa eriihari ryo okubhona obhutuurya kyeego emwe mwabhweeni, okubha abhamwe bhaabhu kweeki bhatuuribhwe. 15 Rora, hano Abhiiziraeri bhaamwaangiri Omutuurya, Taatabhugya neewe yabhaangiri, akiigwaana na abhaatu bhano bhatari Abhiiziraeri. Kweego, hano Taatabhugya ariikirirya Abhiiziraeri kweeki, erabha kya abhaku bharyookiri!
16 Eraabhe omuutu aramuruusirya Taatabhugya obhutoongore bhwa amagesa gaaye, ambe amagesa gaaye goosi garabha ni kwiiguru wa Taatabhugya. Kweeki, eraabhe omuutu aramuruusirya Taatabhugya emiri gyo omuzeituni, ambe naabhe amasagya gaaku goosi garabha ni kwiiguru wa Taatabhugya.*Abhasomi bhaaru bharabhuga kubha obhutoongore ne emiri gyo omuzeituni nigyo bhazaazi bha Abhiiziraeri bhano ni Aburahamu, Isaaka na Yaakobo. 17 Bhoono, agamwe ga amasagya gatinirwe, na amasagya agaandi go omuzeituni gwa mwiitirigo geemiibhwe gatigati wa amasagya go okutaanga. Amasagya goosi garabhona ebhyaakurya okurwa mumiri giryagirya gyo omuzeituni. Emwe bhoono, niimwe amasagya ge emizeituni gya mwiitirigo. 18 Kweego, mutazeera amatu gano gakatinwa. Mutiizuungya, na muhiite, emiri gitakubhiisigira emwe, nawe emwe niimwe mukugiisigira emiri.
19 Ahaandi muranagya okugaamba, “Amasagya gayo gakatinwa, okubha enye niemibhwe hagiro haabhu.” 20 Yiyo ni heene. Amasagya gayo gakatinwa kwo okubha gatiikiriirye, na naawe ori kyeego ori kwo okubha oriikirirya. Kweego, otiizuungya, nawe omwoobhohe Taatabhugya. 21 Eraabhe Taatabhugya akatema Abhiiziraeri bhano bhari simuka ya amatu ge emizeituni, naabhe awe, aranagya okukutema.
22 Murore kyeego Taatabhugya akukorera obhuzomu abhaatu abhaandi, na bhurya akutema abhaatu abhaandi kwo obhutemwa obhuhaari. Aratema bhano bhakaanga okumwiikirirya, na arakukorera obhuzomu awe, kyeego okugeenderera okumwiikirirya. Nawe kyeego oritiga okumwiikirirya, awe woosi oratinwa. 23 Eraabhe Abhiiziraeri bhayo bhariikyoora no okumwiikirirya Taatabhugya, bhareemibhwa kweeki mumuzeituni gyaabhu, kwo okubha Taatabhugya ano obhunagya bhwo okweemya kweeki. 24 Awe wuno otari Mwiiziraeri, awe ni kye eriitu ryo omuzeituni gwa mwiitirigo. Okatinwa no okweemibhwa mumuzeituni guno okeemibhwa na abhaatu, yiingabha kiyo ni kigiro kigini kukorwa. Bhoono ongʼure kubha, gutari murimo mukongʼu ku Taatabhugya okukyoorera okweemya Abhiiziraeri bhano bhaari amatu ge emizeituni mumuti guno gwaari ni gwaabhu abheene.
Taatabhugya arabharorera ebhigoongi abhaatu bhoosi
25 Abhahiiri bhaane mubhwiikirirya, ndeenda mumenye iguru ya amiiseego ga Taatabhugya gano gaari giibhisiri ekare, okubha mutaaza kwiirora bha amangʼeeni bhukongʼu. Abhamwe bha Abhiiziraeri bharabha ne eziikoro kongʼu eriibhaga iguhi ego, tee obhubhari bhukuunaane bhwa abhaatu bhano bhatari Abhiiziraeri bhasuungʼaane obhutuurya. 26 Kwe enzira yiyo, Abhiiziraeri bhoosi bharatuuribhwa. Ni kyeego Taatabhugya akabhuga mu Makaamo Amahoreeru,
“Omutuurya araaza okurwa mumugye gwa Sayuni,
arakora abhiibhurwa bha Yaakobo bhatige okumwaanga Taatabhugya.
