3
Mas nataak Jesús nake Moisés
1 Kona re goo wetsʼn ne btan na kuu nali nak lo Diox, lee Diox mrez goo tsa gak goo zha Diox, thibka ndoblo yelaaz goo Jesucrist, tak lee Jesucrist nak apóstl ne ngwleyy kuu kwathoz nataak loʼaa. 2 Ne nali nak Jesús lo Diox, leeka taxal nali ngok Moisés lo re zha Diox, dita leettsa mtsow Moisés rtsin Diox lo re zha Diox. 3 Per masraa mtsow nataak Diox Jesús nake Moisés, leeka taxal nak thib zha kuu nta thib yuu, mas nataak zha nake yuu. 4 Ne reta yuu kuu nyaa, men nak kuu ndexkwaay; per Diox nak cho kuu mdexkwaa reta kwaa nzo lo yezlyu ree. 5 Kona nali ngok Moisés lo re zha Diox, ne ngok zha mos ne mndaa zha kwent re kuu nzhab Diox tsow Diox bluz. 6 Per lee Jesucrist nak Xgann Diox, ne nali nak Jesucrist loʼaa zha kuu nak zha Diox, os leeʼaa thib nali nyelaazaa zha asta bluz, ne naley nzo leettsooʼaa por kuu ngebetaa taa zha loʼaa.
Tsow nadtaa leettsooʼaa, tsa tabaa roxkwanaa kon re zha Diox
7 Kona taxal nzhab Mbi Nayon chaan Diox lo xkeets Diox:
Os lee goo, gon goo kuu ne Diox naltseree,
8 tsowt nadt goo leettsoo goo, taxal mtsow re tey goo zha ndala,
leettsa mtsow zha mnayiin, tak mbint zha diiz lon yubiz.
9 Ne tegal chop gal liin mwii re tey goo zha ndala re kuu mtsowʼn,
ne bee mtsowka zha kuu went mbint zha diiz lon.
10 Kona mnayiin mnen re zha,
ne nzhapʼn:
“Thibka mtsow nad zha leettsoo zha,
ne mlebeet zha xnetʼn”.
11 Kona mnayiin mnen re zha, ne nzhapʼn: “Thitanax tabt zha roxkwan zha ta mdexkwaan par roxkwan zha”. [Sal. 95:7-11]
12 Kona re goo wetsʼn ne btan na bkenap goo goo, tak cha gak went leettsoo goo ne gak nad goo, ne laa goo Diox kuu naban. 13 Mas wen, bloo goo gan leettsoo altaa goo gandata wiz, anta yelo rid wiz naltseree, tsa neeka thib goo gagt nad leettsoo goo lo yalkedi chaan re kuu went. 14 Tak os leeʼaa thib nali toʼaa yelaazaa Jesucrist asta bluz taxal mndeloʼaa, tsasi thibka nakaa kon Jesucrist.
15 Ne kona, nzhab lo xkeets Diox:
Os lee goo gon goo kuu ne Diox naltseree,
tsow nadt goo leettsoo goo,
taxal mtsow re tey goo zha ndala, leettsa mtsow zha mnayiin. [Sal. 95:7-8]
16 ¿Ne cho re zha kuu ngwalo mbin bos Diox, ne ngwaloʼa mtsow zha mnayii Diox? ¿Chu nagte re zha kuu mloo Moisés Egipto? 17 ¿Cho lo mnayii Diox chop gal liin? ¿Chu nagte lo re zha kuu mndaa falt, re zha kuu nguth yubiz? 18 ¿Ne cho lo nzhab Diox tabt zha roxkwan zha, ta mdexkwaa Diox par roxkwan zha? Lo re zha kuu mbint diiz nzhab Diox kona. 19 Ne kona neʼaa, ngogt gataab re zha, tak ngok nad leettsoo re zha.