6
Yúguʼtë bönniʼ nadóʼogaca ral-laʼ ilúndëʼë bal xángaquiëʼ, para cabí gaca nu innë́ ziʼ que La láʼayi queëʼ Dios, en que xibá queëʼ. Nupa niʼ nacuʼë xángaca taʼyéajlëʼë Cristo, bitiʼ ral-laʼ uluʼcáʼana cáʼasö légaquiëʼ tuʼ nácagaquiëʼ bö́chiʼguequi. Ral-laʼ ilunrö dxiʼa xichíngaquiëʼ tuʼ taʼyéajlëʼë Cristo, bönniʼ niʼ tuʼziʼë xibé dxin dxiʼa naʼ, tuʼ nadxíʼinëʼ Lë cazëʼ légaquiëʼ. Ca naca lë ni, busëdi bönachi nacuáʼ niʼ, en guchiza le icja nágagaquiëʼ.
Le reaj ládxiʼruʼ-nëʼ Dios le ruzíʼiruʼ xibé
Channö zoa nu bönniʼ rusë́dinëʼ xibá yúbölö, en bitiʼ rusë́dinëʼ yuguʼ didzaʼ dxiʼa queëʼ Xanruʼ Jesucristo, ca naca xibá naʼ rusedi rëʼu ca ral-laʼ gunruʼ ca rë́ʼënëʼ Dios, bönniʼ ni run ba zxön cuinëʼ, en bitiʼ bi nö́zinëʼ. Didzaʼ bitiʼ naca dxiʼa rizë́ ládxëʼë ca nácagaca didzaʼ böniga, en didzaʼ bizxaj, yuguʼ le tun ga tuʼzxéʼe bönachi luzë́ʼeguequi, en taʼdíl-lalen luzë́ʼeguequi didzaʼ. Lëscaʼ tun didzaʼ caní ga taʼnnë́ ziʼ bönachi que luzë́ʼeguequi, en taʼzáʼ ládxiʼgaca que luzë́ʼeguequi le cabí nácatë. Lëscaʼ caní tun ga taʼdíl-laticaʼsëʼ didzaʼ bönniʼ bitiʼ taʼyéajniʼinëʼ, nupa bitiʼ nazíʼ lu në́ʼeguequi le naca idútë li. Téquini huáca ilaʼzíʼ dumí zián channö ilúngaca tsözxö́n nupa taʼyéaj ládxiʼgaca Dios. Gucuíta ga nacuáʼ bönachi caní. Zxön naca le ruzíʼiruʼ xibé cateʼ len yöl-laʼ riböza zxön ladxiʼ reaj ládxiʼruʼ-nëʼ Dios. Bitiʼ bi nuáʼaruʼ cateʼ ridxinruʼ yödzölió, en lëscaʼ caní, bitiʼ bi uáʼaruʼ cateʼ uzáʼaruʼ yödzölió ni. Que lë ni naʼ, channö dësö queë́ruʼ le gáguruʼ, en le gácuruʼ, ral-laʼ udzéjaruʼ. Yuguʼ bönniʼ të́ʼënnëʼ gataʼ quégaquiëʼ yöl-laʼ tsahuiʼ, gaca quégaquiëʼ le siʼ bëʼ légaquiëʼ le xihuiʼ, ateʼ ilaʼyuʼë lu yalaj que tuʼ xihuiʼ, ateʼ lu yöl-laʼ bitiʼ bi nözi quégaquiëʼ zián le ilaʼzë́ ládxiʼgaquiëʼ, le ilún ditaj légaquiëʼ. Yuguʼ lë ni uluʼsuniti légaquiëʼ, en ilún ga ilaʼnítiëʼ tsaz. 10 Tuʼ taʼzë́ ládxiʼgaca bönachi dumí, lë ni run ga tun yúguʼtë le cabí naca tsahuiʼ. Bal-lëʼ bönniʼ, tuʼ taʼzë́ ládxiʼgaquiëʼ le, buluʼcáʼanëʼ le gulaʼyéajlëʼë Cristo, en chiraca quégaquiëʼ zián le tuʼsacaʼ ziʼ légaquiëʼ.
Nu run dxin queëʼ Cristo naca ca tu bönniʼ rejëʼ gudil-la
11 Naʼa, bönniʼ queëʼ Dios, gucuíta ga raca le caní.
Bë́ʼticaʼsö ládxuʼu gunuʼ le naca tsahuiʼ, en le rë́ʼënëʼ Dios.
