12
Mwiiruusye obhwiikari bhweenyu mumuhokeerye Taatabhugya
1 Bhoono abhahiiri bhaane, mumenyiri kyeego Taatabhugya araturorera ebhigoongi. Kweego, nirabhiisasaama kubha, mwiiruusye obhwiikari bhweenyu ku Taatabhugya. Mubhe kye ebhimweeso ebhihoru, ebhihoreeru, bhino bhikumuzomera. Okukora ego, nikwe enzira ye eheene yo okumuseengera Taatabhugya. 2 Muteega eziinyaangi zya abhaatu bhe ekyaaro kino, nawe mutige Taatabhugya akyoosye eziikoro zyeenyu, okubha mubhe na amiiseego amahya. Hayo niho mureega okumenya gano Taatabhugya akubheendera. Kino akubheendera ni mangʼana amazomu, gano gakuunaaniri, kweeki gakumuzomera.
3 Bhoono, Krisito aniheeri orubhaango nibhe omweega waaye. Kweego, ndabhabhuurira emwe mwoosi kubha, mutiirora kubha ni kigiro kukira kyeego mukweenderwa kubha. Amiiseego geenyu gabhe na kusuuhu kuriingʼaana ne ekireengo kyo obhwiikirirya bhuno Taatabhugya yabhaheeri abhaatu bhoosi.*Obhugazuro obhuundi bhuratura kubha, Abhaatu bhoosi bhiireenge kuriingʼaana no obhwiikirirya bhwaabhu. 4 Kyeego mumenyiri, omubhiri ni gumwe, nawe gune ebhiimo bhyaaru, ne ebhiimo bhyoosi bhirahokya emirimo egiindi. 5 Ego niigo na neetwe. Etwe turi bhaaru, nawe tubheeri omubhiri gumwe kwo okugwaatana na Krisito. Mumubhiri gwaaye, abhaatu bhoosi ni bhiimo bhya abharikyaabhu, na bhane emirimo gyaabhu.
6 Kweego, tuno obhuturo maanga maaru, kyeego Taatabhugya atuheeri kwo orubhaango rwaaye. Omuutu wuno aheerwe obhuturo bhwo okuruusya obhurooti, ahokeerye obhuturo bhuyo kuriingʼaana no obhwiikirirya bhwaaye. 7 Omuutu wuno aheerwe obhuturo bhwo okubhahokeerya abharikyaaye, abhahokeerye bhuzomu. Omuutu wuno aheerwe obhuturo bhwo okweegya, yeegye bhuzomu. 8 Omuutu wuno aheerwe obhuturo bhwo okubhatoongera ekoro abharikyaaye, akore bhuzomu. Omuutu wuno aheerwe obhuturo bhwo okuginihya abhaatu, aginihye kwe ekoro yoosi. Omuutu wuno aheerwe obhuturo bhwo obhukaangati, akaangate kwo omukya gwoosi. No omuutu wuno aheerwe obhuturo bhwe ebhigoongi, abharorere abhaatu ebhigoongi kwo obhuzomererwa.
Mwiiseege
9 Museege abharikyeenyu kwo obhuseegi bhwe eheene. Mubhiihirirye obhubhi, nawe mubhe murakora amazomu eriibhaga ryoosi. 10 Mwiiseege emwe kwe emwe kya abhahiiri. Mukore omukya okubhasuuka abharikyeenyu. 11 Mutabha bhatobhu kwo okukora emirimo gya Taatabhugya, nawe mukaangatwe ne Ekoro Muhoreeru okukora emirimo giyo kwo omukya.†Mukaangatwe ne Ekoro Muhoreeru okukora emirimo giyo kwo omukya, obhugazuro obhuundi bhuratura kubha, mugeenderere kukora emirimo giyo kwe ekoro yoosi. Mumuhokeerye Omukuru Yeesu. 12 Muzomererwe kwo okubha muriisiga mazomu goosi gano Taatabhugya yarageenie. Mugumire mwiibhaga rye enyaako, na mugeenderere okumusabha Taatabhugya. 13 Mubhasakirye abhahoreeru abharikyeenyu mumeendi gaabhu, na mubhe muraginihya abhagini muziinyuumba zyeenyu.
14 Musabhire abhaatu bhano bhakubhanyaakya, okubha Taatabhugya abhatweere ebhite. Mutabha murabhasabhira kubha bhiihiimwe. 15 Muzomererwe hamwe na bhano bhakuzomererwa, na murire hamwe na bhano bhakurira. 16 Mwiikare hamwe kwa amiiseego gamwe. Mutabha muriizuungya, nawe mwiiyiikye, mubhe no obhugwaatani na abhaatu bhi iyaasi. Mutiirora emwe ni bha amangʼeeni.
17 Hano abhaatu bhakubhakorera obhubhi, mutabhariha obhubhi kwo obhubhi. Nawe mwiiriihe okukora amazomu embere wa ameeso ga abhaatu bhoosi. 18 Mukore omukya okukora ryoryoosi rino emwe mukunagya, okubha mubhe no omureembe na abhaatu bhoosi. 19 Abhaseegwa bhaane, mutariha ekisiiyoomba, nawe mumutigire Taatabhugya yaamure ryo okukora. Niragaamba ego, kwo okubha mu Makaamo Amahoreeru Omukuru, Taatabhugya arabhuga, “Enye niwe wuno nikuriha ekisiiyoomba.”‡Rora Obhuhiiti bhwe Emigiro 32:35. 20 Kweeki, Amakaamo Amahoreeru garabhuga iguru yo okutama kuriha ekisiiyoomba,
“Eraabhe omubhisa waazo ane enzara, omuhe ebhyaakurya.
Ne eraabhe ane enyoota, omuhe kyo okunywa.
Orikora ego, orabha kyeego omukumaniirye amakara go omuriro kumutwe gwaaye.ӤOrabha kyeego omukumaniirye amakara go omuriro kumutwe gwaaye, abhasomi bhaaru bharabhuga obhugazuro bhwaku ni orabha omusuukirye iguru yo obhubhi bhwaaye kwo obhuzomu bhwaazo. Rora Eziimetari 25:21-22.
21 Otahizwa na amabhi gano abhaatu bhakukukorera, nawe ohize amabhi gayo kwo okubhakorera amazomu.
*12:3 Obhugazuro obhuundi bhuratura kubha, Abhaatu bhoosi bhiireenge kuriingʼaana no obhwiikirirya bhwaabhu.
†12:11 Mukaangatwe ne Ekoro Muhoreeru okukora emirimo giyo kwo omukya, obhugazuro obhuundi bhuratura kubha, mugeenderere kukora emirimo giyo kwe ekoro yoosi.
‡12:19 Rora Obhuhiiti bhwe Emigiro 32:35.
§12:20 Orabha kyeego omukumaniirye amakara go omuriro kumutwe gwaaye, abhasomi bhaaru bharabhuga obhugazuro bhwaku ni orabha omusuukirye iguru yo obhubhi bhwaaye kwo obhuzomu bhwaazo. Rora Eziimetari 25:21-22.