27 Hayo niho eriiragano ryaane neeryo riraakuunaane,
hano niraabhaabhire ebhibhi bhyaabhu.ӠRora Isaya 27:9, 59:20-21; Yeremia 31:33-34.
28 Hano Abhiiziraeri bhaari bhaangiri Amangʼana Amazomu iguru wa Yeesu Krisito, bhakiikora kubha abhabhisa bha Taatabhugya. Nawe eriingʼana riyo ribheeri kwo obhweera bhweenyu, emwe abhaatu bhano mutari Abhiiziraeri. Naabhe, Taatabhugya akyaari aseegiri Abhiiziraeri, kwe ekigirirye yaari asoriri bhazaazi bhaabhu no okukora eriiragano nabho. 29 Taatabhugya araasore abhaatu bhaaye no okubhatweera ebhite, atakunagya okwiikyoosya amiiseego gaaye.
30 Ekare, emwe mutaari kumwiigwa Taatabhugya, nawe bhoono musuungʼaaniri ebhigoongi bhya Taatabhugya, kwo okubha Abhiiziraeri bhataamwiigwiiri. 31 Kwe eheene niigo eraabhe. Bhoono Abhayahudi bhatakumwiigwa Taatabhugya, nawe bharasuungʼaana ebhigoongi bhya Taatabhugya kyeego abhaatu bhano bhatari Abhayahudi bhabhweeni ebhigoongi bhya Taatabhugya. 32 Taatabhugya akatiga abhaatu bhoosi bhageenderere kumwaanga okumwiigwa no okubhohwa mubhwaangi bhwaabhu, okubha abharorere ebhigoongi abhaatu bhayo bhoosi.
Taatabhugya akumibhwe
33 Weyaa! Ni weewi wuno akunagya okumenya kyeego bhuri obhuniibhi, amangʼeeni no obhumenyeekererya bhwa Taatabhugya? Bhirakira okumenyeekererya kweetu! Atariho omuutu wuno akunagya okumenya obhwaamuri bhwaaye kasi amiiseego gaaye. 34 Ni kyeego Amakaamo Amahoreeru gakubhuga,
“Ni weewi wuno akunagya okumenya amiiseego go Omukuru, Taatabhugya?
Ni weewi wuno akumutoongera?”‡Rora Isaya 40:13.
35 “Ni weewi wuno akamuha Taatabhugya ekigiro
kino Taatabhugya areenderwa kumukyoorerya?ӤRora Ayubu 41:11.
36 Taatabhugya niwe wuno akateema ebhigiro bhyoosi.
Kwo okuhitira kweewe ebhigiro bhyoosi bhirageenderera kubhaho,
ne ebhigiro bhyoosi bhiriho kwiiguru wo obhuguungo bhwaaye.
Taatabhugya aguungibhwe kirakeego! Gabhe ego.
*11:3 Rora 1 Abhatemi 19:10, 14.
†11:4 Rora 1 Abhatemi 19:18.
‡11:8 Rora Obhuhiiti bhwe Emigiro 29:4; Isaya 29:10.
§11:10 Mumangʼana gayo ge Ezaburi, Daudi arabhuga amangʼana ga abhabhisa bhaaye. Bhoono Pauro agegiri amangʼana gayo aragagaambira amangʼana ga Abhiiziraeri bhano bhakwaanga okwiikirirya Amangʼana Amazomu iguru yo Omukuru Yeesu. Rora Zaburi 69:22-23.
*11:16 Abhasomi bhaaru bharabhuga kubha obhutoongore ne emiri gyo omuzeituni nigyo bhazaazi bha Abhiiziraeri bhano ni Aburahamu, Isaaka na Yaakobo.
†11:27 Rora Isaya 27:9, 59:20-21; Yeremia 31:33-34.
‡11:34 Rora Isaya 40:13.
§11:35 Rora Ayubu 41:11.