Guyéajlëʼticaʼsëʼ Cristo, en bidxíʼi yuguʼ luzóʼo.
Bëʼ ladxiʼ gacuʼ zxön ladxiʼ, en nöxaj ladxiʼ.
12 Ca runëʼ tu bönniʼ idú ládxëʼë rejëʼ gudil-la,
ben dxin que le réajlëʼëruʼ Cristo, ateʼ beni quiuʼ yöl-laʼ naʼbán idú.
Para gaca caní bulidzëʼ Dios liʼ. Dxiʼa guca le gunnóʼ yalaj lulu ca réajlëʼu Cristo, lë naʼ gunnóʼ lógaca zián nupa tun ba nalí que didzaʼ bëʼu. 13-14 Niʼa queëʼ Xanruʼ Dios, Nu naʼ nabánigaca yúguʼtë le nacuáʼ, encaʼ niʼa queëʼ Jesucristo, Nu ben ba nalí le naca dxiʼa le gunnë́ʼ yálajdoʼ lahuëʼ Poncio Pilato, rinná béʼedaʼ liʼ gun chiʼu yuguʼ lë naʼ gunná béʼenëʼ Cristo rëʼu. Ral-laʼ gacuʼ idú tsahuiʼ, en bitiʼ bi gunuʼ le güíʼi lataj nu bi innë́ quiuʼ, ga idxintë dza niʼ uluíʼi lahuëʼ Xanruʼ Jesucristo. 15 Cateʼ idxín dza naʼ huödëʼ Jesús, Dios uluʼë lahui Lëʼ.
¡Dios náquiëʼ láʼayi!
¡Tuzëʼ Lëʼ dë lu nëʼë yöl-laʼ unná bëʼ,
en rinná béʼenëʼ yúguʼtë nupa taʼnná bëʼ,
en náquiëʼ caʼ Xángaca yúguʼtë nupa nácagaca xan!
16 ¡Tuzëʼ Lëʼ zóaticaʼsëʼ!
¡Zoëʼ lu beníʼ ga bitiʼ gaca nu idxín rácasö que!
¡Catu caz nu biléʼe Lëʼ, en bitiʼ gaca nu iléʼe Lëʼ!
¡Queëʼ Lëʼ gácaticaʼsö le run Lëʼ bal, en yöl-laʼ unná bëʼ!
¡Caʼ gaca!
17 Gunná beʼe yuguʼ bönniʼ dë quégaquiëʼ yöl-laʼ tsahuiʼ dza ni zóaruʼ naʼa, para cabí ilún ba zxön cuíngaquiëʼ, en para cabí uluʼzxöni ládxiʼgaquiëʼ yöl-laʼ tsahuiʼ naʼ bitiʼ naca löza. ¡Ral-laʼ ilunëʼ löza Dios ban, Nu rúnnadaʼ queë́ruʼ yúguʼtë le ruzíʼiruʼ xibé! 18 Gunná beʼe légaquiëʼ ilunëʼ le naca dxiʼa, para ilaʼyandaʼ dxin dxiʼa tunëʼ, lë naʼ naca tu yöl-laʼ tsahuiʼ idú. Ral-laʼ bi uluʼnödzjëʼ quégaca bönachi yechiʼ, en iluíʼi ládxiʼgaquiëʼ léguequi. 19 Channö ilunëʼ caní, uluʼtubëʼ yöl-laʼ tsahuiʼ naʼ naca idú, le uluʼziʼë xibé dza siʼ zaʼ, en ilaʼdéliʼnëʼ yöl-laʼ naʼbán idú.
Le guluʼë Pablo lu náʼabiʼ biʼi Timoteo
20 Bö́chaʼadoʼ Timoteo, ben chiʼi le nadödi lu noʼo. Gucuíta ga nacuáʼ nupa tuíʼi didzaʼ cáʼasö, en yuguʼ didzaʼ bitiʼ nazacaʼ, en yuguʼ didzaʼ bizxaj, yuguʼ didzaʼ naʼ tuíʼi nupa taʼnnasö tácadaʼ, ateʼ nazíʼ yéʼeguequi ca naca lë naʼ tun. 21 Bal-la bönachi gulaʼzíʼ lu në́ʼeguequi yuguʼ didzaʼ caní, ateʼ gulaʼchixi gulaʼnigui ca naca le réajlëʼëruʼ Cristo.
Rinábidaʼ-nëʼ Dios uzáʼ ládxëʼë quiuʼ le nácagaca dxiʼa queëʼ.
¡Caʼ gaca!